Read Mousgoum Yeremiyas 28 Bible Online

Yeremiyas 28 - Mousgoum bible

Yeremiyas 28

¹War buza ni dama, war sarti na Sedesiyas pai na Yuda a fana warɗi pai agwiya war tile n’ag'aŋ ɵim na wiini buza n’ag'aŋ puɗu, ɗif na mini Alaw Hananiya n’ahini Azzur na Gabawon par a muɗaŋa amlai warni tempel wuzani arɗi paakai zi ɓaka gaiɗi ɗai paŋ maini nɵa:

²EPIƊ-ƊAI zi spak paŋ Alaw na wiiɗi Izrayel a na muɗa maini nɵa: mu na haɗa jug na wiini pai na Babilon ɗa edi.

³Buza a hina sulu aga mu wayasi wazagai zi sda na war tempel na Nebugatnezar pai na Babilon a mulaŋ woni na par a kaŋ a Babilon ɗa.

⁴Aga mu wayasi woni hlai hanɗa, a miɗi na sini EPIƊ-ƊAI par, Yekoniya n’ahini Yoyakim pai na Yuda, gaiɗi ɗai na Yuda n’e kiɗi edi war Babilon ɗa paŋ lai, buri ɓa aga mu haɗa jug na wiini pai na Babilon ɗa edi.

⁵Ɗif na mini Alaw Yeremiyas a wiyini seŋ wiini ɗif na mini Alaw Hananiya wuzani arɗi paakai zi ɓaka gaiɗi ɗai n’e ɗa amlai warni tempel ɗa paŋ.

⁶Ɗif na mini Alaw Yeremiyas a muɗa: nkam, a zuva ɓa a za ɗa ɵa, a zuva ɓa EPIƊ-ƊAI a zaŋ maini hanɗa ɵa, a zuva ɓa a va seŋ na wuze na ku muɗaŋ ɗa amai, a wayasi wazagai na warni tempel par gaiɗi ɗai n’e kiɗi edi lai a Babilon par warni hlai hanɗa.

⁷Amma mu siiwuku ɓa, ɵina seŋ n’aga mu muɗuŋku wiiku tuku gaiɗi ɗai ɗa.

⁸Ɗai na mini Alaw n’e ɗika wuza ta par, wuzaku tuku par lai haa ɗipar ɗa, e miɗi seŋ na wuze sini afti viya, sini aftiɗi paakai viya lai, midini gaw, midini gir gaini vlak lai.

⁹Amma na ɓa ɗif na mini Alaw a muɗa li ɓa, wala na meefeŋ aga a za kai, na ɓa wala na meefeŋ a za kai ɗa, ɗai aga e siɗi ɓa, ɗif na mini Alaw ni ɗa a ɵinaŋsi ɗa a EPIƊ-ƊAI jir jre.

¹⁰Nɵa ɗif na mini Alaw Hananiya a tika jug ɗa edi wuulani ɗif na mini Alaw Yeremiyas par a haɗaŋ edi;

¹¹Hananiya a muɗa wuzani arɗi ɗai paŋ ɓa: EPIƊ-ƊAI a na muɗa maini nɵa: buza a hina sulu aga mu haɗa jug na Nebugatnezar pai na Babilon a na a tikiŋɗi wuulaɗi pinziba paŋ ɗ a maini nɵa. Ɗif na mini Alaw Yeremiyas a hala wiini.

¹²Asakal na ɗif na mini Alaw Hananiya a haɗa jug n’aŋ wuulani ɗif na mini Alaw Yeremiyas edi ɗe ɗa, EPIƊ-ƊAI a miɗini seŋ wiini Yeremiyas, a miɗini ɓa:

¹³hala ku miɗini wiini Hananiya ɓa, EPIƊ-ƊAI a na muɗa maini nɵa: ku haɗa jug zi luwuŋ edi ɗe, amma aga ku bundaŋ gaini jug zi kawai.

¹⁴Buri EPIƊ-ƊAI zi spak paŋ Alaw na wiiɗi Izrayel a na muɗa maini nɵa: mu tika jug zi kawai wuulaɗi pinziba hanɗa paŋ ɓa kapai a ɵina pini Nebugatnezar pai na Babilon, aga e ɵini pini lai, wazagai na buza lai mu siŋni war tini paŋ.

¹⁵Ɗif na mini Alaw Yeremiyas a miɗini wiini ɗif na mini Alaw Ha naniya ɓa: mu siiwuku, ɵina seŋ na mu dara mu muɗuŋku ɗa Hananiya, EPIƊ-ƊAI a ɵunukusi kai, amma tuku ku kiɗiɗi ɗai aŋ tiki hiiniɗi midini seŋ z'eles na ɗa ku tuku.

¹⁶Buri hanɗa EPIƊ-ƊAI a na muɗa maini nɵa: aga mu burkuku edi midini afti par, abaraina ɗa aga ku mra buri ɓa ku fikiɗiɗi ɗai amai sini EPIƊ-ƊAI.

¹⁷Ɗif na mini Alaw Hananiya a mra warini buza ni ɗa, war tile n’ag'aŋ muguzak.