Read Mousgoum Yeremiyas 29 Bible Online

Yeremiyas 29 - Mousgoum bible

Yeremiyas 29

¹Seŋ na Yeremiyas a ɗoŋ warɗi letre a Yeruzalem par aŋ ɵinaŋ siɗi n’abakai n’arbaɗi ɗai gaiɗi paakai zi ɓaka gaiɗi ɗai na mini Alaw, gaiɗi ɗai paŋ na Nebukatnezar a miliɗi a Yeruzalem par a kiɗi a Babilon,

²Asakal na pai Yekoniya, gaiɗi muni n’amai, gaiɗi ɗai n’abakai zi sda na ahani, paakai na Yuda gaiɗi na Yeruzalem, ɗai n’e tûki midini dalam gaiɗi nagai n’e zizini wazagai n’e ɵi mini hlai gaini e niyi edi warɗi Yeruzalem par ya.

³A siti letre hanɗa tini Eliyaza n’ahini Safa gaini Gemariya n’ahini Hilkiya, na Sedesiyas pai na Yuda a ɵiniɗi a Babilon sini Nebukatnezar pai na Babilon, seŋ na warɗi maini nɵa:

⁴EPIƊ-ƊAI zi spak paŋ, Alaw na wiiɗi Izrayel a na a muɗa siɗi nagai paŋ n’e miliɗi a Yeruzalem par a kiɗi a Babilon maini nɵa:

⁵Rgi dalam simni warni, pi luwoŋai simi alini lai,

⁶mili falakai, wii ali na maɵagai gaiɗi na falakai, miliɗi falakai wiiɗi aliki na maɵagai, siɗi aliki na falakai edi wiiɗi maɵagai lai kapai nagai e wii ali na maɵagai gaiɗi na falakai lai, ki sisiɗi viya woni hlai na ki ɗa woni, ki fiyi azumai kai.

⁷Ki piyi jam na wiini fuŋ n’abai na mu kiki woni, ki siiwi EPIƊ-ƊAI burini lai, buri ɓa ki kiɗi ki simni jam Won hlai na fuŋni a na jam.

⁸Buri EPIƊ-ƊAI zi spak paŋ Alaw na wiiɗi Izrayel a na muɗa maini nɵa: ki hiniɗi ɗai na mini Alaw n’e ɗa arbaki gaiɗi ɗai zi siɗi wuti aŋ rhiki kai, ki tiki hiiniki midini weseŋ n’a na piɵiki kaalai.

⁹Buri ɓa seŋ na wuze n’e ɗa e miɗiŋki war yikiŋa a eles kadai, mu ɵiniɗiɗi kai, a miɗi na sini EPIƊ-ƊAI par.

¹⁰Amma EPIƊ-ƊAI a na muɗa maini nɵa, Won hlai na Babilon te ŋa li midiki haa buza doogo doogo muguzak, aga mu liwiiki ɗuwal, aga mu va amai seŋŋa na mu ɵina ha midini aŋ wiyikisi woni hlai hanɗa.

¹¹Ta ɗa mu sɗa wala na mu na hiinaŋ buriki ɗa, a miɗi na sini EPIƊ-ƊAI par, a wala na a siki ɵeɗ, a na a zigi gir kai, aga mu sitiki dawai na ki ɗa biyiti pini ɵeɗ.

¹²Nɵa aga ki hilisi ki yiki yikiŋa, ki hili lai, aga ki siiwiŋa, aga mu ɵina miki lai.

¹³Aga ki wiyi ki piyiŋa, aga ki niviŋa lai, buri ɓa aga ki piyiŋa gaiɗi agulkin paŋ.

¹⁴Aga mu sa sa arki, a miɗi na sini EPIƊ-ƊAI par, aga mu wiyiki warni eziki n’avut, aga mu tipikisi edi arbaɗi pinziba paŋ par, war hlai na mu ɵiriki edi woni par paŋ lai, a miɗi na sini EPIƊ-ƊAI par, aga mu wiyikisi woni hlai hanɗa na mu milikiɗi edi warni par.

¹⁵Amma gaini hanɗa paŋ ɗa, tiki ki hiini ɓa, EPIƊ-ƊAI, a sikiɗi ɗai na mini Alaw a Babilon ya.

¹⁶Tili, EPIƊ-ƊAI a na muɗa sini pai n’a sumna midiɗi Paramai zi pai na wiini David, siɗi ɗai paŋ n’e ɗa warni fuŋ n’abai hanɗa, siɗi tawalakaiki n’e hiliɗi edi gaiki kai, amma e hini ka aha maini nɵa:

¹⁷EPIƊ-ƊAI zi spak paŋ a na muɗa maini nɵa: aga mu hinasi gaw gaiɗi wiyamai gaini vlak lai midiɗi, aga mu bindiɗi maini alini luwuŋ Fige na gaini liɓi edi n’a kiɗa a luma kai buri ɓa a suwa maafanai gara.

¹⁸Aga mu tika futi piɗi gaini gaw, gaiɗi wiyamai, gaini vlak lai. Aga mu bindiɗi aŋ wala zi mili hunai piɗi ɗai burini aftiɗi paakai na midini afti paŋ, aŋ wala na ɗai e tûûsi gaini, aŋ wala na a vada gdaŋɗi ɗai edi, na hi-hir n’e yibi hûwit, zi tirki lai, arbaɗi pinziba paŋ n’aga mu ɵiriɗi edi arbaɗi,

¹⁹Buri ɓa e ɵini seŋŋa kai, a miɗi na sini EPIƊ-ƊAI par, nagai na kureɗ mu ɵiniɗi ɗaiŋa zi sda siɗi, ɗai na mini Alaw mu ɵiniɗi siɗi, tiki ki ɵini kai, a miɗi na sini EPIƊ-ƊAI par.

²⁰Amma tiki paŋ, tiki n’e kiki edi, n’e milikiɗi a Yeruzalem par a Babilon ɵini seŋ na wiini EPIƊ-ƊAI.

²¹EPIƊ-ƊAI zi spak paŋ, Alaw na wiiɗi Izrayel a muɗa midini Akab n’ahini Kolaia gaini Sedesiyas n’ahini Maaseya n’e miɗi seŋ na wuze z'eles war yikiŋa maini nɵa, aga mu siɗi war tini Nebukatnezar pai na Babilon aga a fiɗiɗi edi wuzani arki.

²²Ɗai n’e miliɗiɗi a Yuda par e kiɗi a Babilon paŋ ɗa, aga e tûûwisi gaini yikiɗi ɗai na sulu hanɗa, aga e miɗi maini nɵa: EPIƊ-ƊAI a za suku maini n’a za Sedesiyas gaini Akab na pai na Babilon a viŋgiɗi arni afu nɵa.

²³Buri e zi wala na hi-hir gara aha warɗi Izrayel, e si siɗi edi pini zini maɵara gaiɗi falakaiki marɗi, e miɗi eles war yikiŋa, paŋ ktai mu siɗi miɗi ktai kai, Ta mu sɗaŋ, mu zaidani lai, a miɗi na sini EPIƊ-ƊAI par.

²⁴Ku miɗini wiini Semaya na Nehlam par, ku miɗini ɓa:

²⁵EPIƊ-ƊAI zi Spak paŋ, Alaw na wiiɗi Izrayel a na muɗa maini nɵa: ku ɵina letre wiiɗi ɗai na Yeruzalem ɗa paŋ, wiini pai zi ɓaka Sofoniyas n’ahini Maaseya gaiɗi paakai zi ɓaka na zamai ɗa paŋ lai, war yukuku, ku ɗoŋ maini nɵa:

²⁶EPIƊ-ƊAI a zuku aŋ pai zi ɓaka war balamni pai zi ɓaka Yeyoda, kapai ku tika hangalku sini sda paŋ n’a za amlai warni tempel, kapai ɗif paŋ na a vuluma, na a za sini aŋ ɗif na mini Alaw lai, ku waa ezini war pokolom, zaw ku rgaŋ gaini jaɓ zi kawai.

²⁷Yeremiyas na Anatot par, na a za sini aŋ ɗif na mini Alaw arbaki na ɗa, ku za sini nɵa kai buri maɗa?

²⁸Na maa a ɵiniyisi miɗi a Babilon woni na maini nɵa: aga ki bizi woni viya, rgi dalam simni warni, pi luwoŋai, limi alini lai.

²⁹Pai zi ɓaka Sofoniyas a ŋitini letre hanɗa wiini Yeremiyas ɗif na mini Alaw.

³⁰Nɵa EPIƊ-ƊAI a miɗini seŋ wiini Yeremiyas a miɗini ɓa:

³¹Ku ɵina ɗai siɗi ɗai n’e kiɗi edi paŋ, ku miɗiɗi ɓa: EPIƊ-ƊAI a na mu miɗini wiini Semaya na Nehlam par maini nɵa: buri ɓa Semaya a muɗa siki war wûle na wiiɗi ɗai na mini Alaw, a ziki midiki aŋ tiki hiiniki midini seŋ z'eles lai.

³²Nɵa, EPIƊ-ƊAI a na muɗa maini nɵa: Aga mu faka amai sini Semaya na Nehlam par gaiɗi pinzibani paŋ. Pinzibani ktai kaw aga a hina arbaɗi ɗaiŋa kai, aga a tala pɗem n’aga mu zaŋ siɗi ɗaiŋa kaalai, -a miɗi na sini EPIƊ-ƊAI par, buri ɓa ni ɗa a hûgûɗi ɗai aŋ fiki amai sini EPIƊ-ƊAI.