Read Mousgoum Yeremiyas 3 Bible Online

Yeremiyas 3 - Mousgoum bible

Yeremiyas 3

¹Won hlai na ɗif a bititi munini li but, te hinaŋ te tika ɗif zamai li ɗa, a kiɗa a waya piɗi zamai pra ɗi? afti ɗa aga a bunda hi-hir buri hanɗa kai ɗi? Tuku ku za maɵara gaiɗi marmakai viya, ku hiina ɓa aga ku za aŋ muniya ɗaai! a miɗi na sini EPIƊ-ƊAI par.

²Mula arku sini boŋorai tala haw, boŋor ktai na a hina na gaiɗi marmakaiku ki fini midini kai a na ɗi? Ku sumna ɵimani futi dam aŋ biyiɗi marmakaiku maiɗi ɗai zi giɗam na basga n’e zûgû yaw yaw. Ku bunda afti hi-hir gaini maɵaraku, gaini meefeŋku na ku zaŋ ɗa lai.

³Nɵa mu hina faŋ n’abakai a ɵa kai, faŋ na asakal ɗa a ɵa kaalai, amma ku hiriŋa wuzaku sek gaini zawarku ɗaai, ku dara ku yima meefeŋku suku kai.

⁴Tiyana ɗa, ku ɗuulaŋasi katawai ɓa: apa, marmaia na war agwiyeŋeŋa par ɗa.

⁵Ku zilba suku lai ɓa: warni aga a hina sa meefeŋ ɵa haa gamai ɗi? Aga a tikaŋa warni ɵa ta haa kureɗ? Ku muɗa ɗa maini nɵa, ku za meefeŋ wuzaku sek lai, ku sɗa zini gaini futini lai.

⁶War sarti na wiini pai Yoziyas ɗa, EPIƊ-ƊAI a muɗaŋa: ku tala wala na Izrayel na ɗikat kai te zaŋ ɗa ya ɗi? Te hala amai midini huwoŋai na mogokai paŋ, azumai pini luwuŋ na a goɗo paŋ lai, te za maɵara woni.

⁷Mu hiina ɓa, te za hanɗa li haa ɗa aga te wayasi sa, amma te wayasi kai, Yuda zi rhai na tawalɗi ɗa te tala hanɗa ya lai.

⁸Mu biditi Izrayel na ɗikat kai ɗa but, mu siɗi letre zi bidi tiɗi ɗaw lai buri maɵaraɗi, gaini hanɗa paŋ Yuda zi rhai na tawalɗi ɗa te huna kai, na lai te faka aŋ za zawar lai.

⁹Pini labar n’a na waa edi midini maɵara na wiiɗi ɗa, Izrayel te bunda aftiɗi hi-hir, te za maɵara gaini alawai zi rgi z'ali-fuŋ gaini zi luwuŋ.

¹⁰Paŋ ktai gaini hanɗa paŋ ɗa, Yuda zi rhai na tawalɗi ɗa, te wayasi amma war hiini na jre kai, a miɗi na sini EPIƊ-ƊAI.

¹¹EPIƊ-ƊAI a muɗaŋa: Izrayel na ɗikat kai ɗa pɗemi pɗemi te sûwiti Yuda zi rhai ɗa.

¹²Hala, ku muɗa seŋ hanɗa sini gal n’azumai sek ɗa, ku muɗa maini nɵa: wayasi, Izrayel na ɗikat kai ɗa, a miɗi na sini EPIƊ-ƊAI par, aga mu hursa ara amai suku kir kai, buri ta mu marmai na jre, a miɗi na sini EPIƊ-ƊAI par, aga mu tukuku wara ɵa ta kai.

¹³Amma, a pɗem ɓa ku yima meefeŋku suku, tuku ku faka amai ɗa sini Epiɗ-ɗai Alaw na wiiku, ku hina suku piɗi ɗai n’edi par ɵa marwai, azumai pini luwuŋ na a guɗa paŋ. Tiki ki ɵini ma kai, a miɗi na sini EPIƊ-ƊAI par.

¹⁴Wiyisi, tiki zi ɵini Gat kai ɗa, a miɗi na sini EPIƊ-ƊAI par, buri ɓa Epiŋgezaki muta, aga mu tipikisi aha, mu yimasi ktai war fuŋ n’abai ktai par, sulu war fuŋ n’agwi ktai par lai, mu kikisi aha war Siyon.

¹⁵Aga mu siki ɗai zi giɗimi na mu firyiɗi, aga e ɵi wuzaki war yel, e tiki hangalɗi siki lai.

¹⁶Won hlai na ki sisiɗi li viya, ki bindi li viya midini afti ɗa, war sarti ni ɗa, a miɗi na sini EPIƊ-ƊAI par, ɗif aga a muɗa gaini Zunduk zi bonu na wiini EPIƊ-ƊAI kir kai, ɗif aga a hiinaŋ kir kai, midini ɗif aga a kɵa gaini kir kai, aŋ kai maa ɗif n’a zilbaŋ aŋ kai, e zizini na zamai warni balamni kaalai.

¹⁷War mefeŋ ni ɗa, aga e siɗi yiki wiiɗi Yeruzalem ɗa ɓa: Paramai zi pai na wiini EPIƊ-ƊAI. Pini zibaɗi ɗai paŋ aga e diŋgisi siɗi sek war yikini EPIƊ-ƊAI, siɗi Yeruzalem. Nagai aga e tiɓi pini hiiniɗi na meefeŋ kaalai.

¹⁸War mefeŋ ni ɗa, ɗai na Yuda gaiɗi ɗai na Izrayel ɗa aga e tipi gaiɗi marɗi, midini afti na war gal n’azumai par aga e hilisi piɗi marɗi midini afti na mu siŋɗi wiiɗi tamaiɗi aŋ bulum.

¹⁹EPIƊ-ƊAI a muɗa: mu firiya mu zuku aŋ ktai arbaɗi aliya ɗa.

²⁰Tiki ɗai na Izrayel ɗa, ki ɗûûliŋa maiɗi muni na payaiɗi meefeŋ na te ɗuula mafaɗi nɵa, a miɗi na sini EPIƊ-ƊAI par.

²¹Amai midini boŋorai par ɗa, suura a wasi, tuwi na mini gir na wiiɗi aliɗi Izrayel gaini yuwiiɗi na sini Alaw ɗa, e hiniti futi na pɗemi ɗa edi mak, midiɗi a wula gaini Epiɗ-ɗai Alaw na wiiɗi skeŋ.

²²Wiyisi, tiki zi ɵini Gat kai ɗa, aga mu zuula ɗikat kai na wiiki ɗa. Ɗai e miɗi: miɗi na, mi ɗa wiyiɗi suku, buri ɓa tuku k’ Epiɗ-ɗai Alaw na wiyi.

²³Gazi zaŋ, siiwi na ɗai e siiwiŋ amai midini boŋorai na ɗa e ɗûû li ɗa e ɗi ɗai, suura n’amai midini huwaŋai ɗa a wala na jreni aŋ kaalai. Gazi zaŋ, kûrɗi na wiiɗi Izrayel a na tini Epiɗ-ɗai Alaw na wiimu.

²⁴Haa war agogoimu par der na wiiɗi tamaimu ɗa a ba ɗa war Baal, wala zi siyer hanɗa, adumaimu gaini haakaimu, gaini ɵaakaimu, alimu na maɵagai gaiɗi na falakai lai, a baŋ ɗa a Baal.

²⁵Sumnumu wiimu warni siyermu ca, hunumu siyer ɗa a yumumu wiini buri mu zumu tuwur sini Epiɗ-ɗai Alaw na wiimu, tumu gaiɗi tamaimu paŋ, war agogoimu par haa girna, mu ɵinumu mini Epiɗ-ɗai Alaw na wiimu kai.