Read Mousgoum Yeremiyas 30 Bible Online

Yeremiyas 30 - Mousgoum bible

Yeremiyas 30

¹Seŋ n’EPIƊ-ƊAI a miɗiŋni wiini Yeremiyas:

²Epiɗ-ɗai Alaw na wiiɗi Izrayel a na muɗa maini: Ɗo seŋ na mu muɗuŋku paŋ warni maktuɓ.

³Mefeŋ a na halasi, -a miɗi na sini EPIƊ-ƊAI par, woni aga mu wiyiɗi ɗaiŋa, Izrayel gaiɗi Yuda warni eziɗi n’avut, a muɗaŋ a EPIƊ-ƊAI. Aga mu wiyiɗisi aha midini afti na mu siŋɗi wiiɗi tamaiɗi, nagai aga e tikiŋ lai.

⁴EPIƊ-ƊAI a muɗa seŋ midiɗi Izrayel gaiɗi Yuda maini:

⁵EPIƊ-ƊAI a na muɗa maini nɵa: suura na wiini pri n’ei a na waa, a hunai n’abai, hlai a hala kai

⁶Ki zilbi pɗem, maɵagai e ɗa e wii ali ɗe? Maɵagai paŋ ɗa, tiɗi wuzaɗi ta ta maiɗi falakai na ŋibani na wiini pûkû a na ziɗi ɵa ɗa buri maɗa? E ŋirɓi arɗi maiɗi falakai na ŋiba na wiini pû ûa na ziɗi ɵa buri maɗa?

⁷Gir gara, mefeŋ hanɗa a mefeŋ n’abai, mefeŋ zamai na maini ɵa aŋ kai. A mefeŋ zi gir burini Yakob, amma aga a kurɗa a niyasi edi warni par.

⁸War mefeŋ ni ɗa, a miɗi na sini EPIƊ-ƊAI zi spak paŋ par, aga mu piliɗi edi pini spak n’a na kirpiɗi azumai maini juk nɵa, aga mu haɗa jaɓ na eziɗi edi, aga e zi aŋ bagakai na wiini pinziba n’edi par kir kai.

⁹Aga e ziɗi ɗa a ɵeŋ na wiini Epiɗ-ɗai Alaw na wiiɗi, e zi ɵeŋ na wiini ɗif na war pinzibani David na paiɗi par n’aga mu tikaŋ amai midiɗi lai.

¹⁰Tuku Yakob ɵeŋ na wiya, ku huna kai, a miɗi na sini EPIƊ-ƊAI par, hina hunai n’abai a yimiki kai, Izrayel, aga mu kurɗukusi edi midini afti na gai gai par, pinzibaku midini afti na a na warni aŋ bege par lai. Yakob aga a wayasi aha, aga a sumna war ɵeɗ, gaini hangalni lai, ɗif n’aga a huwuyaŋ aŋ kir kai.

¹¹Buri ta mu na gaiku, a miɗi na sini EPIƊ-ƊAI par, aŋ kurɗuku edi, aga mu vidiɗi pinziba paŋ na mu ɵiriki arbaɗi edi. Amma tuku ɗa aga mu vuduku edi kai, amma aga mu guduku maini n’a na ɗa ɵa, mu ara sini meefeŋku kai.

¹²EPIƊ-ƊAI a na muɗa maini nɵa: girku ɗa azi vidi kai, wurukku ɗa azi zûûli kaalai!

¹³Ɗif n’a ɗiya puku par aŋ kai, ɗif n’a ma mini wurukku aŋ kaalai, kurgum na pɗem n’a zuula wuruk buriku aŋ kai.

¹⁴Nagai paŋ n’e ɗika e diriku ɗa, midiɗi a wula gaiku, aga e piyuku kir kai. Buri mu zuku gir maini na gawku a zuku gir ɗa nɵa, mu tukuku gir na gdaŋ gara muduku, burini meefeŋku na a suwa viya gara, burini tuwurku na viya gara ɗa lai.

¹⁵Ku tuwa wuzani burini girku buri maɗa, ku tuwa burini ŋiba n’a zuula kai ɗa buri maɗi lai? mu za hanɗa suku burini meefeŋku na viya, gaini tuwurku na viya lai.

¹⁶Buri nɵa, nagai paŋ n’e ɗa lumuku tiyana ɗa, ɗai aga e limiɗi lai, gawku paŋ aga e kiɗi edi aŋ bege, nagai n’e virmuku ɗai aga e virmiɗi, nagai n’e hili wazagaiku paŋ aga mu siɗi war tuku aŋ hilɗi lai.

¹⁷Buri ɓa mu wuyuku warni azuku n’avut, aga mu zuuluku warni girku par, a miɗi na sini EPIƊ-ƊAI par. Buri e suku yiki ɓa: " na mini ɗif piɗi kai" hanɗa te Siyon. Na na ɗif a na a zilbiti kai.

¹⁸EPIƊ-ƊAI a na muɗa maini nɵa: aga mu waya gumukaini Yakob war ezini n’avut, aga mu hiini haw midini hlai zi simni na wiini, fuŋ n’abai aga a waya a rga amai pra midini zöni, dalamai na pɗemai aga a rga amai warni balamni lai.

¹⁹Arbaɗi par, yama zi kol gaini riyi lai aga a wasi edi, aga mu bindiɗi viya, aga e fiyi azumai kir kai, aga mu ziɗi aŋ abakai, ɗif aga a wiyiɗi azumai kir kai.

²⁰Aliɗi aga e bindi maini na ɗipar nɵa, vokɗi aga a ɗiya ɗikat wuzani ara, aga mu faka amai siɗi nagai paŋ n’e ziɗi gir.

²¹Paiɗi ɗa a ktai n’arbaɗi par, n’abaiɗi ɗa a na arbaɗi par, aga mu sini futi mu toraŋsi sa, aga a torasi sa lai, n’a kiɗa a yimaŋ sini aŋ torasi sa gaini midini dama a siya ɗa? A miɗi na sini EPIƊ-ƊAI par.

²²Aga ki bindi aŋ ɗaiŋa, ta aga mu bunda aŋ Alawki lai.

²³Hanɗa a berber na wiini EPIƊ-ƊAI, hiy n’abai a naɓasi edi, berber n’abai a za meefeŋ ta, a guna amai midiɗi nagai na maafanai.

²⁴Hiy n’abai na wiini EPIƊ-ƊAI aga a waya duɓani kai, na a hiinaŋ warni ɗa, a vaŋ amai kai ɗa a kiɗa aŋ ɗiya kai. asakal sek ɗa aga ki ɵini ezini hanɗa edi.