Read Mousgoum Yeremiyas 31 Bible Online

Yeremiyas 31 - Mousgoum bible

Yeremiyas 31

¹War mefeŋ ni ɗa, a miɗi na sini EPIƊ-ƊAI par, aga mu bunda aŋ Alaw na wiiɗi pinzibaɗi Izrayel paŋ, nagai lai aga e bindi aŋ ɗaiŋa.

²EPIƊ-ƊAI a na muɗa maini nɵa, ɗai n’e kûrɗisi mini mri par, e nivi yum ara edi war buza, Izrayel te hala na ɗa sini simniɗi na gaini hangal ɗa sek.

³EPIƊ-ƊAI a siŋka sini ara edi gai gai par, diri na mu duruku gaini a diri n’a vada kai, pɗemŋa na gaiku ɗa, mu ɗiya midini na buri hanɗa.

⁴Aga mu waya mu rgugu amai, aga ku rga amai, Izrayel na juvi. Aga ku gaɓa gangaku suku pra aŋ wala zi gaŋ, aga ku niyasi anene arbaɗi nagai n’e didimi gaiɗi nagai n’e riyi lai.

⁵Aga ku pa luwuŋ zi viŋ katawai pra, amai midini huwuŋ na Samariya, nagai n’e simi ali luwuŋ paŋ aga e simi alini lai.

⁶Buri mefeŋ ktai aga a cosi, n’aga nagai n’e giɗimi mini hlai, aga e ɗûûli amai midini hlai zi huwuŋ na wiini Efrayim, e miɗi: fiki amai, hulumu amai a Siyon, sini Epiɗ-ɗai Alaw na wiimu.

⁷EPIƊ-ƊAI a na muɗa maini nɵa: ɗûûli gaini firiyi burini Izrayel, siŋki firiyi na wiiki edi, edi wuzaɗi pinziba paŋ, hini wulaki a waa, kûliŋ gaini yama, miɗi: EPIƊ-ƊAI, pliɗi ɗaiku edi, piɗi Izrayel na a hina.

⁸Aga mu wiyiɗisi midini afti na war gal n’azumai sek ɗa par, aga mu tipiɗisi edi mini koŋɗi yai par, arbaɗi ɗa, na malvanai, na daŋalaŋai, falakai zi ziyi, gaiɗi falakai na ŋiba na wiini pûkû a ziɗi e ɗa, vok n’aga a wayasi woni hlai hanɗa, a vok n’abai.

⁹Aga e cûsi war tuwi, war tuwiɗi na sa aga mu ɵa wuzaɗi, aga mu kiɗi sini huduk zi yem, warɗi futi na ɗikat n’eziɗi a daba sini wala kai, buri ɓa Ta m’api buriɗi Izrayel, Efrayim a ahiya z'e wii n’avut.

¹⁰Tiki pinzibaɗi ɗai, ɵini seŋ na wiini EPIƊ-ƊAI, ɓikiŋ edi sini huudi na gai gai lai, ki miɗini: Ni n’a ɵiriɗi Izrayel edi aga a tipiɗisi amai, aga a giɗimiɗi maini ɗif zi giɗimi a giɗima farani nɵa.

¹¹Buri EPIƊ-ƊAI a piliɗisi ɗai na Izrayel edi, a piliɗisi edi tini gawɗi na spakni a sûwiiɗi.

¹²Aga e hilisi, aga e ɗûûli amai midini boŋorai na Siyon, aga e tipisi sini wazagai na pɗamai na wiini EPIƊ-ƊAI, algama, viŋ na hehe, emel na hehe, adumai gaini haakai gaini ɵaakai lai, aga e bindi maini zardeŋ n’e ɗa e mi yem pini nɵa, gdaŋ aga a yima edi kir kai.

¹³Nɵa ɓulamai aga e didimi gaini firiyi, gawlakai gaiɗi ɗdai na walakai e firiyi aŋ bonu lai, aga mu bunda tuwi na wiiɗi aŋ firiyi, mu siɗi arai zi pi, asakalni girɗi par aga mu viɗi gaini firiyi.

¹⁴Aga mu viɗi paakai zi ɓaka gaini neŋ z'emel, ɗaiŋa aga e vi gaini wazagaya na pɗamai lai, a miɗi na sini EPIƊ-ƊAI par

¹⁵EPIƊ-ƊAI a na muɗa maini nɵa: a Rama par, ɗuwal gaini tuwi a na waa, te tûwiiɗi aliɗi na te Rakel, te dara arai zi pi n’e siŋɗi buriɗi aliɗi kai, buri e ɗa kir kai.

¹⁶EPIƊ-ƊAI a na muɗa maini nɵa: suwi, ɗiya tuwiku zaw, girda tuwi n’arku edi, buri sdaku aga a nava vrak pini, a miɗi na sini EPIƊ-ƊAI par, aga e wiyisi aha edi midini afti na wiini gawɗi par.

¹⁷Buri dawai sek ɗa, biyi na pini ɵeɗ na wiiku a na, a miɗi na sini EPIƊ-ƊAI par, aliku aga e wiyisi midini aftiɗi pra.

¹⁸Mu tiliɗi ɗai war pinzibani Efrayim e ɗa ɵi hama siɗi, e miɗi: ku gidiyi, mi gidi gaini futini, maini ahini ɵeŋ n’a sɗa futini hirim kai nɵa, wiyiyisi suku, kapai mi wiyisi suku, buri ɓa, Alaw na wiyi ɗa ku tuku EPIƊ-ƊAI.

¹⁹Asakal na mu bundasi ara edi sini meefeŋ par ya, a fuuɗaŋa sa gara. Asakal na mu sɗa sa ya, sa a baza ara, mu ɵiɓa ta pa. Siyer a yimaŋa, ara a yima amai kai. Buri sda zi siyer na mu zaŋ warni agwiya par aŋ mada.

²⁰EPIƊ-ƊAI a muɗa: buriya ɗa Efrayim a ahi na mu daraŋ gara, mu daraŋ a sûwiiɗi marni paŋ, mu faka li aŋ muɗa seŋ sini paŋ ɗa, mada a kɵa gaini a suwa, a suwa, buri hanɗa agula te tuwa midini, nkam, mu hiina haw burini. A miɗi na sini EPIƊ-ƊAI par.

²¹Pa wazagai zi siŋki amai, pa wazagai ɵimani futi na mu vuga warɗi, tika hangalku siɗi futi ɗa, siɗi futi n’aga ku hala warɗi ɗa, wayasi, Izrayel na zûvi, wayasi, war fuŋku n’abakai ɗa!

²²Suku blaŋ aŋ giliŋa ɵa haa kaswata ɗa? Ahiyagwi na hriŋi, buri EPIƊ-ƊAI a na za wala na hehe midini afti, te paya ɗif na wus te muni.

²³EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: Won hlai na mu ziziniɗi li warni eziɗi n’avut, ɗai aga e miɗi midini afti na Yuda, warni fuŋni n’abakai lai maini nɵa: a zuva ɓa EPIƊ-ƊAI a ɓukuku, afti na wiini jre ɗikat, huwuŋ na sɗik.

²⁴Nɵa ɗai n’aha warɗi Yuda gaiɗi na war fuŋɗi n’abakai lai, ɗai zi hirim gaiɗi zi giɗimi na e zûgûgaini faraɗi yaw yaw aga e simni aŋ bonu midini afti hanɗa.

²⁵Buri nagai na gaini kiyi ca ɗa, aga mu siɗi yem aŋ ci, nagai na gdaŋ warɗi kai ɗa, aga mu viɗi lai.

²⁶War hlai hanɗa, mu ɵiya amai, mu mula ara edi, weseŋ a nafu pɗem gara.

²⁷Mefeŋ a na halasi, a miɗi na sini EPIƊ-ƊAI par, war mefeŋ ni ɗa, aga mu suuɗa seyem na wiiɗi ɗai, gaini na wiini farai midini afti na wiiɗi Izrayel gaini na Yuda.

²⁸Maini mu tika hangala siɗi aŋ rɗa wala amai, aŋ haɗa wala azumai, aŋ kurɗa hlai azumai, aŋ vada wala edi, aŋ hiniɗi ɗai aŋ simni ɵeɗ kai nɵa, nɵa lai aga mu tika hangala siɗi aŋ rga amai, aŋ pa azumai lai, a miɗi na sini EPIƊ-ƊAI par.

²⁹War mefeŋ ni ɗa, ɗai aga e miɗi kir kai ɓa: tamai e limi alini luwuŋ zi viŋ na a naiya kai, amma a ɵaya ɗa a sesiyeŋɗi aliɗi,

³⁰Amma, ɗif paŋ aga a mra mini meefeŋni, ɗif paŋ n’a lima li alini luwuŋ zi viŋ na a naiya kai ɗa, a ɵaya ɗa a sesiyeŋni ni dama. Bonu na hehe

³¹Mefeŋ a na halasi, a miɗdi na sini EPIƊ-ƊAI par, warni mefeŋ ni ɗa aga mu za bonu gaini pinzibaɗi Izrayel gaini pinziba na wiiɗi Yuda lai, war mefeŋ ni aga mu za bonu na hehe.

³²A na maini bonu na mu zaŋ gaiɗi tamaiɗi nɵa kai, war mefeŋ na mu yimiɗi tiɗi aŋ miliɗisi edi war Egipte par, bonu ni ɗa e zi pini kai, amma ta ɗa, mu epingezaɗi ɗaai, a miɗi na sini EPIƊ-ƊAI par.

³³Amma, asakalni mefeŋ hanɗa par, bonu n’aga mu zaŋ gaiɗi a na maini nɵa, a miɗi na sini EPIƊ-ƊAI par, aga mu tika gadaiŋa zi ɗûamlai warɗi, aga mu doŋ warni agulɗi, aga mu bunda aŋ Alaw na wiiɗi, nagai aga e bindi aŋ ɗaiŋa lai.

³⁴Ktai aga a hitira maini, zaw tawalni kai ɓa: sɗa EPIƊ-ƊAI, buri paŋ aga e siɗiŋa paŋ, sini n’agwi par haa sini n’abai ɗa ta, a miɗi na sini EPIƊ-ƊAI par. Aga mu siɗi ni burini meefeŋ na wiiɗi, mada aga a kɵa gaini tuwur na wiiɗi kir kai.

³⁵EPIƊ-ƊAI a na muɗa maini nɵa: ni n’a siti futi aŋ za gaglai girvudi, na a sa gadai wiini tile gaini meeɵek aŋ za gaglai duvuk lai, ni n’a durguza yem-ra n’abai amai, a faka mayaw amai aŋ suura lai. ni na yikini ɓa: EPIƊ-ƊAI zi spak paŋ.

³⁶Na ɓa gadai zi ɗû hanɗa, mu vadaŋfu edi wuzani ara par vat ɗa, a miɗi na sini EPIƊ-ƊAI par, pinzibaɗi Izrayel ɗa lai aga e piɵi wuzani ara aŋ pinziba kir kai ɵa gamai.

³⁷EPIƊ-ƊAI a na muɗa maini nɵa: hlai n’amai ɗa, a nafu ɓa ɗif a kata mogoni n’amai sek ɗa, hulumni afti n’azumai sek ɗa, a nava ɓa ɗif a kiɗa a talaŋsi lai, nɵa ta lai aga mu birgiɗi pinzibaɗi Izrayel edi wuzani ara par, burini meefeŋ paŋ n’e ziŋ ɗa, a miɗi na sini EPIƊ-ƊAI par.

³⁸Mefeŋ a na halasi, a miɗi na sini EPIƊ-ƊAI par, war mefeŋ ni ɗa, fuŋ n’abai aga a rga amai pra burini EPIƊ-ƊAI, sini poriyo na wiini Hananeyel par haa sini magala na koŋni hlai.

³⁹Sogom n’e kiti hlai gaini ɗa, aga e yimiŋ cir haa sini boŋor na Gareɓ, asakal a yima a Gowa sek lai.

⁴⁰Huduk n’e pûkûkopoŋ gaini bono z'emel warni paŋ gaini hlai na baŋa su su n’a na haa sini huduk na Sedron ta lai, haa sini koŋni magala na wiini plasai na piɗi futi na dawai par sek ɗa ta, aga a yika aŋ hlai na wiini EPIƊ-ƊAI, wala na warni hlai hanɗa, ktai aga a rɗa amai kaalai, a haɗa azumai kaalai.