Read Mousgoum Yeremiyas 32 Bible Online

Yeremiyas 32 - Mousgoum bible

Yeremiyas 32

¹EPIƊ-ƊAI a miɗini seŋ wiini Yeremiyas, war buza n’ag'aŋ doogo, na Sedesiyas a na aŋ pai war Yuda. Hanɗa a buza n’ag'aŋ doogo pi mitwis na Nebukatnezar aŋ warɗi pai.

²War sarti ni ɗa, vokɗi askarai na wiini pai na Babilon e cikiti Yeruzalem, ɗif na mini Alaw Yeremiyas ni a nafu daŋgai aha warɗi pakatai zi gɗam ahani pai na Yuda.

³Sedesiyas pai na Yuda a yimaŋ, a ɵaŋ warɗi daŋgai a muɗa: ku muɗa war seŋ na wuze ɓa: EPIƊ-ƊAI a na muɗa ɓa fuŋ n’abai hanɗa aga mu saŋ war tini pai na Babilon, aga a tikaŋ lai buri maɗa?

⁴A muɗa pra ɓa: Sedesiyas pai na Yuda ɗa, aga a mula tiɗi askarai na Babilon par kai, gaini dewele aga a sa war tini pai na Babilon, aga e miɗi miɗi marɗi, arɗi aga a nava gaiɗi marɗi lai.

⁵Ku muɗa lai ɓa, pai na Babilon aga a ka Sedesiyas war Babilon a sumna woni haa mu liwiini ɗuwal, a miɗi na sini EPIƊ-ƊAI par; ɓa ki hitimiɗi ɗai na Babilon aga ki rɗi amai midiɗi kai.

⁶Yeremiyas a muɗa, EPIƊ-ƊAI a muɗaŋa seŋ, a muɗaŋa ɓa:

⁷Hanameyel n’ahini tawalni apuku Sallum aga a halasi a muɗuku ɓa, ku wura vuwaiŋa n’a na Anatot ɗa, buri ɓa na futi te kiɗa aŋ sa sini aŋ wuuraŋ ɗa ku tuku.

⁸Hanameyel n’ahini tawalni apa a halasi sa maini pini miɗi na wiini EPIƊ-ƊAI nɵa, a muɗaŋa: za barka, ku wura vuwaiŋa n’a na Anatot midini afti na wiini Benyamin, buri ku mula bulum ɗa ku tuku, ku wura wazagaiyi ɗa ku tuku lai, wuuraŋ wiiku, nɵa a yima mada ɓa, a seŋ na sini EPIƊ-ƊAI par.

⁹Nɵa, mu wura vuwai n’a na a Anatot ɗa tini Hanameyel n’ahini tawalni apa par, mu sini faraini lai: sulai zi arzaŋ doogo pi muguzak.

¹⁰Mu ɗo maktuɓ na a siŋka ɓa wala a wura edi kaai ɗa, mu ɗoŋ sulu, na ktai ɗa wuzani arɗi zaidakai mu tika tampon na wiya midini ta, mu tika farai ɗa midini kilo aŋ tala gumani,

¹¹Mu tika maktuɓ na a siŋka ɓa wala a wura edi kai, na mu ɗoŋ na tampon a tika midini maini n’a za pini gadai ɗa nɵa, gaini maktuɓ ktai na a hina kadai ɗa lai,

¹²Mu sini maktuɓ na sulu hanɗa wiini Baruk n’ahini Neriya, na tiyni maaseya wuzani arni Hanameyel n’ahini tawalni apa wuzani arɗi zaidakai n’e tiki tiɗi azumai pini maktuɓ na a siŋka ɓa wala a wura edi kaai n’e ɗa ca ɗa, wuzani arɗi Yudiyakai paŋ n’e ɗifu amlai war pakatai zi gɗam ɗa lai.

¹³Wuzani arɗi paŋ, mu miɗini wiini Baruk maini nɵa:

¹⁴EPIƊ-ƊAI zi spak paŋ Alaw na wiiɗi Izrayel, a na muɗa maini nɵa: mula maktuɓ na a siŋka ɓa wala a wura edi kaai hanɗa sulu paŋ, na tampon a tika midini lai, na a hina kadai lai, ku mulaŋ warni grak z'afti ca kapai a giɗima, a fana viya lai.

¹⁵Buri Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: ɗai aga e wûri dalam gaini vuwai gaini zardeŋ zi luwuŋ zi viŋ midini afti hanɗa paŋ.

¹⁶Asakal na mu sini maktuɓ na a siŋka ɓa wala a wura edi kaai wiini Baruk n’ahini Neriya ya, mu siiwa EPIƊ-ƊAI maini nɵa:

¹⁷Aai, Epiɗ-ɗai Alaw, ku za hlai n’amai gaiɗi yai ku tuku, war spakku, war gdaŋku, wala na gir buriku aŋ kai zaŋ.

¹⁸Tuku ku za yum haa sini piniziba n’asakal sek dubu, amma meefeŋ na wiiɗi tamai ɗa ku vurgaŋ tizaw siɗi aliɗi n’asakalɗi tar, tuku k’Alaw n’abai, ku gaŋgalaŋ na yikuku ɓa: EPIƊ-ƊAI zi spak paŋ.

¹⁹Na ku rgaŋ warku aŋ zaŋ ɗa a sda n’abakai, sda na ku zaŋ ɗa pɗamai, arku midini payaiɗi ɗai, ku sa sini a siya ɗi paŋ pini payaini, pini alini sdani na a zaŋ ɗa lai.

²⁰Tuku ku za wazagai zi siŋki gaini wazagai zi hila aha warɗi Egipte, haa girna yikuku a hina su aŋ waa aha warɗi Izrayel, arbaɗi ɗai paŋ lai, maini n’a na za girŋa na ɗa nɵa,

²¹Ku miliɗisi Izrayel na ɗaiku edi war Egipte par gaini wazagai zi siŋki gaini zi hila, gaini gdaŋ gaini spak lai, ku miliɗi hunai abai gara piɗi ɗai.

²²Ku siɗi afti hanɗa, na ku ha wala muku wiiɗi tamaiɗi ɓa aga ku siŋɗi, afti na fiyaw gaini emelni ami a ka woni.

²³E hilisi midini afti ni ɗa, e tikiŋ aŋ wiiɗi lai, amma e ɵini muku kai, e zi pini gadai zi ɗû na wiiku kaalai, na ku gidiɗi midini aŋ ziŋ ɗa, e ziŋ kaalai, nɵa ku hinasi gir hanɗa paŋ midiɗi buri hanɗa.

²⁴Ɗai na Babilon e ɗa libi afti amai eziɗi zilagaiyi kapai e tiki fuŋyi n’abai ɗa, fuŋyi n’abai ɗa a hinafuna tiɗi ɗai na Babilon n’e cikiŋ ɗa burini gaw gaiɗi wiyamai gaini vlak n’aga a za sini ɗa. Seŋ na ku muɗa ɗa, a cosi ya, ku na talaŋ gaini arku lai.

²⁵Gaini hanɗa paŋ Epiɗ-ɗai Alaw ku muɗaŋa ɓa ku wura vuwai ktai gaini farai, mu paya zaidakai ta lai. tiyana fuŋ n’abai a sa war tiɗi ɗai na Babilon ta koo!

²⁶EPIƊ-ƊAI a miɗini wiini Yeremiyas, a miɗini ɓa:

²⁷Ta, m’EPIƊ-ƊAI, Alaw na wiini wazagai na karni paŋ, wala ktai na gir buriya a na ɗi?

²⁸Buri hanɗa, EPIƊ-ƊAI a na muɗa maini nɵa: aga mu sa fuŋ n’abai hanɗa war tiɗi ɗai na babilon gaini Nebugatnezar pai na Babilon lai, aga a tikaŋ,

²⁹Ɗai na Babilon n’e ɗa ciki fuŋ n’abai hanɗa aga e niyi aha warni, e ɵi afu pini, e yiŋ edi lai, gaini dalamai zi daba n’e yi wazagai zi ɗûgûdi zin lûgûzi midini wiini Baal, n’e mi ɓaka zi viŋ azumai wiini alawai na zamai midini lai, e ɓilkitiŋa agula gaini.

³⁰Buri ɓa ɗai na Izrayel gaiɗi na Yuda haa war agogoiɗi par e zi ara ɗa a wazagai na maafanai ɵa, ɗai na Izrayel ɗa sai e ɓilkitiŋa t'agula bas gaini sda n’e ziŋ ɗa. A miɗi na sini EPIƊ-ƊAI par.

³¹Fuŋ n’abai hanɗa a wala na a kaŋa war hiy, war suwar sini mefeŋ n’e rgiŋ par haa girna, buri nɵa, mu dara mu talaŋ wuzani ara kir kai.

³²Limi na ɗai na Izrayel gaiɗi na Yuda e limi agula gaini meefeŋɗi n’e ziŋ ɗa, nagai paakaiɗi, gaiɗi ɗai ɗi n’abakai, gaiɗi paakaiɗi zi ɓaka, gaiɗi ɗai ɗi na mini Alaw lai, ɗai na Yuda gaiɗi ɗai na Yeruzalem lai.

³³E bindisika arɗi sa duk kai, sai duɓaɗi; Mu hitiriɗi haa mu kaya gaini kai, amma e ɵini kai, e yimi wala na mu hitiriŋɗi kaalai.

³⁴E mili wazagaiɗi zi rgi na wiiɗi na haharai amlai warni tempel na wiya, gaini hanɗa, e bindiŋ hi-hir lai.

³⁵E rgi hlai zi ɓaka na wiini Baal war huduk na wiiɗi alini Hinnom kapai e yiɗi aliɗi na maɵagai gaiɗi na falakai lai wiini alaw Molek aŋ ɓaka. A wala na mu miɗiɗi gaini duk kai, na mu hiinaŋ duk kaalai. E zi wazagai na haharai maini hanɗa nɵa kapai e kiɗi ɗai na Yuda aŋ zi tuwur.

³⁶Buri hanɗa, tiyana Epiɗ-ɗai Alaw na wiiɗi Izrayel, a na muɗa midini fuŋ n’abai na ki miɗi midini ɓa a sa war tini pai na Babilon, buri ɓa gaw gaiɗi wiyamai gaini vlak a suwa gdaŋni su maini nɵa.

³⁷Aga mu tipiɗisi edi par midini paŋ na mu ɵiriɗi edi midini, war hiy gaini suwar gaini hiy n’abai, aga mu wiyiɗisi woni hlai hanɗa, aga mu hiniɗi e simni warni war ɵeɗ.

³⁸Aga e bindi aŋ ɗaiŋa, ta aga mu bunda aŋ Alaw na wiiɗi lai.

³⁹Aga mu bindiɗi e hiini maiɗi marɗi ɵa, e zi paŋ maiɗi marɗi ɵa lai, kapai e siŋa hormo kureɗ buri pɗem na wiiɗi nagai lai gaiɗi aliɗi na duɓaɗi sek ɗa lai.

⁴⁰Aga mu za bonu n’a vada kai gaiɗi, aga mu hiniɗi edi kir kai, aga mu za pɗem siɗi, aga mu waa hormo na wiya warni agulɗi kapai e hiniŋa edi kir kai zaŋ.

⁴¹Aga mu firiya gara burini pɗem na mu zaŋ siɗi, aga mu rva sirdaiɗi azumai gaini futini midini afti hanɗa, gaiɗi agula paŋ, gaini suŋfaɗi agula paŋ lai.

⁴²Buri EPIƊ-ƊAI a na muɗa maini nɵa: pɗem na mu na muɗa midini buriɗi ɗai hanɗa aga mu hinaŋsi midiɗi, maini na mu hinasi gir n’abai hanɗa midiɗi nɵa.

⁴³Ɗai aga e wûri vuwai midini afti na ki miɗi gaini ɓa a hlai na gaini tûûri edi kok, na ɗai warni kaalai, wazagai n’e zini puɗu puɗu woni kaalai, a sa tiɗi ɗai na Babilon ta.

⁴⁴Ɗai aga e wûri vuwai gaini farai, aga e ɗûmaktuɓ na a siŋka edi ɓa wala a wura edi kaai, aga e tiki tampon midini, aga e piyi zaidakai lai midini afti na wiini Benyamin, gaini hlai n’edi par ɵimani Yeruzalem, aha war fuŋ n’abakai na Yuda, warni fuŋ n’abakai n’amai midini huwuŋ, warni fuŋ n’abakai na war Sefela gaini fuŋ n’abakai na war Negev lai, buri aga mu waya war ezini n’avut, a miɗi na sini EPIƊ-ƊAI par.