Read Mousgoum Yeremiyas 33 Bible Online

Yeremiyas 33 - Mousgoum bible

Yeremiyas 33

¹EPIƊ-ƊAI a miɗini seŋ wiini Yeremiyas azi n’ag'aŋ sulu, Won hlai n’a na daŋgai aha warɗi pakatai zi gɗam.

²EPIƊ-ƊAI na a za wazagai hanɗa paŋ a na muɗa maini nɵa, EPIƊ-ƊAI na a zizina wazagai paŋ, n’a sini hlai ta ta, e yikiŋ ɗa ɓa: EPIƊ-ƊAI

³Ku yikaŋasi aga mu ɵunukuɗi, aga mu suŋkuku midini wazagai n’abakai, wazagai n’aŋ gaini ŋûyi, na ku sɗaŋ kai.

⁴Buri Epiɗ-ɗai Alaw na wiiɗi Izrayel a na muɗa midini dalamai na war fuŋ n’abai hanɗa, gaiɗi dalamai na wiiɗi paakai na Yuda n’e gɵiŋ azumai, a bunda aŋ afti n’asakarai e libiŋ amai eziɗi zilaagai aŋ niyi aha midini maini nɵa

⁵Won hlai na ɗai e hili aŋ hitimi gaiɗi ɗai na Babilon, kapai e vi dalamai hanɗa gaini kopoŋ na wiiɗi ɗai zi mri na mu fiɗiɗi edi warni hiyŋa gaini suwarŋa, Won hlai na mu bunda ara edi sini fuŋ n’abai hanɗa par burini meefeŋ n’e ziŋ ɗa.

⁶Aga mu zizinaŋ, aga mu zuulaŋ, aga mu mulasi ɵeɗ gaini jre edi midini abai maini yem zi liwi nɵa.

⁷Aga mu ziziniti Yuda gaiɗi Izrayel, aga mu rgaŋ amai maini na a naka avut par nɵa.

⁸Meefeŋ n’e ziŋ, na gaini hanɗa e zi tuwur sa paŋ ɗa, aga mu miɗi edi hilu warni par. Aga mu siɗi ni burini meefeŋ paŋ n’e zi fuwur sa gaini, na gaini hanɗa e fiki amai sa lai.

⁹Fuŋ n’abai hanɗa aga a bunda buriya aŋ wala zi firiyi, aŋ wala zi kol, aŋ wala zi juf, arbaɗi pinziba na midini afti ɗa paŋ n’aga e ɵini midini pɗem na mu zaŋ siɗi hunai aga a yimiɗi, aga e ziriyi lai won hlai n’aga e tili pɗdem gaini ɵeɗ n’aga mu zaŋ sini ɗa.

¹⁰EPIƊ-ƊAI a na muɗa maini nɵa: hlai na ki miɗi gaini ɓa a bunda li edi aŋ greŋ, ɗai woni kaalai, wazagai n’ezini puɗu puɗu kaalai, amma warni fuŋ n’abakai na Yuda gaini futi na Yeruzalem na gaini tûûri edi, na wala ktai na karni warni kai, ɗai kaalai, wazagai n’e zini puɗu puɗu kaalai, midini afti hanɗa, ɗai aga e ɵini

¹¹suura na mini fet gaini yama zi firiyi, yama na wiiɗi nagai n’e tiki marɗi, gaini yama na wiiɗi nagai n’e miɗi ɓa: kûli EPIƊ-ƊAI zi spak paŋ buri EPIƊ-ƊAI a pɗem buri yumni a na haa kureɗ, gaiɗi na wiiɗi nagai n’e kisi ɓaka zi zini tese amlai war dalam na wiini EPIƊ-ƊAI, buri aga mu waya afti warni ezini n’avut, aga a bunda maini na a naka avut par nɵa, a muɗaŋ a EPIƊ-ƊAI.

¹²EPIƊ-ƊAI zi spak paŋ a na muɗa maini nɵa: midini afti na a bunda aŋ greŋ hanɗa, na ɗai warni kir kai, wazagai n’e zini puɗu puɗu kaalai, warni fuŋɗi n’abakai paŋ lai, aga e zizini hlai na ɗai zi giɗimi aga e kisi adumaiɗi gaini haakaiɗi aŋ fana woni pra.

¹³Warni fuŋ n’abakai na midini huwuŋ, gaini fuŋ n’abakai na war Sefela, gaini fuŋ n’abakai na war Negev, midini afti na wiini Benyamin, ɵimaɗi Yeruzalem, gaini fuŋ n’abakai na Yuda lai, ɗai aga e vigisi gaini adumai gaini haakai paŋ kapai e piɵiŋ, a muɗa a EPIƊ-ƊAI.

¹⁴Mefeŋ a na halasi, a miɗi na sini EPIƊ-ƊAI par, warni mefeŋ hanɗa aga mu va amai ɵinini-ha na mu zaŋ siɗi ɗai na Izrayel gaiɗi ɗai na Yuda.

¹⁵War mefeŋ ni ɗa, war sarti ni ɗa, aga mu wasi war pinzibani David ahi na jre n’aga a za paŋ midini afti maini n’a na ɗa ɵa gaini jre midini afti.

¹⁶War mefeŋ ni ɗa, Yuda aga te pla edi, Yeruzalem aga te sumna ɵeɗ lai. Aga e siɗi yiki maini hanɗa nɵa: EPIƊ-ƊAI a jre na wiyi.

¹⁷EPIƊ-ƊAI a na muɗa maini nɵa: Paramai zi pai na wiiɗi Izrayel ɗa aga te ɓurwa gaini pinzibani David kai.

¹⁸Paakai zi ɓaka na war pinzibani Levi aga e hilisi wuza kûreɗ-kûreɗ aŋ zi ɓaka zi yi, aŋ yi ɓaka z'alini seyem, e zi ɓaka mefeŋ mefeŋ paŋ.

¹⁹EPIƊ-ƊAI a miɗini wiini Yeremiyas, a miɗini ɓa:

²⁰EPIƊ-ƊAI a na muɗa maini nɵa: na ɓa ki kiɗi aŋ ɗûkli bonuŋa na gaini girvudi, zaw bonuŋa na gaini duvuk, kapai girvudi gaini duvuk a hala warni sartini kir kai ɗa,

²¹Nɵa, bonuŋa na gaini David na ɗifŋa ɗa a kiɗa a ɗukla lai, nɵa ahini aga a sumna aŋ pai midiɗi paramaini zi pai ɗa kai. Bonuŋa na gaiɗi Levitekai, gaiɗi paakai zi ɓaka n’e ɗa e zi sda wuza a na nɵa lai.

²²Aga mu bindiɗi pinzibani David na ɗifŋa viya, gaiɗi Levitekai n’e ɗa e zi sda wuza lai maini meeɵek n’arbani hlai n’amai na a sɗa aŋ pɵa kai, maini kai kai n’agoɗɗom nɵa lai.

²³EPIƊ-ƊAI a miɗini wiini Yeremiyas, a miɗini ɓa:

²⁴na ɗai hanɗa e ɗa miɗiŋ ɗa, ku na ɵinaŋ tiɓ ɗi, e miɗi ɓa: pinziba na sulu n’EPIƊ-ƊAI a varaŋ ɗa a hinaŋ edi mak, e ɗa miisiɗi ɗaiŋa maini nɵa, buriɗi nagai ɗa e tiliɗi aŋ pinziba kir kai.

²⁵EPIƊ-ƊAI a na muɗa maini nɵa: na ɓa mu za fu bonu arba gaini girvudi gaini duvuk kai ɗa, na ɓa mu ɗiyafu gadai amai war hlai n’amai, azumai midiɗi yai lai kai ɗa,

²⁶nɵa, mu kiɗa mu hiniɗi pinzibani Yakob gaini na wiini David na ɗifŋa edi kai, aga mu paya war pinzibani par, nagai n’aga e ɵi wuzaɗi pinzibani Abraham, Isaak gaini Yakob kir kai. Aga mu wiyiɗi warni eziɗi n’avut buri e bindi ara haw.