Read Mousgoum Yeremiyas 34 Bible Online

Yeremiyas 34 - Mousgoum bible

Yeremiyas 34

¹EPIƊ-ƊAI a miɗini seŋ wiini Yeremiyas war mefeŋ na Nebukadnezar pai na Babilon gaiɗi askaraini paŋ, afitiɗi paakai n’a ŋa midini paŋ, gaiɗi ɗai paŋ lai na e fiki amai siɗi Yeruzalem gaini fuŋ n’abakai na piɗi paŋ lai.

²Epiɗ-ɗai Alaw na wiiɗi Izrayel a na muɗa maini nɵa: hala, ku miɗini wiini Sedesiyas pai na Yuda, ku miɗini ɓa: EPIƊ-ƊAI a na muɗa ɓa: mu na sa fuŋ n’abai hanɗa war tini pai na Babilon, aga a ɵa afu pini.

³Tuku ɗa aga ku pla edi tini par kai, amma aga e yimiku, e suku war tini lai, tuku gaini pai na Babilon ɗa aga ki simni miɗi marki, arki arɗi marki, ki miɗi miɗi marki lai, aga ku hala war Babilon.

⁴Amma, tuku Sedesiyas pai na Yuda, ɵina seŋ na wiini EPIƊ-ƊAI ɗa, EPIƊ-ƊAI a na muɗa muduku maini nɵa: Aga ku mra mini kaɵkar kai.

⁵Aga ku mra war ɵeɗ, burini tuwiku ɗa, aga e ziŋ maini na wiiɗi tamaiku n’e ɗika aŋ paakai wuzaku par nɵa, aga e yi wazagai zi ɗûgûdi zi lûgûzi, aga e zini yama zi tuwi muduku lai maini nɵa: A gir na maɵa ɗa, Epin-geza! Buri mu muɗa seŋ hanɗa muta, a miɗi na sini EPIƊ-ƊAI par.

⁶Ɗif na mini Alaw Yeremiyas, a miɗini seŋ hanɗa paŋ wiini Sedesiyas pai na Yuda, a Yeruzalem,

⁷war sarti ni ɗa, askarai na wiini pai na Babilon e ɗifu aŋ hitimiti Yeruzalem gaini fuŋ n’abakai zamai na Yuda, Lakis gaiɗi Azeka, buri arbani fuŋ n’abakai na Yuda ɗa, a hina gaini ɵaga sini ɗa a ni sulu.

⁸Asakal na pai Sedesiyas a za bonu gaiɗi ɗai na Yeruzalem paŋ aŋ miɗi edi midini pili n’edi na wiiɗi bagakai ɗa, EPIƊ-ƊAI a miɗini wiini Yeremiyas pra:

⁹A siya a siya paŋ aga a ɵa begeni zaw bagaini na war pinzibaɗi hebre su, ɗif aga a yima tawalni na Yudia aŋ bege kai.

¹⁰N'abakai paŋ gaiɗi ɗai paŋ n’e ɗiyi war bonu hanɗa, e zi ha buri e hiniɗi bagakaiɗi na maɵagai gaiɗi na falakai, e yimiɗi maiɗi bagakai ɵa kir kai, e ɗiyi midini seŋɗi, e hiniɗi e hili.

¹¹Amma asakal par, e bindi seŋɗi, e wiyiɗisi bagakai na maɵagai gaiɗi na falakai n’e hiniɗi e hili, e ziɗi dewele midiɗi aŋ wiyi warni sdaɗi zi bege n’e ɗika warni avut ɗa pra.

¹²Nɵa EPIƊ-ƊAI a miɗini wiini Yeremiyas, a miɗini ɓa:

¹³Epiɗ-ɗai Alaw na wiiɗi Izrayel a na muɗa maini nɵa: mu za bonu gaiɗi tamaiki Won hlai na mu miliɗisi edi warɗi Egipte par, war bege par, mu miɗiɗi ɓa:

¹⁴Buza a za li muguzak ɗa, a siya a siya aga a ɵa tawalni na hebre na a wûrini sini edi aŋ bege ɗa su, aga a zini sda haa buza ɵaara, asakal par, ahani par a ɵaŋ su. Amma tamaiki e ɵi maa kai, e zigi ɵimani maa kaalai.

¹⁵Tiki ɗa, ki wiyisi hiiniki wai, ki zi wala na a tala gaini futini, a siya a siya paŋ arbaki a muɗa edi gaini mini ɓa, aga a ɵa zigelni ɗa, ki zi bonu hanɗa wuzani ara, amlai warni tempel na a yika ɓa a wiya ɗa.

¹⁶Amma tiyana, ki wiyi, ki bindi hiiniki, ki yimi yikiŋa maini wala kadai nɵa lai. Ki wiyiɗisi bagakaiki na maɵagai gaiɗi na falakai na ki hini e hili, e ŋi gaini midiɗi dama lai, ki ziɗi dewele midiɗi aŋ wiyisi aŋ bagakai warni eziɗi n’avut.

¹⁷Buri hanɗa EPIƊ-ƊAI a na muɗa maini nɵa: tiki ki ɵini ma kai, ɗif a muɗa edi gaini mini burini pli n’edi na wiini tawalni zaw na wiini zigelni kai. Ta mu muɗa siki maini nɵa, a miɗi na sini EPIƊ-ƊAI par, aga mu hinasi gaw gaini vlak gaiɗi wiyamai, nɵa, aga ki bindi buriɗi aftiɗi paakai na midini afti paŋ aŋ wala zi mili hunai.

¹⁸Aga mu siɗi ɗai n’e zi pini bonu na wiya kai, n’e ɗiyio midini seŋ n’aŋ war bonu, n’e ziŋ wuzani ara, gaini ahi ɵeŋ n’e ɗûkliŋ arba ca, e vigi arbani ɗa.

¹⁹Paakai na Yuda gaiɗi paakai na Yeruzalem gaiɗi ɗai zi sda n’abakai, gaiɗi paakai zi ɓaka, gaiɗi ɗai na midini afti n’e vigi arbani neŋni ahi ɵeŋ ɗa.

²⁰Aga mu siɗi war tiɗi gawɗi, tiɗi nagai n’e piyi aŋ fiɗiɗi, kopoŋɗi aga a sa aŋ simi na wiini wazagai zi ɗufli n’arbani hlai n’amai gaini wazagai n’ezini puɗu puɗu na midiɗi yai ɗa lai.

²¹Aga mu sa Sedesiyas pai na Yuda gaiɗi ɗaini n’abakai ɗa war tiɗi gawɗi, war tiɗi nagai n’e piyi aŋ fiɗiɗi, tiɗi askarai na wiini pai na Babilon, n’e ɗa yimi siɗi edi siki par na ɗa.

²²Aga mu muɗa siɗi, a miɗi na sini EPIƊ-ƊAI par, aga mu wiyiɗisi midini fuŋ n’abai hanɗa, e hitimiŋ, e tikiŋ, e ɵi afu pini lai, fuŋ n’abakai na Yuda, aga mu bundaŋ aŋ hlai na kadai su na ɗai warni kai.