Read Mousgoum Yeremiyas 35 Bible Online

Yeremiyas 35 - Mousgoum bible

Yeremiyas 35

¹War sarti na Yoyakim n’ahini Yoziyas pai na Yuda, EPIƊ-ƊAI a miɗini seŋ wiini Yeremiyas, a miɗini ɓa:

²hala siɗi pinzibaɗi Rekabitekai ku miɗiɗi, ku kiɗisi amlai warni tempel, ku sitiɗi dilimi ktai ta, ku siɗi viŋ aŋ ci lai.

³Yeremiyas a hala a payasi Yaazaniya n’ahini Yeremiyas na tiyni Habatsiniya, tawalakaini gaiɗi alini paŋ gaini pinziba na wiiɗi Rekabitekai,

⁴Mu kiɗisi amlai warni tempel warɗi dilimi na wiiɗi alini Hanan n’ahini Yigdaliahu, ɗif na wiini Alaw, gobi ɵimani dilimi na wiiɗi n’abakai, amai par midiɗi dilimi na wiini Maaseyahu n’ahini Sallum na a giɗima mini hlai.

⁵Mu mula grak wuzaɗi ɗai na war pinzibaɗi Rekabitekai na gaini vi gaini viŋ gai ni kup, mu miɗiɗi: ci viŋ

⁶Amma e wiyini seŋ e miɗi: aga mi ci viŋ kai, buri ɓa Yonadab n’ahini Rekab na tiiyi a gidiyi ɓa: aga ki ci viŋ kai zaŋ, tiki kaalai, aliki kaalai,

⁷Aga ki rgi dalam kai, aga ki bili seyem kai, ki pi luwuŋ zi viŋ, ki wûri kaalai, amma aga ki simni war gumu ɵa haa sini mriki, kapai ki nivi suŋfa na mogo midini afti n’aga ki simni warni aŋ zak.

⁸Tiyi mi diri mi ɵini pini gadai na Yonadab n’ahini Rekaɓ na tiiyi a siŋyi ɗa, haa sini mriyi, tiyi aga mi ci viŋ kai, tiyi kaalai, falakaiyi kaalai, aliyi na maɵagai ɗa kaalai, na falakai kaalai,

⁹tiyi mi rgi dalam na kapai mi simni warni kai, mi wûri zardeŋ zi viŋ kai, vuwai kai, vuwai na gaini seyem warni kaalai,

¹⁰mi simni pini gumu, mi zi nɵa pini gadai na Yonadab na tiiyi a siŋyi, mi zi kal kal maini na a gidiyi nɵa.

¹¹Amma Won hlai na Nebukatnezar pai na Babilon a tika afti ɗa, mi miɗi arbaɗi maryi, a pɗem ɓa mu hulumu a Yeruzalem, purumu edi wuzaɗi askarai na Babilon gaiɗi na Siriya, mi ɗa a Yeruzalem na ɗa burini hanɗa.

¹²Nɵa, EPIƊ-ƊAI a miɗini wiini Yeremiyas, a miɗini ɓa:

¹³EPIƊ-ƊAI zi spak paŋ, Alaw na wiiɗi Izrayel a na muɗa maini nɵa: hala ku miɗiɗi wiiɗi ɗai na Yuda gaiɗi ɗai na Yeruzalem lai ɓa: tiyana aga ki yimi wala zi hitri hanɗa, ki zi pini seŋŋa na mu miɗiŋki lai kai ɗi? A miɗi na sini EPIƊ-ƊAI par.

¹⁴Ɗai e zi pini miɗi na Yonadab n’ahini Rekab na a sa gadai wiiɗi alini buri aga e ci viŋ kai, haa girna e ɗa ci kai, e ɵini pini gadai na wiini tiiyiɗi. Amma ta mu miɗiki, mu waya mu miɗiki azi viya, amma tiki ki ɵini maa kai.

¹⁵Mu ɵinikiɗi ɗaiŋa zi sda ɗai na mini Alaw, mu ɵiniɗiɗi kûreɗ-kûreɗ aŋ muɗuku ɓa: ki zi barka, ɗif paŋ a wayasi edi siɗi futini na mafuni par, ki bindi sdaki na ki ɗa ziŋ ɗa, ki tiki futi pini alawai na zamai aŋ zi ɵeŋni kai, nɵa aga ki simni midini afti na mu siŋki wiiki tiki gaiɗi tamaiki lai, amma tiki ki zigi ɵemaki maa kai, ki ɵini maa kaalai.

¹⁶Pinzibani Yonadab n’ahini Rekab, nagai e si hormo wiini gadai na tiiyiɗi a siŋɗi ɗa, amma ɗai hanɗa e ɵini maa kai.

¹⁷Buri hanɗa, EPIƊ-ƊAI zi spak paŋ, Alaw na wiiɗi Izrayel, a na muɗa maini nɵa: mu na kasi midiɗi Yuda gaiɗi ɗai na Yeruzalem paŋ lai, gir paŋ na mu muɗa midini ɓa aga mu kaŋsi midiɗi buri ɓa: na buri ɓa mu miɗiɗi amma e ɵini maa kai, mu yikiɗi amma e diri e ɵini kai.

¹⁸Yeremiyas a miɗiɗi wiiɗi pinzibani Rekabitekai, EPIƊ-ƊAI zi spak paŋ Alaw na wiiɗi Izrayel a na muɗa maini nɵa, tiki ɗa ki ɵini pini gadai na wiini Yonadab na tiiyiki, tiki ki zi pini gadaini paŋ, ki zi kal kal maini na a miɗiŋki nɵa,

¹⁹buri hanɗa, Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: pinzibani Yonadab n’ahini Rekab ɗa aga e ɗiyi wuza ara kureɗ.