Read Mousgoum Yeremiyas 36 Bible Online

Yeremiyas 36 - Mousgoum bible

Yeremiyas 36

¹War buza n’ag'aŋ puɗu na wiini Yoyakim n’ahini Yoziyas pai na Yuda, EPIƊ-ƊAI a miɗini seŋ wiini Yeremiyas a miɗini ɓa:

²paya maktuɓ zi fiɗi na zi amur ta, ku ɗo seŋ paŋ na mu muɗuŋku midiɗi Izrayel, midiɗi Yuda midini pinzibaɗi ɗai paŋ lai, haa sini mefeŋ na mu tika pa aŋ muɗuku par, haa sini Yoziyas par haa girna ta.

³Ablaŋtaŋkai, ɗai na Yuda aga e tiki hangalɗi sini gir na mu na zizina sa buri mu zaŋ siɗi, nɵa pini hanɗa ɗif paŋ aga a paya aŋ hiniti futi na mafuni edi, nɵa aga mu hiniɗi meefeŋɗi gaini tuwurɗi.

⁴Yeremiyas a yikasi Baruk n’ahini Neriya, Baruk a ɗo seŋ paŋ n’EPIƊ-ƊAI a miɗiŋni wiini Yeremiyas war maktuɓ zi fiɗi z'amur. Yeremiyas a miɗiŋnisi lai, ni a ɗoŋ lai.

⁵Asakal par Yeremiyas a miɗini wiini Baruk: ta m’aŋ gaini yimi, mu kiɗa aŋ hala amlai warni tempel ɗa kai;

⁶Tuku gaini muduku dama ku hala, ku ŋa war maktuɓ zi fiɗi z'amur hanɗa par seŋ na wiini EPIƊ-ƊAI na mu muɗuŋku, na tuku ku ɗoŋ ɗa, ku ŋiŋɗi wiiɗi ɗai amlai warni tempel war mefeŋ na wiini tikini-sai, ku niŋɗi wiiɗi ɗai na Yuda paŋ n’e hilisi war fuŋɗi n’abakai par lai

⁷Ablaŋtaŋkai tuwi na wiiɗi aga a co wuzani EPIƊ-ƊAI, nagai e wiyisi edi sini payai na meefeŋ par ktaiya ktaiya ɗi ɗa, buri ɓa hiy gaini suwar n’EPIƊ-ƊAI a na muɗa gaini siɗi ɗai hanɗa a na abai.

⁸Baruk n’ahini Neriya a za kal kal maini na ɗif na mini Alaw Yeremiyas a miɗiŋni nɵa, amlai warni tempel ɗa, a ŋa seŋ na wiini EPIƊ-ƊAI n’aŋ warni maktuɓ ɗa edi.

⁹War buza n’ag'aŋ ɵim na Yoyakim n’ahini Yosiyas a na aŋ pai warɗi Yuda, war tile n’ag'aŋ ɵeeŋe ɗa, e ɗiyi mefeŋ na wiini tikini-sai wuzani EPIƊ-ƊAI, buriɗi ɗai na Yeruzalem paŋ, gaiɗi n’e hilisi warni fuŋ n’abakai na Yuda par a Yeruzalem paŋ lai.

¹⁰Nɵa Baruk a ŋa seŋ na wiini Yeremiyas n’aŋ war maktuɓ ɗa amlai warni tempel warɗi dilimi na wiini Gemariya n’ahini Safan, ɗif zi ɗû wazagai, warɗi pakatai n’amai, war mini magala na hehe na wiini tempel, a ŋiŋɗi wiiɗi ɗai paŋ

¹¹Mika n’ahini Gemariya na tiiyini Safaŋ, a ɵina seŋ na wiini EPIƊ-ƊAI n’aŋ war maktuɓ ɗa paŋ,

¹²A hala aha war dalamni pai, warɗi dilimi na wiini ɗif zi ɗû wazagai, woni ɗai n’abakai paŋ e ɗifu war diŋgi: Elisama, ɗif zi ɗû wazagai, Delaia n’ahini Semaya, Elnatan n’ahini Akbor, Gemariya n’ahini Safan, Sedesiyas n’ahini Hananiya, gaiɗi abakai na zamai ɗa lai.

¹³Mika a miɗiɗi seŋ n’a ɵinaŋ paŋ, Won hlai Baruk a ŋa maktuɓ wiiɗi ɗai ɗa.

¹⁴Nɵa, n’abakai e ɵini Yehudi n’ahini Netaniya, na tiiyini Selemiya n’ahini Kusi sini Baruk aŋ miɗini maini nɵa: tikasi maktuɓ zi fiɗi z'amur na ku ŋiŋɗi wiiɗi ɗai tuku, halasi. Baruk n’ahini Neriya a tika maktuɓ zi fiɗi tini a hala siɗi.

¹⁵E miɗini: za barka, sumna azumai dam, ŋiŋyisi haw. Baruk a ŋiŋɗi.

¹⁶Won hlai n’e ɵini seŋ hanɗa li paŋ, e tili marɗi gaini hunai n’abai, e miɗini wiini Baruk, sai mi ki seŋ hanɗa wuzani pai haw.

¹⁷Asakal par e zilbi Baruk e miɗini, miɗiyi haw ɗa, seŋ hanɗa paŋ ɗa a muɗunkusi lai, ku ɗoŋ lai maɵa maɵa ɗa?

¹⁸Baruk a wiyiɗi seŋ: a muɗaŋa seŋ hanɗa paŋ ɗa a ni, ta mu ɗoŋ warni maktuɓ gaini ankre lai.

¹⁹N'abakai e miɗini wiini Baruk: hala, ku ŋoya suku, gaini Yeremiyas paŋ, a zuva ɓa ɗif a sɗa hlai na ki ɗa woni kai.

²⁰E hili aha sini pai, e hini ka maktuɓ zi fiɗi z'amur amlai warɗi dilimi na wiini Elisama ɗif zi ɗû wazagai ɗa ta, e miɗini seŋ n’aŋ warni paŋ wiini pai.

²¹Pai a ɵina Yehudi aŋ tikaŋsi, Yehudi a tikaŋsi amlai warɗi dilimi na wiini Elisama ɗif zi ɗû wazagai par, a ŋiŋni wiini pai gaiɗi n’abakai n’e ɗiyi ɵimani pai ɗa lai.

²²Pai a nafu amlai warɗi dilimi na wiini smer n’amsai ɗa, hanɗa warni tile n’ag'aŋ ɵeeŋe afu warni wala ta aŋ ya lai.

²³Yehudi a ŋali ɗû kiini kiini hu zaw puɗdu ɗa, pai a ɗuklaŋ gaiɗi muguɗi na wiiɗi ɗai zi ɗû wazagai, a pokoŋ arni afu n’a na ya wuzani warni wala ɗa, haa maktuɓ zi fiɗi ɗa a ya edi kafa.

²⁴Nɵa, pai gaiɗi ɗdai n’ahani n’e ɵini seŋ hanɗa paŋ ɗa, hunai a yimiɗi kai, e ɓisi sapa na siɗi edi kaalai.

²⁵Paŋ ktai Elnatan gaini Delaia gaini Gemariya lai e siiki mini pai ɗa ɓa a ya maktuɓ zi fiɗi ɗa kai, amma a ɵina miɗi kai.

²⁶Pai a sa miɗi wiini Yerameyel n’ahini pai gaini Seraya n’ahini Aziriyel gaini Selemiya n’ahini Abdeyel buri e yimi Baruk, ɗif zi ɗû wazagai gaini Yeremiyas na ɗif na mini Alaw ɗa. Amma EPIƊ-ƊAI a ŋûyiɗi cok.

²⁷Asakal na pai a ya maktuɓ zi fiiɗi na seŋ na Yeremiyas a miɗiŋni wiini Baruk aŋ gaini ɗû warni ɗa, EPIƊ-ƊAI a miɗini seŋ wiini Yeremiyas, a miɗini ɓa:

²⁸paya maktuɓ.

²⁹Wiini Yoyakim pai na Yuda ku miɗini ɓa: EPIƊ-ƊAI a muɗa maini nɵa: Ku ya maktuɓ zi fiiɗi edi ku tuku, ku muɗa ɓa, Yeremiyas a ɗo seŋ na ɓa: Pai na Babilon aga a halasi jre jre, aga a tuura afti hanɗa edi, aga a vidiɗi ɗai gaini wazagai n’ezni puɗu puɗu edi lai buri maɗa?

³⁰Buri hanɗa, EPIƊ-ƊAI a na muɗa sini Yoyakim pai na Yuda maini nɵa: Ɗif na war pinzibaku par aga a sumna aŋ pai warɗi Paramai zi pai na wiini David ɗa kai, kopoŋni aga a hina su arni futi na girvudi gaini smer na duvuk.

³¹Aga mu zilbiɗi miɗi burini meefeŋɗi, ni gaiɗi pinzibani, gaiɗi ɗai n’ahani lai. Aga mu hinasi midiɗi nagai ɗai na Yeruzalem, gaiɗi ɗai na Yuda, gir paŋ na mu miɗiki midini, amma nagai e yimiŋ kai.

³²Yeremiyas a paya maktuɓ zi fiiɗi zamai a siŋi wiini Baruk, a ɗo seŋ paŋ n’a naka warni maktuɓ n’avut na Yoyakim, pai na Yuda a yaŋ edi, na Yeremiyas a miɗiŋni. Seŋ zamai na maini n’avut ɵa a niyasi amlai mini par.