Read Mousgoum Yeremiyas 37 Bible Online

Yeremiyas 37 - Mousgoum bible

Yeremiyas 37

¹Pai Sedesiyas, n’ahini Yosiyas a bunda aŋ pai war balamni Koniya n’ahini Yoyakim. Nebukatnezar pai na Babilon a tikaŋ aŋ pai midini afti na Yuda.

²Ni kaalai, ɗai n’ahani kaalai, ɗai na midini afti ɗa kaalai, ktai n’a ɵini seŋ n’EPIƊ-ƊAI a muɗaŋ war mini ɗif na mini Alaw Yeremiyas aŋ kai.

³Pai Sedesiyas a ɵina Yehukal n’ahini Selemiya gaini Sefoniya n’ahini Maaseya na pai zi ɓaka aŋ miɗini wiini ɗif na mini Alaw Yeremiyas ɓa: Za barka, siiwa Epiɗ-ɗai Alaw na wiimu burimu.

⁴Yeremiyas a nafu kadai blaŋ arbaɗi ɗai, e ɵiŋ warɗi daŋgai kai hai,

⁵askarai na wiini Faraw e niyisi edi war Egipte par won hlai na ɗai na Babilon n’e cikiti Yeruzalem e ɵini hanɗa, e yimi siɗi edi sini fuŋ n’abai ɗa par.

⁶Nɵa EPIƊ-ƊAI a miɗini seŋ wiini ɗif na mini Alaw Yeremiyas, a miɗini ɓa:

⁷Epiɗ-ɗai Alaw na wiiɗi Izrayel a na muɗa maini nɵa: Ki miɗini wiini pai na Yuda n’a ɵinikisi sa ɓa: Asakarai na wiini Faraw n’e niyisi edi buri e hilisi e zini piki ɗa e ɗa wiyi aha midini aftiɗi war Egipte sek.

⁸Ɗai na Babilon aga e wiyisi pra, aga e titimi fuŋ n’abai hanɗa, aga e tikiŋ, e ɵi afu pini lai.

⁹EPIƊ-ƊAI a na muɗa maini nɵa: aga ki wili midiki kai ɓa ɗai na Babilon e hili edi gai gai siki par ɗaw ɗi ɗa, a na ɵa kai, e hili kai.

¹⁰Koo ɓa, ki rɗi amai midiɗi askarai na Babilon n’e ɗa hitimiki tekeɗeɗi, koo ɓa e hini e ɗi ɗai na gaini wuruk tekeɗeɗi, nagai aga e pisi siɗi amai war gumuɗi par aŋ ɵi afu pini fuŋ n’abai hanɗa.

¹¹Won hlai na askarai na Babilon e yimi warɗi edi siɗi Yeruzalem par agwi buriɗi askarai na wiini Faraw ɗa,

¹²Yeremiyas a firiya a niyasi edi warɗi Yeruzalem par aŋ hala midini afti na wiini Benyamin aŋ nava bulum na wiini arbaɗi ɗaini.

¹³Won hlai n’a co mini magala na wiini Benyamin, a nava abaiɗi askarai zi gɗam na yikini ɓa Yiriya, n’ahini Selemiya na tiyni Hananiya a nafu woni, a yima ɗif na mini Alaw Yeremiyas, a muɗa: ku hala na piɗi ɗai na war Babilon ɗa sike.

¹⁴Yeremiyas a wiyini seŋ: Zaw kai, mu hala na piɗi ɗai na Babilon ɗa kai. Amma Yiriya a dara a yima seŋni kai, a yima Yeremiyas aŋ kaŋ wuzaɗi abakaini.

¹⁵N'abakai e zi hiy sini Yeremiyas, e ɵiɓiŋ, e dûgiŋ amlai warɗi dilimi na wiini Yonatan ɗif zi ɗû wazagai, buri ɓa e binditi aŋ dilimi zi daŋgai pla,

¹⁶Yeremiyas a niya warɗi daŋgai azumai warni waŋ maini hanɗa nɵa, a sumna warni mefeŋ viya.

¹⁷Pai Sedesiyas a ɵina pini, won hlai na a cosi ahani a zilbaŋ war kuɗuhai: EPIƊ-ƊAI a muɗukusi seŋ ktai buriya ɗi? Yeremiyas a wiyini seŋ: Nkam, a muɗa: aga ku sa war tini pai na Babilon.

¹⁸Yeremiyas a miɗini wiini pai Sedesiyas pra: meefeŋ na mu zaŋ suku tuku, zaw siɗi ɗai na ahaku, zaw siɗi ɗai hanɗa, na ki ɵiŋa pini warɗi daŋgai ɗa a ma ɗa?

¹⁹Ɗaiki na mini Alaw n’e ɗika e miɗiki ɓa: pai na Babilon aga a halasi a hitimiki kai, a hitima aftiki hanɗa kaalai ɗa, tiyana e ɗi wata ɗa?

²⁰Tiyana ɗa, pai n’epin-geza, mu siiwuku, ɵina tûwiŋa, ku wayaŋa aha warɗi dilimi na wiini Yonatan ɗif zi ɗû wazagai ɗa kai, aga mu mra woni.

²¹Nɵa pai Sedesiyas a sa miɗi ɓa e ɵi Yeremiyas amlai warɗi pakatai zi gɗam, yuvai paŋ ɗa e sini peŋ na wulla ɗawwa ɗawwa, n’e kiŋsi warɗi futi na wiiɗi ɗai zi zi peŋ ɗa par ha hlai na peŋ na war fuŋ n’abai ɗa a vada li. Yeremiyas a hina aha war pakatai zi gɗam ɗa maini nɵa.