Read Mousgoum Yeremiyas 38 Bible Online

Yeremiyas 38 - Mousgoum bible

Yeremiyas 38

¹Sefatiya n’ahini Mattaŋ, Gedaliya n’ahini Pasur, n’ahini Yukal, n’ahini Selemaia, gaini Pasehur n’ahini Malkiya lai, e ɵini seŋ paŋ na Yeremiyas a miɗiŋɗi wiiɗi ɗai kûreɗ-kûreɗ ɓa:

²EPIƊ-ƊAI a na muɗa maini nɵa: Ɗif n’a hina li aha war fuŋ n’abai hanɗa, gaw aga te baŋ, wiyamai aga te baŋ, ɵa kai ɗa, vlak aga a baŋ lai, amma ni n’a niya li edi warni fuŋ n’abai hanɗa par aŋ sa sini war tiɗi ɗai na Babilon ɗa, aga a godo suŋfani, sunfani aga a za aŋ der na wiini, aga a sumna karni lai.

³EPIƊ-ƊAI a na muɗa maini nɵa: Fuŋ n’abai hanɗa aga a sa edi tiɗi askarai na wiini pai na Babilon fakat fakat, aga e tikiŋ lai.

⁴N'abakai e miɗini wiini pai, mi siiwuku, hina ɗif hanɗa a nava fiɗi n’edi, n’a na niyasi war mini par maini hanɗa ɵa ɗa, a na vada gdaŋɗi ɗai zi hatam n’e hini warni fuŋ n’abai hanɗa gaini na wiiɗi ɗai paŋ lai, ɗif hanɗa a paya na a pɗem na wiiɗi ɗai kai, amma a kasi midiɗi na ɗa a gir.

⁵Pai Sedesiyas a waya seŋ a muɗa: A na, aŋ war tiki, ta mu pai sme, amma gdaŋŋa a kiɗa aŋ ɗalaŋ kai.

⁶Nɵa, e yimi Yeremiyas e biliŋ warɗi kiliŋi na wiini Malkiya n’ahini pai, na te warɗi pakatai zi gɗam, e wii Yeremiyas azumai gaini sogom; kiliŋi, yem warɗi kai, aŋ warɗi a ŋorɓok, Yeremiyas a ɓula azumai arni ŋorɓok ɗa.

⁷Ebed-Melek, ɗif na Etiopiya par, a ɗif n’abai aha war dalamni pai a ɵina ɓa e bili Yeremiyas war kalaŋ su, pai a nafu mini magala na wiini Benyamin dam;

⁸Ebed-Melek a niyasi ahani pai par, a miɗini wiini pai:

⁹a miɗini: pai n’epin-geza, ɗai hanɗa e zi meefeŋ war wala paŋ n’e ziŋ sini Yeremiyas, war bili n’e biliŋ war kalaŋ, aga a mra woni tiɗi wiyamai, buri ɓa wala zi simi war fuŋ n’abai ɗa kir kai.

¹⁰Pai a sa miɗi wiini Ebed-Melek, na Etiopiya maini nɵa: mula ɗai doogo doogo hu, ku yimasi ɗif na mini Alaw Yeremiyas amai warɗi kiliŋi par kaai, mra azumai warɗi kai.

¹¹Ebed-Melek a mula ɗai pini, a hala ahani pai, azumai par piɗi dilimi zi godai, a mulasi keese keese amlai woni par, a wiŋni azumai wiini Yeremiyas warɗi kiliŋi gaini sogom.

¹²Ebed-Melek, na Etiopiya par a miɗini wiini Yeremiyas, mu siiwuku, waa keese keese hanɗa azumai pini graŋku par war hlai na sogom a ɵa warni ɗaw ɗa, Yeremiyas a za maini nɵa.

¹³E gidiyisi Yeremiyas amai gaini sogom, e yimiŋsi amai warɗi kiliŋi par, Yeremiyas a hina aha warɗi pakatai zi gɗam.

¹⁴Pai Sedesiyas a ɵina pini ɗif na mini Alaw Yeremiyas aŋ yikiŋsi, e kiŋsi sini war mini magala n’ag'aŋ hu na wiini tempel. Pai a miɗini wiini Yeremiyas, mu dara mu zilbuku wala ktai, ku muɗaŋa jre.

¹⁵Yeremiyas a wiyini seŋ wiini Sedesiyas: na ɓa mu muɗuku jre li ɗa aga ku fuɗaŋa edi kai ɗi? Na ɓa mu suku li yel ɗa aga ku yima kai ko!

¹⁶Nɵa, pai Sedesiyas a ha wala mini wiini Yeremiyas war kuɗuhai a muɗa: jre zaŋ gaini EPIƊ-ƊAI na a rgumu, aga mu suku aŋ fiɗi edi kai, aga mu suku war tiɗi ɗai n’e piyi aŋ fuɗuku kaalai.

¹⁷Nɵa Yeremiyas a miɗini wiini Sedesiyas: Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: na ɓa ku niyasi li anene wuzaɗi n’abakai na wiini pai na Babilon, ku sa suku li war tiɗi ɗa, aga ku kurɗa, fuŋ n’abai hanɗa aga e tûriŋ edi gaini afu kaalai, aga ku sumna karku tuku gaini pinzibaku paŋ.

¹⁸Amma na ɓa ku niyasi anene wuzani pai na Babilon ɗa kai, fuŋ n’abai hanɗa aga a sa war tiɗi ɗai na Babilon, aga e ɵi afu pini, tuku ɗa aga ku mula tiɗi par kaalai.

¹⁹Pai Sedesiyas a miɗini wiini Yeremiyas: ta ɗa, wala n’a saŋa kwimi ɗa, e ɗi Yudiyakai n’e tipi miɗi gaiɗi ɗai na Babilon ɗa, mu huna ɓa aga e siŋa war tiɗi e ziŋa gir.

²⁰Yeremiyas a wiyini seŋ: aga e suku war tiɗi kai, mu siiwuku, ɵina seŋ na wiini EPIƊ-ƊAI na mu na muɗuŋku, aga a zuku pɗem, sunfaku aga a kora lai.

²¹Amma na ɓa, ku dara ku niya anene kai ɗa, miɗi n’EPIƊ-ƊAI a yimaŋŋa ara ɗa a na maini nɵa:

²²falakai paŋ n’e hini aha warni dalam na wiini pai na Yuda ɗa, aga e kiɗi wiiɗi n’abakai na wiini pai na Babilon, aga e miɗi: marmakaiku ɗa e duuluku, e rɗi li amai muduku. Won hlai n’azuku a ɓula arni ŋurɓok ɗa, nagai e wiyi duɓaɗi.

²³Falakai gaiɗi aliku paŋ aga e kiɗi siɗi ɗai na Babilon, tuku aga ku mula miɗi par kai, pai na Babilon ɗa aga a yumuku, aga a ɵa afu pini fuŋ n’abai hanɗa lai.

²⁴Sedesiyas a miɗini wiini Yeremiyas: a zuva ɓa ɗif a ɵina seŋ na mu muɗuŋmu arbamu kai, ɵa kai ɗa, aga mu fuɗuku.

²⁵Na ɓa n’abakai e ɵini li ɓa mu haɗa kalaŋ gaiku, e hiliɗi e muɗuku li ɓa: za barka, miɗiyi seŋ na ku miɗiŋni wiini pai gaini na pai a muɗuŋku ɗa, ku ŋûyiŋyi kai, tiyi aga mu fuɗuku edi kai; e muɗuku li ɵa ɗa,

²⁶ku wiyiɗi seŋ ɓa: mu ka ɗa a tûwiŋa wuzani pai ɓa a wayaŋa warɗi dilimi na wiini Yonatan ɗa kai, ɵa kai ɗa aga mu mra woni.

²⁷N'abakai paŋ e hilisi sini Yeremiyas e zilbini mini, a wiyiɗi seŋ kal kal maini na pai a miɗiŋni nɵa, nɵa e hiniŋ e wiyi wiiɗi, buri ɓa seŋ ɗa a waa edi kai.

²⁸Yeremiyas a hina aha warɗi pakatai zi gɗam haa sini mefeŋ a e tikiti Yeruzalem. Won hlai n’e tikiti Yeruzalem li.