Read Mousgoum Yeremiyas 39 Bible Online

Yeremiyas 39 - Mousgoum bible

Yeremiyas 39

¹War buza n’ag'aŋ ɵeeŋe na wiini Sedesiyas pai na Yuda, war tile n’ag'aŋ doogo, Nebukatnezar pai na Babilon a halasi gaiɗi askaraini paŋ wuzaɗi Yeruzalem, a cikiti lai.

²War buza n’ag'aŋ doogo pi ktai na wiini Sedesiyas, war mefeŋ n’ag'aŋ puɗu na wiini tile n’ag'aŋ ɵeeŋe, ɗai na Babilon e bili baŋa siɗi ɵagai na sini fuŋ n’abai.

³Nɵa n’abakai na wiini pai na Babilon ɗa paŋ, e hilisi e simni mini magala n’arba, Nergal-Sareser gaini Samgar-Nebu, gaini Sarsekim abaiɗi ɗai zi sda. Nergal-Sareser abaiɗi ɗai zi zi hiila gaiɗi ɗai zamai n’abakai paŋ na wiini pai na Babilon.

⁴Won hlai n’e tiliɗi, Sedesiyas pai na Yuda gaiɗi ɗaini zi hatam e pri edi, e niyisi edi warni fuŋ n’abai ɗda par duvuk, warɗi futi na wiini zardeŋ na wiini pai, war mini magala n’arbani ɵaga na sulu ɗaw, e niyisi edi, e tikiti futi na Araba sek.

⁵Amma askarai na Babilon e htiki futi piɗi e yimisi Sedesiyas midini afti na plas na Yeriko par. E yimiŋsi, e kiŋ a Ribla midini afti na Hamat wuzani Nebugatnezar pai na Babilon, woni Nebugatnezar a ɗiyiti a sariya n’aga te za burini.

⁶Pai na Babilon a sa futi buri e ɵi wulaɗi alini Sedesiyas wuzani arni epiɗi a Ribla, a sa futi buri e ɵi ŋarakai na Yuda paŋ lai.

⁷Asakal par a sa futi buri e cûni arni Sedesiyas co co, e rgiŋŋi gaini jaɓ zi kiiya lai kapai a kaŋ a Babilon.

⁸Ɗai na Babilon e ɵi afu pini dalam na wiini pai gaini na wiiɗi ɗai lai, e hiɗi ɵaga na siɗi Yeruzalem ɗa azumai lai.

⁹Amma piɗi ɗai na a hina, nagai n’e hini aha war fuŋ n’abai ɗa, n’e tipi miɗi gaini, gaini piɗi ɗai n’a hina, Nebuzaradan abaiɗi ɗai zi gɗam a kiɗi a Babilon,

¹⁰Amma na murgakai n’arbaɗi ɗai, na walaɗi kai ɗa, na Buzaradan abaiɗi ɗai zi gɗam a hiniɗi aŋ simni aha midini afti na Yuda, war mefeŋ ni ɗa, a siɗi zardeŋ zi viŋ gaini vuwai lai.

¹¹Nebugatnezar pai na Babilon a sa miɗi burini Yeremiyas wiini Nebuzaradan n’abaiɗi ɗai zi gɗam, a miɗini:

¹²Ku yimaŋsi, ku tika hangalku sini, ku za wala ktai na meefeŋ sini kai, amma ku za sini maini n’aga a muɗuku nɵa.

¹³Nebuzaradan abaiɗi ɗai zi gɗam gaini Nebusazban abaiɗi ɗai n’e zi sda aha warɗi pakatai, Nergal-Sareser n’abaiɗi ɗai zi zi hiila, gaiɗi ɗai n’abakai na wiini pai na Babilon paŋ lai,

¹⁴e ɵini ɓa e yimisi edi warɗi pakatai zi gɗam par, e siŋ tini Gedaliya n’ahini Ahikan, na tiyni Safan buri a kaŋ ahani ta. A hina aha arbaɗi ɗai ɗa.

¹⁵EPIƊ-ƊAI a miɗini seŋ wiini Yeremiyas, Won hlai n’a na daŋgai aha warɗi pakatai zi gɗam, a miɗini:

¹⁶hala, ku muɗa gaini Ebed-Melek na Etiyopiya par, ku miɗini ɓa: EPIƊ-ƊAI zi spak, Alaw na wiiɗi Izrayel a na muɗa maini nɵa: na mu muɗaŋ midini fuŋ n’abai hanɗa, aga mu hinaŋsi midini, aŋ pɗemni burini kai, amma aŋ gir midini. Hanɗa aga a za tiyana wuzani arku lai.

¹⁷Amma warni mefeŋ ni ɗa aga mu puluku edi, a miɗi na sini EPIƊ-ƊAI par, aga ku sa war tiɗi nagai n’e miliku hunai puku kaw,

¹⁸aga mu kurɗuku edi, aga ku mra mini kaɵkar kai, sunfaku n’aga a kurɗa hanɗa a der na wiiku, buri ku hina suku war ta, a miɗi na sini EPIƊ-ƊAI par.