Read Mousgoum Yeremiyas 4 Bible Online

Yeremiyas 4 - Mousgoum bible

Yeremiyas 4

¹EPIƊ-ƊAI a muɗa: Izrayel, na ɓa ku wayasi li ɗa, ku wayasi li sa ɗa, a miɗi na sini EPIƊ-ƊAI par, na ɓa ku mula wazagai zi rgi na wiiki li edi wuzani ara par, na ɓa ku hina aŋ zogo blaŋ blaŋ kir kai.

²Na ɓa ku ha wala muku ɗa gaini EPIƊ-ƊAI na karni, gaini rhai kai maini n’a na ɵa, war jre lai ɗa, nɵa pinziba n’edi par aga e piyi ɓiki war yikini, aga e kûli siɗi gaini lai.

³EPIƊ-ƊAI a na muɗa siɗi ɗai na Yuda gaiɗi na Yeruzalem ɗa maini nɵa: Bili vuwai na hehe buriki dama, ki bili syemki arbani hedek kai.

⁴Sli gûrgûle burini EPIƊ-ƊAI, ɵi gûrgûle warɗi agulki, tiki ɗai na Yuda gaiɗi na Yeruzalem, ɵa kai ɗa hiy na wiya aga a luɓasi midiki maini afu nɵa, a ya wala paŋ, ɗif n’a kiɗa aŋ fuɗaŋ aŋ kai, burini sdaki na maafanai ɗa.

⁵Miɗi labar hanɗa edi warɗi Yuda, si labar hanɗa aha warɗi Yeruzalem, miɗiŋ edi, yibi faana midini afti paŋ, ɗûûli gaini gdaŋki ki miɗi: diŋgisi edi witaw, hulumu war fuŋ n’abakai zi ɵaga ɗa.

⁶Ki gini wala ktai zi siŋki ktai amai gaŋ siɗi Siyon sek, ki rivi woni sek, ki ɗiyi futi kai, buri mu na hinasi gir ktai na war gal n’azumai sek ɗa par. a gir na tini ɗif a ɵa mini kai.

⁷Gurnai ɗa a niyasi edi warni waŋni par dak, ni na a vada pinzibaɗi ɗai edi ɗa aŋsi a futi blaŋ, ahani par ɗa a niyasi anene dak, aŋ ɓulka aftku ɗa edi, fuŋku n’abakai ɗa a hina aŋ greŋ, ɗif warni kir kai.

⁸Buri hanɗa, ki wii sapa zi tuwi siki, ɵi hama siki, ɗûûli, buri hiy n’abai na wiini EPIƊ-ƊAI ɗa a tika edi mudumu par kai.

⁹War mefeŋ hanɗa, a miɗi na sini EPIƊ-ƊAI par paakai gaiɗi n’abakai ɗa gdaa ŋɗi aga a vada edi, paakai zi ɓaka ɗa aga e tûrli amai, ɗai na mini Alaw ɗa aga e miliŋi gaini hunai.

¹⁰Mu muɗa: Haai, Epiɗ-ɗai Alaw! ɗai hanɗa gaiɗi ɗai na Yeruzalem ɗa, ku ɗûûliɗi ɗa a ɗuula ɗi? Ku miɗiɗi ɓa: Wala na meefeŋ aga a za kir kai, amma tiyana kaɵkar ɗa aŋ wulaɗi ta ta aŋ fiɗiɗi ɗa koo!

¹¹War mefeŋ hanɗa, ɗai aga e miɗiɗi wiiɗi ɗai hanɗa gaiɗi ɗai na Yeruzalem ɗa ɓa: Smer z'afu a na vuvuwa amai midini boŋorai ɗa, warɗi futi na wiiɗi ɗaiŋa ɗa, a smer zi fili wala kai, zi tiki selte edi kaalai.

¹²A smer na gdaŋ, a halasi woni par na ɗa mu yikaŋsi ɗa muta, tiyana ɗa, mu dara mu zitiɗi sariya.

¹³Gawmu e rɗisi amai maini ɗugul nɵa saretai zi gaw na wiiɗi kokolakai maini smer na gdaŋ nɵa, plasaiɗi kokolakai maini muka nɵa, haw gara burimu, mu bumu ta.

¹⁴Yeruzalem, na ɓa ku firiya ku kurɗa ɗa, ku ma hiini na maafanai n’aŋ warɗi agulku ɗa edi, aga ku giɗima hiini na maafanai warɗi agulku ɵa haa kaswata ɗa?

¹⁵Suura ktai a na wasi a Dan par, war gal n’azumai par, a muɗa na ɗa midini gir n’a na halasi midini hlai zi huwuŋ na wiini Efrayim par ɗa.

¹⁶Ziɗi zaida wiiɗi pinzibaɗi ɗai paŋ, si labar hanɗa war Yeruzalem lai ɓɑ: Ɗai zi gaw e ɗa hilisi, e hilisi na ɗa midini afti na gai-gai par, e ɗûûli ɗuwal zi gaw sini fuŋ n’abakai na Yuda.

¹⁷Nagai aga e gûniti Yeruzalem ɗa azumai, maiɗi ɗai n’e giɗimi vuwai nɵa, buri ɓa Yeruzalem te faka amai sa, a miɗi na sini EPIƊ-ƊAI par.

¹⁸Yeruzalem, a za suku nɵa burini payaiku gaini sdakaiku na maafanai ɗa, meefeŋku ɗa a hanɗa, nkam a fuɗa si, a yuɓuku haa amlai siɗi agulku ta.

¹⁹Agula ɗa, agula ɗa, agula te naɓa a niɓi edi, mu kiɗa mu doogo ma kir kai, buri tuwini faana na mu ɵinaŋ gaini suura na mini gaw ɗa.

²⁰War hlai paŋ ku ɵina ɗa a gir ɵa, a gir ɵa, afti paŋ gaini ɓilki edi, dalam na wiyi ɗe e tûûriŋ gaini yafai kai, gumu na wiyi ɗa nɵa haaw ktai lai.

²¹Sa aŋ tala drapo na wiiɗi ɗai zi gaw ɗa ɵa haa kaswata ɗa? Sa aŋ ɵina tuwini faana ɵa haa kaswata ɗa?

²²A jre, ɗaiŋa ɗa e ɗi ɗai na yel midiɗi kai, e siɗiŋa kai, e ɗi ɗai na hangalɗi a kiɗa kai, na yel midiɗi kaalai. War zini meefeŋ ɗa, e yiki siɗi ɓa e ɗi na yalakai, amma sda na pɗem ɗa a za gaiɗi kaalai.

²³Mu tiliti yai ɗa, a wala kadai su, wala warɗi kai, mu tala Hlai n’amai ɗa, gaglai na warni aŋ kir kaalai.

²⁴Mu tala huwoŋai ɗa, a na ziriya, boŋorai paŋ a na muguza lai.

²⁵Mu tala ɗa: ɗif aŋ ir kai, wazagai zi ɗufli n’arbani hlai n’amai a naka sini.

²⁶Mu tala ɗa, afti z'alam ɗa a hina kadai su, fuŋi n’abakai ɗa gaini hiɗi azumai wuzani EPIƊ-ƊAI kafa, amma aga mu vadaŋ edi paŋ kai, buri hiyni n’abai ɗa.

²⁷EPIƊ-ƊAI a na muɗa maini nɵa: afti ɗa aga mu tuuraŋ edi kafa, amma aga mu vadaŋ edi paŋ kai.

²⁸Buri hanɗa, yai t'aŋ war tuwi, Hlai n’amai ɗa a bunda gegeŋ lai, buri mu muɗaŋ ya, mu ɗiyaŋ ɵa ya lai, aga mu pla ma kai, mu wayasi asakal kir kai.

²⁹Wuzani vugumɗi saretai zi gaw gaiɗi ɗai zi ɵiɓi ɓaraw ɗa, ɗai na war fuŋ n’abai ɗa paŋ e pri edi, ɗif a niya azumai pin kukuɓ, ɗif a pra amai midini huwuŋ, fuŋ n’abai ɗa a hina edi kadai su, ɗif warni kir kai.

³⁰Tuku Yeruzalem, ku tuura kok lai ɗa, aga ku za zamai ɗa a maɗa? Aga ku wa suku ɗa a sapa na juf ɗa zaw? Ku gaŋa suku ɗa gaini or ɗa zaw? ku ɗo pin arku kapai arku a za abakai ɗa ɗi? Ku zizina suku na ɗa meere, marmakaiku maa miɗi puku kir kai, e piyi na ɗa maa a fiɗiku.

³¹Mu ɵina tuwi maini tuwi na wiiɗi muni na pûkû a na ziti nɵa, tuwi zi gir na maini na wiiɗi muni na te poko ahiɗi n’avut ɗa nɵa. A wulaɗi Siyon, suŋfaɗi a dara a niya edi, te na yima tiɗi amai te muɗa: Haw buriya! Ɗai zi fiɗi ɗai ɗa, e ɗa fiɗiŋa.