Read Mousgoum Yeremiyas 40 Bible Online

Yeremiyas 40 - Mousgoum bible

Yeremiyas 40

¹EPIƊ-ƊAI a miɗini seŋ wiini Yeremiyas, asakal na Nebuzaradan abaiɗi ɗai zi giɗimi a yimaŋsi edi war Rama par. Won hlai n’e yimiŋsi ɗa, Yeremiyas a nafu gaini nigi gaini jaɓ arbaɗi nagai n’e yimiɗisi mini gaw a Yeruzalem par gaiɗi na Yuda par lai, n’e ɗa e kiɗi a Babilon.

²Abaiɗi ɗai zi gɗam a yima Yeremiyas edi warni baŋa a miɗini: Epiɗ-ɗai Alaw na wiiku, a muɗa midini gir n’a za sini afti hanɗa ya.

³EPIƊ-ƊAI a hinasi gir na a muɗa midini ɗa, a zaŋ nɵa buri ɓa ki zi tuwur sini, ki ɵini mini kaalai. Na a muɗaŋ siki ɗa a va amai li.

⁴Girna haa aga mu pla jaɓ n’aŋ tuku ɗa edi, na ɓa ku dara ku hala gaya a Babilon, halasi aga mu giɗimuku. Na ɓa ku dara ku hala gaya a Babilon kai, ku halasi kai. Tala, afti paŋ aŋ wuzaku na, hala woɗi na ku dara, woɗi na a tala arku pɗem.

⁵Won hlai na a waya seŋ kai, a miɗini: ku waya sini Gedaliya n’ahini Ahikam, na tiyni Safan na pai na Babilon a tikaŋsi midini fuŋ n’abakai na Yuda ɗa, ku sumna gaini arbaɗi ɗai ɗa, zaw ku hala warni hlai na ku dara, na a tala arku pɗem lai. Abaiɗi ɗai zi gɗam a sini wazagai zi simi gaini like zamai zamai lai, a tikini pini.

⁶Yeremiyas a hala sini Gedaliya n’ahini Ahikam war Mispa, a sumna gaini arbaɗi ɗai n’e hini ka aha midini afti ɗa.

⁷Abakaiɗi askarai n’e ɗika edi war basga paŋ, nagai gaiɗi ɗai na piɗi paŋ, e ɵini ɓa pai na Babilon a tika Gedaliya n’ahini Ahikam aŋ ŋa midini afti ɗa, pra ɓa, e siɗini ɗai na maɵagai gaiɗi falakai gaiɗi aliyagoi, gaiɗi ɗai na murgakai na midini afti n’e kiɗi edi war Babilon kai ɗa war tini.

⁸E hilisi sini Gedaliya a Mispa: hanɗa a Ismayel n’ahini Netaniya, gaini Yohanɗan gaini Yonatan n’alini Kareya, gaini Seraya n’ahini Tanhumet, alini Efai na Netofa par, gaini Yazaniya ahini ɗif na a Maakat par lai, nagai gaiɗi ɗai na piɗi ɗa.

⁹Gedaliya n’ahini Ahikam na tiyni Safan a miɗiɗi buri e hi wala miɗi, nagai gaiɗi ɗai na piɗi lai, a miɗiɗi: si siki wiiki tiɗi ɗai na Babilon, ki hûni kai, simni aha midini afti, si siki wiini pai na Babilon, wala ktai na meefeŋ aga a za siki kaalai.

¹⁰Amma ta, mu sumna a Mispa kapai ɗai na Babilon par e hilisi li ɗa, e dibisi sa. Amma tiki ɗa, ki sipiɗi viŋ war grakki, ki riwi alini luwuŋ, ki spiɗi emel lai, simni warni fuŋki n’abakai na tiki ki ɗa woni.

¹¹Nɵa lai, Yudiyakai n’e ɗisi war Mowab, zaw arbaɗi Ammonitekai, zaw war Edom, zaw midini afti na zamai zamai paŋ e ɵini ɓa pai na Babilon a hiŋa ɗai zamai agwi aha midini afti na Yuda, a tika Gedaliya n’ahini ahikam na tiyni Sefaŋ ta aŋ ŋa midiɗi lai.

¹²Nɵa, Yudiyakai e wiyisi aha edi war hlai n’e ziri edi woni paŋ par, e hilisi aha midini afti na Yuda sini Gedaliya war Mispa. E nivi viŋ viya gaini alini luwuŋ viya lai.

¹³Mefeŋ ktai, Yohanɗan n’ahini Kareya gaiɗi abakaiɗi askarai n’e ɗi edi war basga lai, e hilisi sini Gedaliya war Mispa,

¹⁴e miɗini: Baalis paiɗi Ammonitekai a ɵinasi Ismayel n’ahini Netaniya aŋ fuɗuku edi, ku sɗa ɵa ya, zaw ku sɗa ɵa kai ɗi? Amma Gedaliya n’ahini Ahikam a dara a yima seŋɗi kai.

¹⁵Yohanɗan n’ahini Kareya a miɗini wiini Gedaliya warni kuɗuhai war Mispa maini nɵa: mu siiwuku, hinaŋa mu hala mu fuɗa Ismayel n’ahini Nataniya edi, ɗif aga a sɗa hanɗa kai. Aga a fuɗuku edi meere kadai buri maɗa? Kapai ɗai na Yuda n’e tipi suku ɗa e ɵiri edi, piɗi ɗai na Yuda n’e hini agwi ɗa e vidi eddi lai buri maɗa?

¹⁶Gedaliya n’ahini Ahikam a wiyini seŋ wiini Yohanɗan n’ahini Kareya a muɗa: ku zaŋ kai. Seŋ na ku muɗaŋ midini Ismayel hanɗa a jre kai.