Read Mousgoum Yeremiyas 41 Bible Online

Yeremiyas 41 - Mousgoum bible

Yeremiyas 41

¹Amma war tile n’ag'aŋ muguzak, Ismayel n’ahini Netaniya, na tiyni Elisama na war pinzibani pai, a halasi gaiɗi ɗai n’abakai na wiini pai, ɗai zamai pini doogo lai sini gedaliya n’ahini Ahikam war Mispa, woni e simi aŋ bonu piɗi marɗi.

²Nɵa Ismayel n’ahini Netaniya gaiɗi ɗai na doogo na gaini e fiɗi Gedaliya n’ahini ahikam na tiyni Safan edi gaini kaɵkar, e fiɗi ni na pai na babilon a tikaŋ amai aŋ Lawan midini afti edi maini hanɗa ɵa.

³Ismayel a fiɗiɗi Yudiyakai n’e ɗa ɵimani Gedaliya war Mispa paŋ edi, gaiɗi askarai na Babilon n’e ɗifu a Mispa woni lai.

⁴Mefeŋ a za sulu asakalni mrini Gedaliya par ɗif a sɗa hanɗa kai,

⁵A Sikem par, a Silo par, a Samariya par lai ɗai e hilisi doogo doogo mitwis. Muɗgi na miɗi gaini fiɗi edi, sapa na siɗi gaini ŋiriwi edi, e ɓisi siɗi ɓas ɓas lai. E kisi ɓaka na wiini alini seyem gaini wazagai zi ɗûgûdi zi lûgûzi lai tiɗi, aŋ zi ɓaka gaini amlai warni tempel.

⁶Ismayel n’ahini Netaniya a niyasi a Mispa par a halasi arɗi sek gaini tuwi, Won hlai n’a co siɗi a miɗiɗi: hilisi ahani Gedaliya n’ahini Ahikam ɗa sek.

⁷Amma Won hlai n’e cûsi aha war fuŋ n’abai ɗa, Ismayel n’ahini Netaniya a ɵiɗi wulaɗi, a pukûɗi war kalaŋ, ni gaiɗi ɗai n’e ɗa gaini.

⁸Amma ɗai zamai arbaɗi par doogo, e miɗini wiini Ismayel: ku fiɗiyi edi kai, buri ɓa simi aŋ tiyi na mi ŋûŋyiŋsi edi warɗi basga: algama gaini orge, gaini emel gaini emelni ami lai, nɵa Ismayel a hiniɗi, a fiɗiɗi edi gaiɗi marɗi kai.

⁹Kiliŋi na Ismayel a poko kopoŋɗi ɗai na a fiɗiɗi warni, te kiliŋi na wiini Gedaliya na pai Asa a ɓiliti, burini Basa pai na Izrayel, Ismayel n’ahini Netaniya a viti gaini kopoŋ ɗa te kiliŋi hanɗa.

¹⁰Ismayel a kiɗi piɗi ɗai n’e hini warɗi Mispa ɗa, a kiɗi aŋ bege, mairamai gaiɗi ɗai n’e hini war Mispa na Nebuzaradan abaiɗi ɗai zi gɗam a siɗi war tini Gedaliya n’ahini Ahikam; Ismayel n’ahini Netaniya a miliɗi aŋ bege, a hala gaiɗi midini afti na wiiɗi Ammonitekai.

¹¹Yohanɗan n’ahini Kariya gaiɗi abakaiɗi askarai n’e ɗa gaini paŋ, e ɵini labarni sda na meefeŋ na Ismayel n’ahini Netaniyel a zaŋ ɗa.

¹²E miliɗi ɗai ɗi piɗi, e hili aŋ hitimi gaini Ismayel n’ahini Netaniyel, e niviŋ wulaɗi avai n’amai na Gabawon.

¹³Won hlai na ɗai na Ismayel a miliɗi e tili Yohanɗan n’ahini Kareya gaiɗi abakaiɗi asakarai n’e ɗa gaini lai, e firiyi gara.

¹⁴Ɗai na Ismayel a miliɗiɗi aŋ bege a Mispa par, e bindisi arɗi, e wiyisi ɗuɓaɗi, e tipi gaini Yohanɗan n’ahini Kareya.

¹⁵Amma Ismayel n’ahini Netaniyel a mula tini Yohanɗan par gaiɗi ɗai pini mitwis, a hala aha midini afti na wiiɗi Ammonitekai.

¹⁶Yohanɗan n’ahini Kereya gaiɗi abakaiɗi askarai na gaini paŋ, a miliɗisi piɗi ɗai n’e hini tini Ismayel n’ahini Netaniya n’a fuɗa Gedaliya n’ahini Ahikam, ni n’a miliɗiɗisi aŋ bege war Mispa par. Ɗai zi hatam, falakai gaiɗi aliyagoi, ɗai zi sda n’abakai, a miliɗisi haa Gabawon par

¹⁷E fikisi aŋ hili, e hilisi e fini war dalam na wiiɗi morkokoi na Kimham gobi gaiɗi Betlehem, kapai e vigi war Egipte sek.

¹⁸Aŋ yimi siɗi edi gai gai wuzaɗi ɗai na Babilon par, buri hunai piɗi wuzaɗi ta, buri ɓa Ismayel n’ahini Netaniya a fuɗa Gedaliya n’ahini Ahikam na pai na Babilon a tikaŋ aŋ Lawan midini afti ɗa su.