Read Mousgoum Yeremiyas 42 Bible Online

Yeremiyas 42 - Mousgoum bible

Yeremiyas 42

¹Abakaiɗi askarai paŋ, Yohanan n’ahini Kareya gaini Yezaniya n’ahini Hosaya gaiɗi ɗai paŋ lai, siɗi nagai n’agogoi par haa siɗi n’abakai ta, e hili

²e miɗini wiini ɗif na mini Alaw Yeremiyas ɓa: Za barka, ɵina tuwiyi ɗa, siiwa Epiɗ-ɗai Alaw na wiiku buriyi tiyi na mi hini hanɗa. Buri miɗika viya, tiyana mi hini agwi kadai maini na ku na talaŋ gaini arku na ɵa.

³A zuva ɓa Epiɗ-ɗai Alaw na wiiku a siŋkitiyi futi n’aga mi tikiti ɗa, a siŋkiyi wala n’aga mi ziŋ ɗa lai.

⁴Ɗif na mini Alaw Yeremiyas a miɗiɗi: Mu ɵina li, aga mu siiwa Epiɗ-ɗai Alaw na wiiki pini miɗi na wiiki ɗa, aga mu ŋoya seŋ ktai wuzaki kai, miɗi paŋ n’EPIƊ-ƊAI a miɗiŋkisi li paŋ ɗa, aga mu miɗiŋki.

⁵E miɗini wiini Yeremiyas: A zuva ɓa EPIƊ-ƊAI a za aŋ zaida a jre, na gaglai siyi, na ɓa mi zi kal kal maini miɗi n’Epiɗ-ɗai Alaw na wiiku a muɗuŋkusi aŋ miɗiŋyi nɵa kai ɗa.

⁶E miɗini wiini Yeremiyas: A miɗi na pɗem, a na meefeŋ, aga mi ɵini mini Epiɗ-ɗai Alaw na wiyi na mi ɗa ɵunuku sini ɗa. Tiyi aga mi firiyi gara, buri mi ɵini wulani Epiɗ-ɗai Alaw na wiyi.

⁷Mefeŋ doogo asakal hanɗa, EPIƊ-ƊAI a miɗini seŋ wiini Yeremiyas:

⁸Nɵa yeremiyas a yika Yohanan n’ahini Kareya gaiɗi abakaiɗi askarai n’e ɗa gaini paŋ, gaiɗi ɗai paŋ lai siɗi n’agogoi par haa siɗi n’abakai ta,

⁹a miɗiɗi: Epiɗ-ɗai Alaw na wiiɗi Izrayel na ki ɵiniŋa sini ɓa mu ka tuwiki ya wuzani ɗa, a na muɗa maini nɵa:

¹⁰Na ɓa ki hini li midini afti hanɗa, aga mu rgiki amai, aga mu vidiki edi kir kai, aga mu piki azumai, mu hûɗiki amai kir kai, buri gir na mu ziŋki ɗa a fuɗaŋa sa.

¹¹Ki hûni pai na Babilon ɗa kir kai, hûni na ki ɗa hûni wuzani ɗa, ki hûniŋ kir kai, a miɗi na sini EPIƊ-ƊAI par, buri mu na gaiki aŋ kûrɗiki edi, aŋ piliki edi war tini par.

¹²Aga mu bundiki arni haw, aga a hiina haw buriki, aga a wiyikisi aha midini aftiki lai.

¹³Amma na ɓa, ki miɗi li ɓa: Tiyi aga mi simni midini afti hanɗa kai ɗa, na ɓa ki ɵini mini Epiɗ-ɗai Alaw na wiiki kai,

¹⁴na ɓa ki miɗi li ɓa: Tiyi mi hili fu war Egipte, woni aga mi tili gaw gaini aryi kai, aga mi ɵini wulani faana zi gaw kaalai, wala zi simi aga a ɗûkûliyi kaalai, aga mi hili mi simni ɗa war hlai hanɗa.

¹⁵Tiki ɗai na Yuda na ki hini, ɵini seŋ na wiini EPIƊ-ƊAI, Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: Na ɓa fakat fakat ki tikiŋ li miki ɓa, ki hili fu warɗi Egipte, ki simnifu woni aŋ zak lai ɗa,

¹⁶gaw na ki ɗa hûniŋ ɗa aga a niviki edi woni, warɗi Egipte, wiyamai na te na ɓiriki agulki na ɗa aga te duɓga piki edi war Egipte, aga ki mri ɗa edi woni.

¹⁷Nagai n’e tikiŋ miɗi ɗaw ɓa, e hili fu war Egipte aŋ simni woni aŋ zak ɗa, aga e mri mini gaw, miɗi wiyamai, mini vlak lai, ktai n’aga a hina piɗi karni aŋ kai, ktai n’aga a pra edi mini gaw n’aga mu kaŋsi midiki aŋ kaalai.

¹⁸Buri Epiɗ-ɗai Alaw zi spak, Alaw na wiiɗi Izrayel a na muɗa maini nɵa: Hiyŋa gaini suwarŋa na mu zaŋ siɗi ɗai na Yeruzalem ɗa aga a za siki nɵa lai won hlai na ki hili li war Egipte ɗa, aga ki bindi aŋ wala zi hi-mi, aŋ wala zi vidi gdaŋni ɗif, zi tuusa gaini zi tirki. Aga ki wiyisi war hlai hanɗa kir kai.

¹⁹Tiki piɗi ɗai na Yuda, EPIƊ-ƊAI a na muɗa maini nɵa: Ki hili warɗi Egipte kai, yimiŋ midiki pɗem, mu ziki zaida li girna par.

²⁰Ki wili siki edi na ɗa kiiki, buri ki ɵiniŋa sini Epiɗ-ɗai Alaw na wiiki ki ɗi tiki gaini miɗi na ɓa: Siiwa Epiɗ-ɗai Alaw na wiyi buriyi, n’Epiɗ-ɗai Alaw na wiyi a muɗaŋ li paŋ, ku miɗiŋyi, aga m ziŋ.

²¹Girna mu miɗiŋki li, amma tiki ki ɗa ɵini mini Epiɗ-ɗai Alaw na wiiki kai, n’a muɗaŋa buri mu miɗiŋki paŋ ɗa, ki ɗa ɵiniŋ kaalai.

²²Tiyana ɗa, yimiŋ midiki pɗem, tiki aga ki mri mini gaw, miɗi wiyamai zaw mini vlak. War hlai paŋ na tiki ki diri e simni warni aŋ zak ɗa.