Read Mousgoum Yeremiyas 43 Bible Online

Yeremiyas 43 - Mousgoum bible

Yeremiyas 43

¹Won hlai na Yeremiyas a vada gaini seŋ n’a miɗiŋɗi wiiɗi ɗai paŋ, gaini seŋ paŋ n’Epiɗ-ɗai Alaw na wiiɗi a miɗiŋni buri a miɗiŋɗi ɗa.

²Azariya n’ahini Hozaya, gaini Yohanan n’ahini Kareya gaiɗi na hormo warɗi kai, gaiɗi nagai n’e kûli siɗi ɗa, e miɗini wiini Yeremiyas ɓa: Na a muɗa na ɗa a eles, Epiɗ-ɗai Alaw na wiiyi a ɵunukusi aŋ miɗiyi ɓa: Ki hili war Egipte, ki simni woni aŋ zak kai ɗa kai.

³Amma a zuku puku aŋ ziyi meefeŋ na ɗa a Baruk n’ahini Neriya, a firiya a siyi tiɗi ɗai na Babilon aŋ fiɗiyi edi, ɵa kai ɗa a kiyi edi war babilon lai.

⁴Yohanan n’ahini Kareya gaiɗi abakaiɗi askarai paŋ, gaiɗi ɗai paŋ e ɵini miɗi na wiini EPIƊ-ƊAI n’a miɗiŋɗi ɓa e simni midini afti na Yuda ɗa, kai.

⁵Nɵa, Yohanan n’ahini Kareya gaiɗi abakaiɗi askarai paŋ, e miliɗi ɗai na Yuda n’ehini, nagai n’e wiyisi edi par midini afti paŋ, n’e ɵiriɗi edi woni aŋ simni midini afti na Yuda.

⁶Maɵagai gaiɗi falakai gaiɗi aliyagoi, gaiɗi alini pai na falakai, nagai paŋ na Nebuzaradan abaiɗi ɗai zi gɗam a hiniɗi war tini Gedaliya na tiyni Sefar, - gaini ɗif na mini Alaw Yeremiyas gaini Baruk n’ahini Neriya.

⁷E hili war Egipte, - e ɵini mini EPIƊ-ƊAI kai, cû war Tapnes.

⁸EPIƊ-ƊAI a miɗini seŋ wiini Yeremiyas war Tapnes, a miɗini ɓa:

⁹Ku mula ali-fuŋ n’abakai yaw, ku ŋoyaŋ karɗi Yudiyakai amai midiɗi dilimi n’e zi midiɗi gaini afti, na te na mini magala na wiini pai par war Tapnes, ku paŋazumai pini afti ɗa.

¹⁰Ku mɗiɗi ɓa: Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: Mu na ɵina pini Nebukatnezar pai na Babilon na ɗifŋa ɗa, aga mu tikiti paramaini zi pai amai midini ali-fuŋ na ku ŋoyaŋ ɗa, aga a bara tapis na wiini midini lai.

¹¹Aga a halasi a tûrliti Egipte amai, ni n’a na buri mri ɗa aga a mra, n’a na burini ki n’edi aŋ bege ɗa, aga a ka edi aŋ bege, n’a na buri gaw ɗa, a mra mini gaw lai.

¹²Aga mu ɵa afu pini dalamai na wiini alawai n’Egipte, aga a yaŋ edi, aga a kiɗi edi aŋ bege, aga a mula derɗi ktaiya ktaiya kafa, maini ɗif zi giɗimi n’a vara teŋɗe sini sapani par nɵa, asakal par a hala sek gaini hangalni.

¹³Aga a haɗa ali-fuŋ z'alaw na Bet-Semes war Egipte azumai. Aga a ɵa afu pini dalamai na wiini alawai n’Egipte ɗa lai.