Read Mousgoum Yeremiyas 44 Bible Online

Yeremiyas 44 - Mousgoum bible

Yeremiyas 44

¹EPIƊ-ƊAI a miɗini seŋ wiini Yeremiyas, buri a miɗiŋɗi wiiɗi Yudiyakai n’e ɗa war Egipte, war Migdol, war Tapnes, war Nof gaiɗi na midini afti na Patros. Nɵa Yeremiyas a miɗiɗ ɓa:

²Epiɗ-ɗai Alaw zi Spak paŋ Alaw na wiiɗi Izrayel a na muɗa maini nɵa: Tiki ki tili gir paŋ na mu kaŋsi midiɗi Yeruzalem gaini fuŋ n’abakai na Yuda paŋ lai, girna a hina aŋ greŋ, ɗif warni kir kaalai,

³a za nɵa burini meefeŋ na ɗai e ziŋ, buri e ɓilkitaŋa agula, won hlai n’e hili aŋ yi wazagai zi ɗûgûdi zi lûgûzi wiini alawai zamai, aŋ zi ɵeŋni alawai zamai n’e siɗiŋ kai, nagai kaalai, tiki kaalai tamaiki kaalai.

⁴Mu ɵiniɗiɗi ɗaiŋa, ɗai na min Alaw siki, mu ɵiniɗiɗi kureɗ aŋ miɗiki ɓa: ki zi barka, ki zi wazagai na haharai na mu daraŋ kai hanɗa kai.

⁵Amma e ɵinima kai e zigi ɵimaɗi a kai, e hini mefeŋ n’e ɗa zi ɗa edi kai, wazagai zi ɗûgûdi zi lûgûzi n’e yiŋ aŋ ɓaka wiini alawai na zamai ɗa e hiniŋ edi kaalai.

⁶Nɵa mu hinasi suwarŋa gaini hiyŋa, a ya fuŋ n’abakai na Yuda gaini futi a Yeruzalem paŋ edi maini afu nɵa, tiyana a bunda aŋ greŋ gani hlai na kadai su, maini na mu ɗuma tuluŋmu girna na ɗa ɵa.

⁷Tiyana, Epiɗ-ɗai Alaw zi Spak paŋ, Alaw na wiiɗi Izrayel a na muɗa maini nɵa: Ki ki meefeŋ n’abai nɵa midiki dama buri maɗa? Ki diri ki vidiɗi ɗai na maɵagai, falakai, aliyagoi gaiɗi akoɗokokai lai edi war Yuda par buri maɗa? Ki firyi ɓa kta maa a hina piki kai ɗi?

⁸Tiki ki ɓilkitiŋa agula gaini sda na ki ziŋ gaini tiki, won hlai na ki yi wazagai zi ɗûgûdi zi lûgûzi wiini alawai na zamai war Egipte, midini afti na ki hilisi ki simni woni aŋ zak. Ki firyi ɓa ki vidi wiiki edi, ki bindi aŋ wala zi tusa, zi siyer lai burini pinziba na midini afti paŋ ɗi?

⁹Meefeŋ na wiiɗi tamaiki, na wiiɗi paakai na Yuda gaini na wiiɗi falakaiɗi, na wiiki tiki dama gaini na wiiɗi falakaiki, meefeŋ n’a za midini afti na Yuda paŋ gaini na war futi na Yeruzalem paŋ lai ɗa midiki a wula gaini cikeŋ ɗi?

¹⁰Haa girna, agulɗi te haɗasi kai, hormo ktai warɗi kai, e zi pin gadai zi ɗû gaini gadai zi ɗiyi na mu siŋki wiiki tiki gaiɗi tamaiki kai.

¹¹Buri hanɗa Epiɗ-ɗai Alaw zi Spak paŋ Alaw na wiiɗi Izrayel a na muɗa maini nɵa: Mu rga wara aŋ ziki meefeŋ aŋ vidiki edi tiki ɗai na Yuda paŋ.

¹²Aga mu ziɗi gir wiiɗi ɗai na Yuda n’e hini karɗi, n’e tikiŋ miɗi ɓa e hili e simni aŋ zak war Egipte ɗa, aga e vidi edi war Egipte, e mri min gaw, gaiɗi wiyamai, aga e vidi edi kafa, siɗi nagogoi par haa siɗi n’abakai, aga e mri min gaw gaiɗi wiyamai, aga e bindi aŋ wala zi hi miy, aŋ wala zi vidi gdaŋni ɗif, zi tusa gani zi tirki.

¹³Aga mu ziɗi gr wiiɗi nagai n’e ɗa war Egipte maini na mu zaŋ siɗi nagai n’e ɗika war Yeruzalem ɗa nɵa gaini gaw, gaiɗi wiyaai gaini vlak lai.

¹⁴Ktai n’aga pra edi, zaw n’aga hina karni piɗi ɗai na Yuda n’e hini n’ehili aŋ zak midini afti n’Egipte, gaini hiini na ɓa aga e wiyisi midini afti na Yuda pra aŋ kai; buri ɓa aga e wiyisi woni par kai, sai ɗai ktai ktai kadai.

¹⁵Maɵagai paŋ n’e siɗi ɓa falakaiɗi e ɗa yi wazagai zi ɗûgûdi zi lûgûzi wiini alawai na zamai gaiɗi falakai paŋ n’e diŋgisi viya gaiɗi ɗai paŋ lai n’e simni war Egipte, war Patros e wiyini seŋ wiini Yeremiyas:

¹⁶Mi diri mi ɵini seŋ na ku miɗiŋyi war yikini EPIƊ-ƊAI ɗa kai.

¹⁷Tiyi aga mi zi ɗa a wala na mi zi ha midini ɗa: Aga mi yi wazagai zi ɗûgûdi zi lûgûzi aŋ ɓaka wiiɗi pa na muni na war hlai n’amai, aga mi mi vin azumai aŋ ɓaka lai, maini a mi ɗika mi ziŋ ɗa nɵa, tiyi gaiɗi tamaiyi, paakaiyi gaiɗi abakaiyi, aha war fuŋ n’abakai na Yuda gaini futi na Yeruzalem lai nɵa. War hlai ni ɗa, simi a ɗukliyi kai, mi ɗi ka war ɵeɗ, mi siɗi gir kaalai.

¹⁸Amma sin mefeŋ na mi hini wazagai zi ɗûgûdi zi lûgûzi na mi yiŋ aŋ ɓaka wiiɗi pai na muni na war hlai n’amai ɗa par, mi ɗa mi vin azumai kir kaalai ɗa, mi hini wala ktai maa tiyi kir kai, mi vidi na ɗa edi min gaw gaiɗi wiyamai.

¹⁹Won hlai na mi yi wazagai zi ɗûgûdi zi lûgûzi aŋ ɓaka wiiɗi pai na muni na war hlai n’amai, na mi zi gato n’a siɗa maiɗi ɵa, na mi mi vin azumai aŋ ɓaka buriɗi lai ɗa, mi ziŋ na ɗa aŋ bonu gaiɗi mazilagaiyi kai ɗi?

²⁰Nɵa Yeremiyas a wiyiɗi seŋ wiiɗi ɗai paŋ, wiiɗi maɵagai gaiɗi falakai, wiiɗi ɗai paŋ n’e wiyini seŋ maini hanɗa nɵa ɗa ɓa:

²¹A jre, tiki ki ɗika ki yi wazagai zi ɗûgûdi zi lûgûzi war fuŋ n’abakai na Yuda, war futi na Yeruzalem lai, tiki gaiɗi tamaiki, paakaiki gaiɗi abakaiki gaiɗi ɗai zamai na Yuda lai. EPIƊ-ƊAI midini a na a kɵa gaini hanɗa, a wula midini kai.

²²EPIƊ-ƊAI a yima hanɗa sini kir kai, buri sdaki na maafani gaini wazagai a haharai a ki ziŋ ɗa; aftiki a bunda aŋ hlai zi greŋ, aŋ hlai na gai tuuri edi, aŋ wala zi tusa, na ɗai warni kir kai. Ki ɗa tiliŋ gaini arki girna lai.

²³Tiki ki yi wazagai zi ɗûgûdi zi lûgûzi aŋ ɓaka wiini alawai na zamai, ki zi tuwur sin EPIƊ-ƊAI, ki ɵini mini EPIƊ-ƊAI kai ki zi pin gadini zi ɗû gaini gadaini zi ɗiyi kai, Gir hanɗa a cosi midiki na ɗa buri hanɗa. Ki ɗa tiliŋ gaini arki girna lai.

²⁴Yeremiyas a miɗiɗi wiiɗi ɗai gaiɗi falakai paŋ lai maini nɵa: Tiki ɗai na Yuda na ki ɗa war Egipte paŋ, ɵini seŋ n’EPIƊ-ƊAI a na muɗaŋ ɗa:

²⁵Epiɗ-ɗai Alaw zi Spak paŋ, Alaw na wiiɗi Izrayel a na muɗa maini nɵa: Tiki gaiɗi falakaiki, na ki miɗiŋ gani miki ɗa tiki a vaŋ amai lai, miɗi na ki miɗiŋ ɓa: Zlinini ha na mi ziŋ gaini miy ɗa, mi diri mi viŋ amai gaini tiyi, mi diri mi yi wazagai zi ɗûgûdi zi lûgûzi wiiɗi pai na muni na war hlai n’amai, mi miɗi vin azumai aŋ ɓaka lai. Nɵa vi ɵinini ha na wiiki amai, zi na ki miɗi gaini ɗa lai.

²⁶Buri hanɗa, tiki ɗi na Yuda paŋ na ki simni war Egipte, jre jaŋ mu ha wala ma gaini yikiŋa n’abai, a muɗaŋ a EPIƊ-ƊAI. Ɗif na Yuda ktai maa aga a yika yikiŋa war mini kir kai. Midini afti n’Egipte paŋ, ɗif aga a ha wala mini ɓa 'Gaini Epiɗ-ɗai Alaw na karni jaŋ kir kai'.

²⁷Aga mu tika hangala siɗi, aŋ ziɗi pɗem kai, amma aŋ ziɗi meefeŋ. Ɗai na Yuda n’e ɗa war Egipte paŋ aga e vidi edi min gaw, miɗi wiyamai lai, haa e vidi edi kafa.

²⁸Vok n’agwi kadai, na wiiɗi ɗai n’aga e kurɗisi min gaw par aga a waisi war Egipte par aha midini afti na Yuda. Amma ɗai na Yuda na gaini abaiɗi paŋ, nagai n’e hilisi war Egipte aŋ zak paŋ ɗa, aga a yima midiɗi ɓa a va amai ɗa a seŋ na wiya zaw a na wiiɗi ɗi ɗa.

²⁹Aga ki siɗiŋ sin hanɗa: A miɗi na sin EPIƊ-ƊAI par, aga mu ziki gir war hlai hanɗa, kapai a yima midiki ɓa seŋ zi gir na mu muɗaŋ siki ɗa aga a va amai buriki

³⁰EPIƊ-ƊAI a na muɗa maini nɵa: Aga mu sa Faraw Hofra, pai n’Egipte war tiɗi gawni, war tiɗi nagai n’e piyiŋ aŋ fiɗi, maini na mu sa Sedesiyas, pai na Yuda war tini Nebukdnezar, pai na Babilon na gawni n’a naka a payaŋ aŋ fuɗaŋ ɗa nɵa.