Read Mousgoum Yeremiyas 46 Bible Online

Yeremiyas 46 - Mousgoum bible

Yeremiyas 46

¹EPIƊ-ƊAI a miɗini seŋ wiini ɗif na min Alaw Yeremiyas burini afti na zamai zamai maini nɵa:

²Buriɗi Egipte. Buriɗi askarai na wiini Faraw Neko, pai n’Egipte, n’e ɗifu ɵimani ra Öfrata, war Karkemis, na Nebukadnezar pai na Babilon a rɗa amai midiɗi, war buza n’ag'aŋ puɗu na wiini Yoyakim n’ahini Yoziyas pai na Yuda.

³Zizini gamarai n’agogoi gaini n’abakai; Hili min hatam

⁴zizini plasai ɗa min gaw, Tiki ɗai zi diɓiri plasai, yalla hili! Pi bogoraiki midiki, giri min hatam, guri min kawakaiki ɗa, Ki wi safaya siki

⁵Kaai! A za na ɗa a ara zaw! Hunai a yimiɗi yaw, e ɗa wiyi gai duɓaɗi Gaŋglaŋai na wiiɗi ɗa e ɗiyi wuzaɗi gawɗi kir kai. E ɗa pri edi, e rûvi ɗa e tili arɗi duɓaɗi kai Halai paŋ ɗai e ɗa war hunai. -A miɗi na sin EPIƊ-ƊAI par.

⁶Ɗif na kokolai gara maa a kiɗa a pra edi kai, Na gaŋgalaŋ ɗa a kiɗa a mula tiɗi par kaalai. Azumai sek, wulani ra Öfrata, e kiɵiŋi, e kɵi azumai.

⁷Ɗif n’a na halasi aŋ hitima gaini spak maini ra Nil n’a tika ɵa na ɗa a siya ɗa? Na yemni ɗa a huŋva edi maini ra n’abakai nɵa na ɗa a siya ɗa?

⁸Na te tikasi maini ra Nil ɵa na ɗa te Egipte, Yemɗi a huŋva edi maini ra n’abakai ɵa na ɗa te na. Te muɗa gai warɗi ɓa: Mu hala aŋ hitima na ɗa aga mu tika afti, mu vada fuŋ n’abakai gaiɗi ɗai na warni lai edi.

⁹Ɗai zi plasai yalla hili Ɗai zi saret zi gaw, ki ɓirti gai gdaŋki A zuva ɓa gaŋgalaŋai e niyisi anene Ɗai na Etiopiya par gaiɗi na Put par lai n’e siɗi hatam na gaini gamarai n’agogoi Gaiɗi ɗai na Lud par n’e siɗi hatam na gaini ɓaraw ɗa.

¹⁰Mefeŋ hanɗa a mefeŋ na wiini Epiɗ-ɗai Alaw zi Spak paŋ A mefeŋ na vurga meefeŋ na wiiɗi ɗai warni, a mefeŋ n’aga a vurga meefeŋ na wiiɗi gawni. Kaɵkar aga a luma ɗai, aga a va aga a ciina gaini felɗi lai. Buri hanɗa a ɓaka na wiini Epiɗ-ɗai Alaw si Spak paŋ, midini afti na war gal n’azumai sek, ɵimani ra Öfrata

¹¹Egipte ahaya na juvi, ku kaya suku gaini kurgum na viya viya kai A kiɗa a zuula wurukku kai Marya ku hala war Galaad aŋ paya emel zi zuuli wuruk ɗa.

¹²Afti paŋ a tala siyerku ya Buri ɗuwal na muku ɗa a va afti ta Gaŋgalaŋ ktai a kɵa sin gaŋgalaŋ na maini Gai sulogaiɗi e yiki azumai.

¹³Seŋ n’EPIƊ-ƊAI a miɗiŋni wiini ɗif na min Alaw Yeremiyas, midini gizini Nebukadnezar, pai na Babilon, n’aga a halasi aŋ cikiti Egipte a na maini nɵa:

¹⁴Si labar hanɗa aha war Egipte Ki miɗiŋɗi wiiɗi ɗai na Migdol Ki miɗiŋɗi wiiɗi ɗai na Nof gaiɗi na Tapnes Ki miɗiɗi ɓa: Ki ɗiyi pɗem, ki zizini siki Buri gaw a na vada ɗai na ɵimaki ɗa.

¹⁵Apis alaw na wiiku ɗa a pra e di maɵa pra? Gariku ɗa, a kiɗa a ɗiya wuzani EPIƊ-ƊAI kir kai ɗa koo!

¹⁶A kiɵiŋa vok ɗai viya E yiki siɗi marɗi e miɗi: Fukumu amai, wiyumu aha siɗi ɗaimu ɗa, midini afti na tamaimu e wi woni Edi gai gai sin gaw zi vidi ɗai ɗa par.

¹⁷Amma Faraw, pai n’Egipte ɗa aga ki yikiŋ ɓa "suura na viya kadai meere"

¹⁸Gaya ta zaŋ a miɗi na sini Pai, na yikini ɓa: EPIƊ-ƊAI zi spak paŋ par, gawki a na halasi jre jre maiɗi huwuŋ Tabor na te na ɗa ɵa, maiɗi huwuŋ Karmel na te na amai par amai par midini yem-ra n’abai ɗa ɵa,

¹⁹Zizini wazagaiki aŋ hili edi mdini afti na zamai, tiki ɗai na war Egipte a juvi, buri ɓa fuŋ n’abai a Nof aga a tuura edi, aga a ya edi, ɗif aga a hina warɗi kir kai.

²⁰Egipte t'ahi ɵai na juvi Amma amuf ɗa aga a halasi war gal n’azumai par.

²¹Askarai n’e zi sda buri vrak ɗa e ɗa aha warɗi maini ali ɵaaai n’e likiŋ nɵa. Paŋ ktai nagai lai e wiyi gai duɓaɗi, Epri edi aŋ bonu gaiɗi marɗi hanɗa paŋ. E kiɗi e ɗiyi kai Buri mefeŋ na wiini ɓilki n’edi na wiiɗi a na halasi midiɗi, Sarti n’aga mu ziɗi gir warni ɗa.

²²Aga te diila mini wala meefeŋ ɵa, buri gawɗi n’e hilisi midiɗi e ɗi vokɗi askarai n’abai e hilisi ɗa gaini beŋel Maiɗi ɗai zi bili luwuŋ nɵa.

²³Aga e bili jur na wiiɗi azumai -A miɗi na sini EPIƊ-ƊAI par- koo ɓa a na hicik tekeɗeɗi; Buri ɓa viyaɗi ɗa a suwa ayuwi E kiɗi e pɵi kai.

²⁴Egipte na juvi siyer aga a dûgûti te sa war tiɗi ɗai na war gal n’azumai par ta.

²⁵Epiɗ-ɗai Alaw zi spak paŋ, Alaw na wiiɗi Izrayel a na muɗa maini nɵa: Ag mu zini gi wiini Ammon na No par, wiini Faraw, wiiɗi Egipte, wiini alawaiɗi, gaiɗi paakaiɗi, wiini Faaw gaiɗ nagai n’e pɵi midini lai.

²⁶Aga mu siɗi war tiɗi nagai n’e piyi aŋ fiɗiɗi ɗa: war tini Nebuadnezar, pai na Babilon, gaiɗi ɗai n’ahani ɗa. Asakal hanɗa par, Egipte aga te waya warni eziɗi na ɗipar ɗa -A miɗi na sini EPIƊ-ƊAI par.

²⁷Amma tuku Yakob na ɗifŋa, ku huna kai Izrayel, ku hina hunai a yimuku kai Buri aga mu kurɗukusi edi midini afti na gaigai par mu kurɗiɗisi pinzibaku edi midin afti n’e ɗa woni aŋ bege par; Yakob aga a waisi, aga a sumna ɵeɗ, gai haŋgalni lai Ɗif n’aga a huwyaŋ aŋ kir kai.

²⁸Tuku Yakob na ɗifŋa, ku huna kai -A miɗi na sini EPIƊ-ƊAI par- buri mu na gaiku. Aga mu vidiɗi pinziba na zamai na mu ɵiriki edi arbaɗi paŋ ɗa edi, Amma tiki ɗa, aga mu vidiki edi kai; Gai hanɗa paŋ, aga mu gidiki maini n’a na ɗa ɵa meefeŋki n’a na ɗa aga mu ara midini kai.