Read Mousgoum Yeremiyas 47 Bible Online

Yeremiyas 47 - Mousgoum bible

Yeremiyas 47

¹Seŋ n’EPIƊ-ƊAI a miɗiŋi wiini Yeremiyas ɗif na min Alaw, buriɗi Filistrekai, wuzani hlai na Faraw, pai n’Egipte a cikiti Gaza ɗa a na maini nɵa:

²EPIƊ-ƊAI a na muɗa maini nɵa: War gal n’azumai par yem a na riyasi amai a bunda aŋ yem zi ki na gdaŋ gara a ka midini afti paŋ, midini wazagai na warni paŋ lai, midini fuŋ n’abai gaiɗi ɗai na warni paŋ lai. Ɗai e ɗuli, e ɵi hama siɗi ɗai na midin afti ɗa paŋ,

³ezini plasai ɗa a suura maini faŋ n’a ɓra nɵa saretai zi gaw a vuguma, ezini n’a guna ɗa a suura lai. Nɵa, tamai, gdaŋɗi a vada edi, ɗif a ɵa arni duɓani aŋ tala ahini kir kai.

⁴Buri mefeŋ n’e vidi aftiɗi Filistrekai edi warni a na hlasi n’e vidiɗi nagai n’e kiɗi e luwi ɗuwal na war Tirus gaiɗi Sidon par edi; Buri EPIƊ-ƊAI a dara a vidiɗi Filistrekai edi gaiɗi nagai n’e hini karɗi piɗi ɗai na midiɗi wudi na Kaftor.

⁵Gaza te hina edi kadai su war Askelon, mini ɗif a muɗa kir kai, Pini aftiɗi na plas n’a hina lai. Aga ki ɓisi siki ɵa haa kaswata ɗa?

⁶Tiki ki miɗi ɓa: Gir gara kaɵkar na wiini EPIƊ-ƊAI, kapai suku ɵa haa kaswata ɗa, na suku amla kai ɗa? Waia amlai war sutoku Sumna hiyak, ku muɗa kir kai.

⁷Kaskar kanɗa sini aga amla maɵa maɵa ɗa? A sini futi buri a hala Askelon lai, wulani yem-ra n’abai lai ɗa EPIƊ-ƊAI Hanɗa a hlai n’a siŋkiŋni ɗa.