Read Mousgoum Yeremiyas 48 Bible Online

Yeremiyas 48 - Mousgoum bible

Yeremiyas 48

¹Buriɗi Mowab, Epiɗ-ɗai Alaw zi Spak paŋ a na muɗa maini nɵa: Haw gara buriɗi Nebo! Te tuura kok! Kiryataiim te gaini siyer, e tikiti li! Misgab siyer a yimiti li, t'aŋ war hunai n’abai.

²Kol nawiiɗi Mowab ɗa aŋ kir kai War Hesbon, ɗai rgi hiini na meefeŋ warɗi sini fuŋ n’abai hanɗa, e miɗi: Hulumu, mu vudutumu edi arbaɗi ɗai par Tuku Madmen lai, aga ku tuura edi, Gaw aga a yimuku.

³War Horonaiim par ɗuwal a na wasi, Ɓilki n’edi gaini meefeŋ n’abai gara!

⁴Mowab te tuura li edi Aliɗi e ɗa tuwi tuwi n’abai gara.

⁵Buri tuwiɗi a na wa, won hlai n’e ɗa tuwi hlai n’e niyi amai woni a Luhit sek ɗa Won hlai n’e niyi azumai warni na Horonaiim ɗa, gawɗi nagai n’e ɗûûli n’e ɗa war huwyi ɗa e ɗa ɗûûli lai.

⁶Pri edi, ki siki, Bindi maini luwuŋ Genevriye n’edi wa basga na kaɗataŋ nɵa!

⁷Buri ɓa ki pɵi midini sda ki ziŋ gaini godaiki lai Tuku lai, ɗai a ga e tukuku. Alaw Kemos na wiiki lai aga a hala edi midini afti zamai Gaiɗi paakai ɓaka na wiini gaiɗi bakai na wiini lai aŋ bonu piɗi marɗi.

⁸Ɗif n’a tuura hlai ɗa aga a niya aha war fuŋ n’abakai ktai ktai paŋ, Fuŋ n’abai ktai n’aga a mula tini par aŋ kai Huduk aga a tuura edi, Abuɗuk aga a ɓilka edi lai, Hanɗa a wala n’EPIƊ-ƊAI a muɗaŋ ɗa.

⁹Piyiɗi baada graŋɗi Mowab ta, Kapai te ɗufla te ka siɗi gaini, Fuŋɗi n’abakai aga a tuura edi, Ɗai aga hini warni kir kai.

¹⁰Haw gara buri ni n’a za sda na wiini EPIƊ-ƊAI gaini faalai warni, haw gara buri ni na ɗala kaskar na wiini aŋ titima fel lai!

¹¹Mowab te nafu war ɵeɗ haa war agwiiɗi par, E kiti ka edi midini afti zamai kai. Te nafu gai hangalɗi, maini vin n’a fana war wala yaw, na hirɗini a tika azumai pini nɵa. E bidiŋ ka edi war wala zamai duk kai. Buri zila, cini n’a ca pɗem a bunda kai, lugosni a bunda kaalai.

¹²Buri nɵa, mefeŋ aga halasi, - A miɗi na sin EPIƊ-ƊAI par - aga mu ɵinasi ɗai midiɗi buri e bindi edi war wala zamai maini vin nɵa. Aga e mi vin n’aŋ war grakaini paŋ edi, e liɓi kene kene na sini edi lai.

¹³Mowab siyer aga a yimiɗi burini Kemos, maini n’aliɗi Izrayel siyer a yimiɗi burini Bet-El n’e pɵi midini ɗa nɵa.

¹⁴Ɗai na Mowab, tiki ki siɗi aŋ miɗi ɓa: Tiyi miɗi gaŋgalaŋai, mi ɗi vokɗi askarai n’agulɗi a huna kai ɗa maɵa maɵa ɗa?

¹⁵Mowab te tuura kok, Fuŋɗi n’abakai a na ya edi Gawlakai ngai futiɗi futiɗi ɗa, e ɗa kiɗi aŋ fiɗi edi lai. -A miɗi na sin pai na yikini ɓa EPIƊ-ƊAI zi Spak paŋ par.

¹⁶Ɓilki n’edi na wiiɗi Mowab ɗa a ŋasi gobi, Gir na wiiɗi aga a yafasi haa kai.

¹⁷Tuwi burini, Tiki na ɵimani paŋ, Tiki paŋ na ki siɗi yikini ɗa! Ki zilbi siki lai ɓa: A za ɵa maɵa maɵa ɗa Spak n’abai hanɗa a vada edi ɵa ɗa? Pai zi spak na mai hanɗa ɵa te vada edi ɗa?

¹⁸Ɗai na Dibon, niyisi azumai midiɗi paramaiki zi kol par Simni azumai arni selte. Buri ni n’a tuuriti Mowab ɗa aga a hitumuku tuku lai. Aga a tuura hlai zi ŋoyai na wiiki edi lai.

¹⁹Tiki ɗai na Arower, ɗiyi ɵimaɗi futi, tili wala n’a na vuga ɗa! Ki zilbiɗi nagai n’e prisi edi, n’e hini karɗi lai ɓa: A za ɗa a maɗa?

²⁰Mowab te gaini siyer, gdaŋɗi a ɗiya amai kai Ɗûûli, ciriyi! Miɗi labar hanɗa wulani ra Arnon ɓa Mowab te tuura li.

²¹Sariya na wiini EPIƊ-ƊAI te halasi li midini afti na midini abuɗuk, midiɗi Holoŋ, midiɗi Yatsa, midiɗi Mefaat,

²²Midiɗi Dibon, midiɗi Nebo, midiɗi Bet-Diblataiim,

²³midiɗi Kiryataiim, midiɗi Bet-Gamul, mdiɗi Bet -Meyon,

²⁴midiɗi Keriyot, midiɗi Botsra, midini fuŋ n’abakai na midini afti na Mowab ɗa paŋ n’a na gobi gaini na gai gai ɗa paŋ lai.

²⁵Mowab gdaŋɗi a vada vat, spakɗi a kɵa su A miɗi na sin EPIƊ-ƊAI par.

²⁶Ciiniŋ gaini vin, buri a faka amai sini EPIƊ-ƊAI. Mowab te bubula arni huŋvi na wiiɗi haw, na lai te bunda aŋ wala na ɗai e riyi pini haw!

²⁷Mowab, tuku ku naka ku riya gai riyi piɗi Izrayel kai ɗi? Ɗai na Izrayel e ɗi mahalakai ɗi? Na ku faka li aŋ muɗa siɗi paŋ ɗa ku kikiya muduku gai kikiyi ɗa?

²⁸Ɗai na Mowab, yimi siki edi war fuŋ n’abakai par, simni amai midini huwaŋai Zi siki maini dere n’a za gutni amai sini waŋ na hulum nɵa.

²⁹Tiyi mi ɵini labarni kûlûni-si na wiiɗi Mowab ɗa yaŋ -A kûlûni-si zi jam kai- Jaaɗi gaini ɗif kai, te kola siɗi gara! Te tala siɗi te kiɗa ta, hormo warɗi kaalai

³⁰Ta mu sɗa hiiniɗi ya -A miɗi na sini EPIƊ-ƊAI par - Seŋ na te muɗaŋ ɗa a na gomoŋ kadai, sdaɗi na te zaŋ ɗa a na nava kaalai.

³¹Buri nɵa, mu ciriya piɗi Mowab. Mu ɗuula piɗi Mowab gaiɗi abaiɗi paŋ, Mu ɵa hama buriɗi ɗai na Kir-Heres lai.

³²Luwuŋ zi vin na Sibma, mu tuwa muduku a suwa na yazer a tuwuku ɗa Graŋku a naka mogokai, a wa haa edi duɓani yem-ra zi manda par a co haa sin yem-ra n’abai zi manda na wiini Yazer ɗa ta; Amma ni na tuura wazagai ɗa a tuura ali- seyem na naiya n’e ruwiŋ avut ɗa gaini n’a hina asakal ɗa lai.

³³Firyi n’abai na warni zardeŋ zi vin ɗa aŋ kir kai, midini afti na Mowab ɗe aŋ kaalai! vin na warni grak zi vin aŋ kir kai Ɗai n’e cipiɗi vin, gaini ɗuwal zi friyi, e ɗa kir kai! Ɗuwalɗi zi firyi na wiini cipiɗini ali luwuŋ zi vin ɗa aŋ ɗiya zaw!

³⁴Ɗuwal na wiiɗi ɗai na Hesbon par ɗa a wa haa a Eleyale. Wulaɗi a wa haa a Yahas, a Sowar par haa a Horonaiim, haa a Eglat-Selisiya lai. Yem na warɗi avai na Nimrim maa a siita amai paŋ.

³⁵Mu dara mu vada gaiɗi ɗai na Mowab ɗa, - a miɗi na sin EPIƊ-ƊAI par-gaiɗi nagai n’e niyi amai midini hlai zi ɓaka aŋ yi wazagai zi ɗûgûdi zi lûgûzi aŋ ɓaka wiini alawai na wiiɗi.

³⁶Agula a tuwa midiɗi Mowab maini algeta nɵa; agula a tuwa midiɗi ɗai na Kir-Heres maini algeta nɵa, buri ɓa der n’e tipiŋ amai ɗa a ba ta.

³⁷Buri ɓa ɗai paŋ e fiɗɗi midiɗi edi, e fiɗɗi miɗigi na miɗi edi lai. E ɓisi graŋɗi ɓas ɓas, e wi sapa zi tuwi siɗi ɗik ɗik lai.

³⁸Amai midini dalam na war Mowab n’e zi midini gaini afti paŋ gaini hlai na ɗai tipi woni ta ta paŋ lai aŋ warni ɗa sai a tuwi, buri mu tuuriti Mowab edi maini wala na ɗif a daraŋ kir kai nɵa -A miɗi na sin EPIƊ-ƊAI par.

³⁹Kaai! Mowab hunai a yimiti ɵa maɵa maɵaɗa? Ɗûûli ɓa: Mowab te tika siyer haa te pra edi ɵa maɵa maɵa? Mowab te bunda aŋ wala na ɗai e riyi pini, zi mili hunai lai buriɗi nagai na ɵimaɗi ɵa maɵa maɵa ɗa?

⁴⁰Buri EPIƊ-ƊAI a na muɗa maini nɵa: Gawɗi aga a yorosi midiɗi maini muka nɵa, aga a wa tini edi midiɗi Mowab paŋ.

⁴¹E tikiti Keriyot li hlai zi ŋoyai ɗa e miliŋ li War mefeŋ ni ɗa, askarai na Mowab ɗa, hunai n’abai aga a yimiɗi maiɗi muni na te dara te poka nɵa.

⁴²Mowab aga te tuura edi, aga e pɵi aŋ ɗai kir kai, buri e fiki amai sin EPIƊ-ƊAI.

⁴³Hunai n’abai, gaini waŋ, gaini azaw aga a ɓurwa gaiki kai, tiki ɗai na Mowab! -A miɗi na sin EPIƊ-ƊAI par.

⁴⁴Ni n’aga a prasi edi aŋ hunai, aga a kɵa war waŋ, n’a niyasi azumai pa war waŋ ɗa, azaw aga a yimaŋ; Buri mu na kasi midiɗi Mowab, Buza n’aga mu ziɗi gir woni, -A miɗi na sin EPIƊ-ƊAI par.

⁴⁵Nagai n’e prisi edi, na gdaŋ warɗi kir kai ɗa, e ɗiyi pin sezeɗi Hesbon, Buri afu a niyasi edi a Hesbon par, alesni afu a niyasi aha war dalamni pai Sihon par lai; Afu hanɗa a yasi edi war hagaɗi Mowab na wiiɗi ɗai zi kaarai ɗa par haa aha warɗi ta.

⁴⁶Haw gara buriku tuku Mowab Pinziba na wiini alaw Kemos ɗa a ba ta! Buri ɓa aliku na maɵagai gaiɗi na falakai aga e kiɗi edi aŋ bege.

⁴⁷Amma wuzamu sek ɗa, mefeŋ ktai aga mu wiyiti Mowab war eziɗi n’avut ɗa, -A miɗi na sin EPIƊ-ƊAI par Hanɗa te sariya na te ɗukla midiɗi Mowab ɗa.