Read Mousgoum Yeremiyas 49 Bible Online

Yeremiyas 49 - Mousgoum bible

Yeremiyas 49

¹Siɗi Ammonitekai. EPIƊ-ƊAI a na muɗa maini nɵa: Izrayel ɗa aliɗi e ɗi kai ɗi? Ɗai n’e mili bulum na wiiɗi e ɗi kai ɗi? Pai na wiiɗi a tikiti Gad aŋ wiini buri maɗa? Ɗaini e simni war fuŋɗi n’abakai buri ma ɗa?

²Buri nɵa, mefeŋ a na gizi, -A miɗi na sin EPIƊ-ƊAI par- war mefeŋ ni ɗa, aga mu hina suura na wiini gaw a wa aha war Raba, kapikal na wiiɗi Ammonitekai, Aga te bunda aŋ hlai zi deeɓer, Fuŋ n’abakai n’aŋ piɗi paŋ aga a ya edi gaini afu Nɵa Irzaiel aga te virmiɗi nagai n’e virmiti A muɗaŋ a EPIƊ-ƊAI.

³Hesbon ciriyi, buri Ai te tuura edi kok, Tiki fuŋ n’abakai na ɵimaɗi Raba, ɗûûli! Wi sapa zi tuwi siki! ɵi hama siki! Rûvi war gal paŋ, amai midini ɵaga! Buri alaw Milkom a na hala edi midini afti zamai! gaiɗi paakiɗi zi ɓaka, gaiɗi abakaiɗi lai.

⁴Ku kola suku gaini hodokaiku buri maɗa? hudukku a na vada edi, tuku Raba na hriŋi, na ku pɵa midini derku, Na ku muɗa gai warku ɓa: N'a kiɗa aŋ fakasi amai sa ɗa a siya ɗa?

⁵Aga mu kasi Hunai n’abai muduku -A miɗi na sini EPIƊ-ƊAI zi Spak paŋ par- Aga a halasi siɗi nagai n’e gunuku azumai ɗa paŋ par, aga e ɵiriki edi, ɗif paŋ a lawa wuzani sek, Ɗif aga a tipiɗi nagai n’e pri edi amai kai.

⁶Amma asakal hanɗa par, aga mu wiyiɗi Ammoniteki war eziɗi n’avut ɗa -A miɗi na sin EPIƊ-ƊAI par.

⁷Siɗi Edom. EPIƊ-ƊAI zi Spak paŋ a na muɗa maini nɵa: Aha war Teman ɗa ɗai na yalakai e ɗa kir kai ɗi? Na zi siɗi ɗa, yelɗi a ɗiya ta ɗi? Yelɗi ɗa a hofa ta ɗi?

⁸Pri edi, wiyi duɓaki, ŋûyi siki azumai warni waŋ, Tiki ɗai na Dedan! Buri mu na kasi ɓilki n’edi midini Ezaw A sarti n’aga mu siŋkini gir arni woni.

⁹Na ɓa ɗai zi ruwi ali-luwuŋ zi vin e niyisi li ahaku ɗa, aga e hini smul ktai maa amai kai Na ɓa mahalakai e niyisi li ahaku duvuk ɗa, aga e tuuri wazagai na jaaɗi aŋ sini ɗa lai.

¹⁰Buri ɓa ta mu koɵa Ezaw edi koɵ, hlaini zi ŋoyai ɗa, mu siŋkaŋ edi papɗak, a kiɗa a ŋoya kir kai Pinzibani, tawalakaini gaiɗi nagai na ɵimaɗi lai ɗai aga e virmiɗi Aga a vada edi.

¹¹Aliku na huyokai ɗa, ku huwya suku buriɗi kai aga mu giɗimiɗi mu ta falakai na wiiku na war greŋ ɗa, e kiɗi e pɵi mada lai!

¹²Buri EPIƊ-ƊAI na muɗa maini nɵa: Nagai na sariya te kiɗa te ko midiɗi aŋ ci kup na wiini hiyŋa kai ɗa, e ci hanɗa, tuku aga ku mula edi mini par ɗi? Aga ku mula edi mini par kai! Aga ku caŋ gaini dewele.

¹³Buri mu ha wala ma gaya ta jaŋ- A miɗi na sini EPIƊ-ƊAI par-Bosra na kapitalku aga te bunda aŋ hlai na hi-hir, aŋ hlai zi tirki, aŋ greŋ, aŋ hlai zi tuusa lai. Fuŋ n’abakai n’aŋ piɗi paŋ aga a hina aŋ greŋ ɵa haa kureɗ.

¹⁴Mu ɵinasi labar ktai min EPIƊ-ƊAI par a ɵinaɗi ɵeŋ ktai edi arbaɗi pinzibaɗi ɗai, aŋ miɗiɗi: Tipisi amai, hilisi midiɗi Edom! Fikisi amai, hitimiti.

¹⁵Buri mu bunduku aŋ agwi arbaɗi pinziba paŋ, Ɗai paŋ e miisuku paŋ lai.

¹⁶Kûlûni-si na wiiku, gaini zilini-si n’amai na wiiku a na buku edi Tuku na ku sumna war waŋ na sin huwaŋai, na ku zizina simniku amai midini boŋorai, Koo ɓa ku zizina gutku amai, gigai maini mika nɵa tekeɗeɗi, woni patr aga mu hugukusi azumai. -A miɗi na sin EPIƊ-ƊAI par.

¹⁷Edom aga te tuura edi; nagai paŋ n’e vigi ɵimaɗi ɗaw, gdanɗi aga a vada edi, aga e yibi huwit, burini wazagai n’a tuura edi ɗa.

¹⁸Maini n’a za war ɓilki n’edi na wiiɗi Sodoma gaiɗi Gomora nɵa, gaini fuŋ n’abakai na ɵimani paŋ lai- a muɗaŋ a EPIƊ-ƊAI-! Ɗif aga a za fuŋ warɗi kir kai, ɗif a sumna warɗi kaalai.

¹⁹Maini gurnai n’a niyasi edi arni luwuŋ na hicik na wulani Yurdan par, n’a hala war hlai na wazagai warni viya nɵa, safai n’agwi, aga mu ɵiriɗi ɗai na Edom edi gai gai siɗi par. Aga mu tika ni na mu varaŋ amai midiɗi. Ɗif na maya ɵa ɗa a siya ɗa? Ɗif n’aga a zilba ma ɗa a siya ɗa? Ɗif zi giɗimi n’a kiɗa a ɗiya ma ɗa a siya ɗa?

²⁰Buri hanɗa ɵini wala n’EPIƊ-ƊAI a rgaŋ warni buriɗi Edom Gaini wala n’a hiinaŋ buri a zaŋ siɗi ɗai na Teman. Aga e miliɗi fakat fakat maini alini farai na wr fara nɵa aga e tuuri hlaiɗi edi fakat fakat lai.

²¹Buri vugumni kɵiɗi ɗa afti aga a jiriya ɗuuwal na miɗi aga a wa haa agoɗɗom war yem-ra n’abai zi vayai.

²²Aga a ɗufla amai, a yorasi azumai midini walani zi simi lai maini muka nɵa, a wa graŋni edi midiɗi Bosra, war mefeŋ ni ɗa, gdaŋɗi! askarai na Edom aga a vada edi, maiɗi muni na te na poko nɵa.

²³Buriɗi Damas. Hamat gaiɗi Arpad e ɗa war Siyer, buri e ɵini labar na meefeŋ: Gadaŋɗi a vada edi. A dûrgûzi n’abai na war yem-ra n’abai, n’a kiɗa a tika azumai kai!

²⁴Ɗai na Damas ɗa gdaŋ warɗi kir kai, e ɗa zizini siɗi aŋ pri edi, Etiki piɗi e jiriyi. Gir gaini ŋiiba a yimiɗi maiɗi muni na te na poko nɵa.

²⁵Fuŋ n’abai n’a saŋa kol, n’a saŋa firiyi lai hanɗa, a siɗa aŋ hina edi mai haŋɗa ɵa maɵa maɵa ɗa?

²⁶Buri ɓa, aliɗi na galakai e mri war hlai na ɗai e tipi woni ta ta ɗa, askaraiɗi paŋ e mri kafa lai war mefeŋ hanɗa. -A miɗi na sin EPIƊ-ƊAI zi Spak paŋ par.

²⁷Aga mu ɵa afu pini ɵaga na Damas; aga a ya dalam na wiini pai Ben-Hadad lai.

²⁸Siɗi Kedar gaini aftiɗi paakai na war Hatsor, na Nebukadnezar, pai na Babilon a rɗa amai midini ɗa. EPIƊ-ƊAI a na muɗa maini nɵa: Fiki amai, hili tiki afti na Kedar! Vidiɗi ɗai na piɗi futi na dawai par edi kafa.

²⁹Ki mili gumuɗi gaini farani faraiɗi ɗa ki mili wazagaiɗi n’e simni pini paŋ, gaini wazaaiɗi n’a na ɗa paŋ gaini ɵiginiɗi paŋ lai Ɗûûli piɗi ɓa: Hunai war gal paŋ par.

³⁰Pri edi, ki siki witaw! ŋûyi siki war waŋ na hulamai na sin huwaŋai tiki ɗai na Hatsor -A miɗi na sin EPIƊ-ƊAI par. Buri Nebukadnezar, pai na Babilon, a rga seŋ aŋ warni siki, a hiina wala ktai midiki ta.

³¹Fiki amai! hili ciki aftiɗi ɗai n’e ɗa gai haŋgalɗi, na huwyi siɗi kai ɗa -A miɗi na sini EPIƊ-ƊAI par. Buri ɓa porte min hlaiɗi kai, kawakai n’e ɵi mini gaini aŋ kaalai. E ɗi na edi kiiɗi ca.

³²Gawɗi aga e virmi ɵiginiɗi ɗa, aga e mili farani faraiɗi na viya lai aŋ der na min gaw; Nagai n’e fiɗiɗi ayir na galaiɗi, aga mu ɵiriɗi edi war koŋni hlai paŋ. Aga mu kasi ɓilki n’edi midiɗi war gal paŋ par -A miɗi na sini EPIƊ-ƊAI par.

³³Hatsor aga te bunda aŋ hlai zi simni na wiini belemke aŋ hlai zi tuuri edi n’a hina ɵa gamai Ɗif aga a za fuŋ warɗi kir kai, ɗif a sumna warɗi kir kaalai.

³⁴Miɗi n’EPIƊ-ƊAI a miɗiŋni wiini ɗif na min Alaw Yeremiyas, buriɗi Elam, won hlai na Sedesiyas, pai na Yuda a tika pini aŋ ŋa aŋ pai ɗa a na maini nɵa:

³⁵EPIƊ-ƊAI zi Spak paŋ a na muɗa maini nɵa: Aga mu haɗa taŋ na wiiɗi Elamitekai edi wala n’a siŋkiɗi edi ɓa e ɗa gdaŋai ɗa.

³⁶Aga mu hinasi smer na war koŋni hlai na puɗu paŋ par a halasi midiɗi Elam Aga mu ɵiriɗi edi arbani smer hanɗa, afti ktai n’aga a hina ta, na ɗai n’e ɵiriɗi war Elam par e cû warni kai aŋ kai.

³⁷Aga mu miliɗi hunai piɗi Elamitekai wuzaɗi gawɗi wuzaɗi nagai n’e piyi aŋ fiɗiɗi ɗa. Aga mu kasi gir midiɗi, hiyŋa n’abai ɗa -A miɗi na sin EPIƊ-ƊAI par. Aga mu tika futi piɗi gaini kaɵkar haa mu vidiɗi edi paŋ.

³⁸Aga mu tikiti Paramai zi pai na wiya aha war Elam aga mu fuɗa pai gaiɗi n’abakai paŋ edi -A miɗi na sin EPIƊ-ƊAI par

³⁹Amma asakal sek agwi, aga mu wiyiti Elam war eziɗi n’avut ɗa -A miɗi na sin EPIƊ-ƊAI par.