Read Mousgoum Yeremiyas 50 Bible Online

Yeremiyas 50 - Mousgoum bible

Yeremiyas 50

¹Seŋ n’EPIƊ-ƊAI a muɗaŋ buriɗi Babilon, gaini afti na wiiɗi ɗai na Babilon, war mini ɗif na min Alaw Yer.

²Si labar hanɗa edi sin pinziba paŋ, ki sinkiŋ edi, ki pi wala zi siŋki amai tiɓ tiɓ Ki siŋkiŋ edi, ki ŋuyiŋ kai. Miɗi ɓa Babilon ɗa e tikiti li

³Buri pinziba ktai a na tikasi hlai war gal n’azumai par, a firiya a bunda afti ni ɗa aŋ hlai na kadai su, ɗai aga e simni warni kir kai, ɗai gaini wazagai n’ezini puɗu puɗu paŋ, aga e bi edi, e vidi edi.

⁴War mefeŋ ni ɗa, war sarti ni ɗa, a miɗi na sini EPIƊ-ƊAI par, ɗai na Izrayel, gaiɗi na Yuda aga e wiyisi aha piɗi marɗi, aga e hilisi gaini tuwi, aga e tûwi Epiɗ-ɗai Alaw na wiiɗi.

⁵Aga e yimi labarɗi Siyon, aga e bindi arɗi aha siɗi sek, hilisi, ki nigi siki sini EPIƊ-ƊAI, war bonu n’a vada kai, n’a wula midini ɗif kaalai.

⁶Ɗaiŋa e ɗika maini farani adumai n’a ba edi nɵa, ɗai ɗi zi giɗimi e wûliɗi edi, e gûni gaiɗi amai midini huwuŋ, midini huwuŋ par e hili midini boŋorai, midiɗi a wula gaini hlai na siɗi amla woni ɗa.

⁷Nagai n’e niviɗi li paŋ ɗa, e limiɗi gai limi, gawɗi e miɗi ɓa: tumu ɗa, meefeŋmu aŋ kai, buri ɓa e zi meefeŋ ɗa sini EPIƊ-ƊAI na a Epin-gezani jre, sini EPIƊ-ƊAI, Ni na a bayai na pini ɵeɗ na wiiɗi tamaiɗi

⁸Yimi siki edi warɗi Babilon ɗa par, fiki edi midini afti na wiiɗi ɗai na Babilon ɗa par, bindi maini haakai na maɵagai n’arbani fara n’a ɵa edi avut ɗa nɵa.

⁹Buri ɓa aga mu fakasi vokɗi piziba viya, na war gal n’azumai par aŋ hitimiti Babilon, aga e gisi siɗi, aga e tikiti, ɓarawɗi, a na maini ɓaraw na wiini gaŋgalaŋ na tini a pa edi kadai kai, n’a wayasi aha kadai kaalai ɗa nɵa.

¹⁰Afti a wiiɗi ɗai na Babilon ɗa, aga a sa war tiɗi ɗai maini der na pini hatam nɵa, nagai paŋ n’aga e nivi der hanɗa aga e vi gaini, a miɗi na sini EPIƊ-ƊAI par.

¹¹Ki firiyi abai gara, tiki na ki kiri bulum na wiya, nkam, pri amai maiɗi ahi-ɵay na te na luma kuzum ɗa nɵa. Hiyyni maini plasai nɵa,

¹²Emiki t'aŋ war siyer n’abai, na na te wiiki ɗa te doogo gaini siyer, tiyana na t'afti n’asakal na pini marni paŋ, te basga na kaɗataŋ, afti na hûleŋ, afti na kooloŋ lai.

¹³Buri hiy na wiini EPIƊ-ƊAI ɗa, ɗif aga a sumna warɗi kir kai, aga te bunda aŋ hlai zi tûûri edi marwai, a siya ɗi paŋ n’a vuga li ɵimaɗi babilon ɗa gdaŋni aga a vada edi, aga a yiba hiwit zi hunai buri wazagai n’a talaŋ a ɓulka edi ɗa.

¹⁴Zizini siki siɗi babilon, gûniti azumai gun tiki paŋ na ki ɵiɓi ɓaraw, ɵiɓiti, ki hini ɓaraw zamai tiki kai, buri te za tuwur sini EPIƊ-ƊAI.

¹⁵Ɗûûli ɗuwal zi gaw siɗi war gal n’amai par, te na yima tiɗi amai, a ziɗi zi tûûri ɗa a haɗa li, zilagaiɗi ɗa te haɗa li azumai, hanɗa a vrak n’EPIƊ-ƊAI a siŋɗi midini meefeŋɗi, hilisi ziɗi meefeŋ, zi siɗi maini na te za siki nɵa.

¹⁶Vidiɗi nagai n’e sûûɗi seyem gaiɗi nagai n’e hiɗi seyem lai ɗa edi warɗi babilon par, wuzani kaɵkar na wiini ni n’a tuura wazagai ɗa, a siya ɗi paŋ a waya siɗi ɗaini, a lawa midini afti lai.

¹⁷Izrayel t'adumi na na te ba edi, na gurnakai a birgiti, a limiti avut ɗa a pai na Siriya asakal tar a Nebukatnezar pai na Babilon lai.

¹⁸Buri hanɗa Epiɗ-ɗai Alaw zi Spak paŋ, Alaw na wiiɗi Izrayel a na muɗa maini nɵa: Aa mu zini gir wiini pai na Babilon gaini aftini lai maini na mu zaŋ sini pai na Asiriya ɗa nɵa.

¹⁹Aga mu wiyiti Izrayel aha midini aftiɗi; Agaa nava kuzumni war Karmel gaini Basan lai, aga a suma haa a va amai midini hlai zi huwuŋ na wiini Efrayim gaini na Galaad.

²⁰War mefeŋ ni ɗa, war sarti niɗa, -A miɗi na sini EPIƊ-ƊAI par- Ɗai aga e piyi meefeŋ na wiiɗi Izrayel, amma aga a nava kai -Aga e piyi tuwur na wiiɗi Yuda aga e niviŋ kir kaalai. Buri aga mu siɗi ni wiini piɗi na mu hinaŋ karni agwi ɗa.

²¹Sini gawɗi Babilon, EPIƊ-ƊAI a na muɗa maini nɵa: Hitimi afti na Merataiyim, hitimiɗi ɗai na Pekod Fiɗiŋ edi, vidiɗi edi haa ktai ma a hina kai. -A miɗi na sin EPIƊ-ƊAI par. Ku za kal kal maini na mu muɗuŋku ɗa nɵa.

²²Midini afti paŋ a na ɗa a suurani gaw, A ɓilki n’edi n’abai.

²³Babilon te naka te marto na hiɗiti duniya paŋ azumai Tiyana a haɗa edi, a kukuɗa edi ɵa maɵa maɵa ɗa Babilon te bunda aŋ hai na gai tuuri edi, arbanpinziba paŋ ɵa maɵa maɵa ɗa?

²⁴Babilon, mu gaŋa azaw wuzaku gaŋ, a yimuku ku sɗan kai A nuvuku, a yimuku buri ku faka amai ɗa sini EPIƊ-ƊAI.

²⁵EPIƊ-ƊAI a mala min hlai na wiini wazagaini zi gaw ɗa li edi a na mulasi wazagai zi hatam na wiini hiyni edi warni par. Hanɗa a sda na wiini Epiɗ-ɗai Alaw zi Spak paŋ midini afti na wiiɗi ɗai na Babilon.

²⁶Hilisi midiɗi war hlai paŋ par hiɗi vrakaiɗi edi Ki tipi der na warni midini marni tap Ki viditi edigaini wazagai na warɗi paŋ burini EPIƊ-ƊAI Ki hini wala ktai warɗi kai.

²⁷Ki fiɗiɗi askaraiɗi na gaŋgalaŋai ɗa edi, ki kiɗi war hlai n’e fiɗi farai woni ɗa! Haw gara buriɗi, mefeŋɗi a cosi li Sarti na mu siɗiɗi gir arɗi warni ɗa.

²⁸Ɗuuwal na wiiɗi ɗai n’e prisi edi, n’e hinisi karɗi idini afti na Babilon par ɗa A siŋka aha war Siyon ɓa EPIƊ-ƊAI Alaw na wiimu a na vurga meefeŋ na wiiɗi Babilon ɗa meefeŋɗi n’e ziŋ sin Tempel na wiini ɗa.

²⁹Yikiɗisi ɗai n’e siɗi ɵiɓini ɓaraw midiɗi Babilon, gaiɗi nagai paŋ n’e siɗi sdani taŋ ɗa. Ki pi kaŋɗi edi par siɗi tiɓ tiɓ, ki gûniti amlai gun gun, ki hini ɗif a pra edi kai, ki zi siɗi maini na te zaŋ ɗa nɵa, ki zi siɗi kal kal maini na te zaŋ ɗa ɵa, buri te kola siɗi wuzani Epiɗ-ɗai Alaw na sɗik na wiiɗi Izrayel.

³⁰Buri nɵa aliɗi na gawlakai aga e mri war hlai na ɗai e tipi warni ta ta ɗa, askaraiɗi paŋ aga e mri kafa warni mefeŋ hanɗa, a miɗi na sini EPIƊ-ƊAI par.

³¹Aga mu faka amai suku tuku Babilon na ku kola suku, a miɗi na sini EPIƊ-ƊAI zi spak paŋ par, buri mefeŋku a cosi li, sarti na mu suɗuku gir arku woni ɗa a cosi li.

³²Na na te kola siɗi ɗa aga te kɵiŋa, te kɵa azumai lai, ɗif n’a yimiti amai aŋ kai, aga mu ɵa afu pini fuŋɗi n’abakai ɗa, a ya hlai na ɵimaɗi lai.

³³Epiɗ-ɗai Alaw zi spak paŋ a na muɗa maini nɵa: Ɗai na Izrayel e ɗa siɗi gir, ɗai na Yuda nɵa lai, ɗai n’e yimiɗi aha par aŋ bege ɗa e bili midiɗi cok, e diri e hiniɗi aŋ wiyi aha kai.

³⁴Amma Ni n’a piliɗi edi ɗa a gdaŋ, Ni na yikini ɓa: EPIƊ-ƊAI zi spak paŋ aga a ɗiya piɗi par, a sa ɵeɗ wiini aftiɗi, a hinasi tûrli arbaɗi ɗai na Babilon.

³⁵Kaɵkar, faka mai siɗi ɗai na Babilon, a miɗi na sini EPIƊ-ƊAI par, siɗi ɗai n’e simni war Babilon siɗi paakai gaiɗi na yalakai.

³⁶Kaɵkar, faka amai siɗi ɗai n’e kûli siɗi ɗa, a zuva ɓa e bindi duulakai. Kaɵkar, faka amai siɗi askarai ɗa, a zuva ɓa, hunai a yimiɗi.

³⁷Kaɵkar, faka amai sini plasai gaini saret zi gaw, faka amai siɗi ɗai zi jilni n’e ɗa aha war fuŋɗi ɗa, a zuva ɓa, e bindi gdaŋ warɗi kai maiɗi falakai ɵa. Kaɵkar, faka amai sini godaiɗi, a zuva ɓa ɗai e virmiŋ.

³⁸Kobro, fakasi amai sini yemɗi ɗa, a zuva ɓa a siita amai, buri ɓa a afti na wiini alawai zi rgi, buri hangalɗi a pra edi pini wazagai na haharai hanɗa.

³⁹Buri nɵa wazagai n’edi war basga na kaɗataŋ par aga a sumna aha war babilon gaini adoliyo, elket, aga a za simnini woni lai, ɗif aga a sumna warɗi kir kai, haa hlai n’a vada kai, n’a vada kai, ɗif aga a sumna warɗi ir kai.

⁴⁰Maini n’a za war mefeŋ n’Alaw a tûûriti Suduma gaiɗi Gumura gaini afti n’abakai na ɵimaɗi paŋ nɵa, a miɗi na sini EPIƊ-ƊAI par, ɗif aga a za fuŋ warɗi kir kai.

⁴¹Ɗai e ɗa hilisi war gal n’azumai par, a pinziba n’abai, gaiɗi paakai zi spak lai, e fikisi ya e ɗa hilisi edi mini dibini afti par.

⁴²Ɓarawɗi gaini kawakaiɗi amai tiɗi yaw yaw, e ɗi ɗai na sabapai, na hiinini-haw warɗi kai, e sûûri maini yem-ra n’abai nɵa, e ɗa midini plasai, e giri miɗi marɗi maini vokɗi askarai n’e giri aŋ hitimi nɵa. E giri suku tuku Babilon a juvi.

⁴³Pai na Babilon a ɵina hanɗa hunai n’abai a yimaŋ, gdaŋ a vada edi, a sɗa gir maiɗi muni na te na poko nɵa.

⁴⁴Maini gurnai n’a niyasi edi arni luwuŋ na hicik na wulani Yurdan par nɵa, n’a hala warni hlai na wazagai warni viya, safai agwi aga mu ɵiriɗi edi, aga mu tika ni na mu varaŋ amai midiɗi. Ni na maya ɵa ɗa a siya ɗa? Ni n’aga a zilbaŋa maɗ a siya ɗa? Ni n’aga a ɗiya ma ɗa a na wata ɗa? Ɗif zi giɗimi n’aga a ɗiya ma ɗa a na wata ɗa?

⁴⁵Buri hanɗa, pini wala n’EPIƊ-ƊAI a rgaŋ warni buriɗi Babilon, gaini wala n’a hiinaŋ buri a zaŋ sini afti na wiiɗi ɗai na Babilon, aga a miliɗi gaini gdaŋ fakat fakat, maiɗi alini farai na war fara nɵa, aga e tûûri hlai edi fakat fakat lai.

⁴⁶Won hlai na ɗai e ɵini labarni tikiɗi Babilon li ɗa, afti aga a ziriya, suura n’abai aga a wa arbaɗi pinzibaɗi ɗai.