Read Mousgoum Yeremiyas 51 Bible Online

Yeremiyas 51 - Mousgoum bible

Yeremiyas 51

¹EPIƊ-ƊAI a na muɗa maini nɵa: Aga mu asismer zi tûûri midiɗi Babilon gaiɗi ɗai na Leɓ-Kamai ɗa lai.

²Aga mu ɵina ɗai na morkokoi midiɗi Babilon, aga e ɵiriti edi. Aga e hini wala aha midini aftiɗi kai, buri aga e liɓisi midiɗi war gal paŋ par, war mefeŋ zi gir.

³Ni n’a ɓa gaini ɓaraw ɗa, e ɓiŋ gaini ɓaraw lai, ki ɓi ni n’a guvula gaiɗi safayaini lai, aliɗi na gawlakai ki hiniɗi kai, ki vidiɗi askaraiɗi edi kafa.

⁴Nagai na gaini wuruk ɗa aga e hini azumai puk midini afti na Babilon, nagai n’e mri mini gaw ɗa, e hini warni futi puk puk lai.

⁵Buri ɓa Izrayel gaiɗi Yuda ɗa, e zi meefeŋ viya sini Alaw na sɗik na wiiɗi Izrayel. Amma Alaw na wiiɗi, n’Epiɗ-ɗai Alaw zi spak paŋ ɗa, Ni ɗa a mra kai, nɵa nagai e ɗa war greŋ kai.

⁶Pri edi war Babilon par, ɗif paŋ a ka sini, ki fiɗi siki mini meefeŋ na wiiɗi kai, buri hanɗa a sarti n’EPIƊ-ƊAI a dara a siŋkiɗi gir arɗi warni ɗa, aga a za siɗi maini n’a na ɗa ɵa.

⁷Babilon te nafu te kup zi or war tini EPIƊ-ƊAI, na ɗai na midini afti paŋ e ciini gaini viŋɗi, pinzibaɗi ɗai paŋ e cii viŋ na warɗi ɗa, buri hanɗa, hangalɗi paŋ a pra edi.

⁸Amma tizaw tar, Babilon te kɵa azumai, te kukuɗa edi lai. Zini yama zi tuwi midiɗi, piyi emel na ki girdiŋ mini wurukɗi ta, ablaŋtaŋkai aga te zuula ɗi?

⁹Mi firiyi ɓa mi zûûliti Babilon, amma te zi zûûli kai, hunutumu, hulumu wiimu, ɗif paŋ midini aftini aftini, buri sariya na wiiɗi ɗa a suwa suwai, mini haa amai war hlai n’amai! Haa amai pini ɗugul ta.

¹⁰EPIƊ-ƊAI a na siŋka jremu edi, hilisi, ɓukumu labar aha war Siyon, midini sda n’Epiɗ-ɗai Alaw na wiimu a zaŋ ɗa.

¹¹Sliɓi mini ɓarawki edi, vi gloŋki gaini, EPIƊ-ƊAI a malasi hiiniɗi paakai na Mede par amai, a rga wulani aŋ tûûriti Babilon edi, hanɗaa vrak na meefeŋ n’EPIƊ-ƊAI a saŋ, a vrak na meefeŋ n’e ziŋ sini tempelni ɗa.

¹²Pi drapo amai sini ɵaga na Babilon ɗa, riyi pɵani hlai zi gɗam gaiɗi ɗai zi gɗam ɗa amai, ki mili ɗai zi gɗam ca ca, ki mili ɗai zi ripti ɗai ca ca lai, buri wala n’EPIƊ-ƊAI a rgaŋ li warni ɗa, sa a zaŋ, n’a muɗaŋ siɗi ɗai na Babilon ɗa aga a zaŋ lai.

¹³Tuku na ku na agoɗom wulani ra n’abai na k’aŋ gaini der viya, dibiku a cosi li, goromku a ɗiya ɵa ta.

¹⁴Epiɗ-ɗai Alaw zi spak paŋ a ha wala mini gaini sini dama, a muɗa: Aga mu vuku gaiɗi ɗai viya maini ayuwi nɵa, aga e ɗûûli ɗuwal na wiini rɗi n’amai puku.

¹⁵A ziti yai a Ni gaini spakni, a tikiti duniya azumai gaini yelni, a gaŋa hlai n’amai gaini siɗi na wiini,

¹⁶a faka li aŋ ɓara ɗa, yem na war Hlai n’amai a tapa war hlai ktai, edi war koŋɗi yai na puɗu par, a hinasi ɗugul a rga amai, a hina wilɗi a wulɗa woni hlai na faŋ a na ɵa, a yimasi smer ɗa edi war hlai zi gɗam ɗa par.

¹⁷E sûwi tatalakai gara, a kiɗa a yima midiɗi kai, ɗif zi hiliyi or paŋ siyer aga a yimaŋ, buri wala zi rgi n’a zaŋ ɗa, buri ɓa alawai zi rgi na wiiɗi ɗa a eles meere, suŋfa warni kai.

¹⁸A wala na nafani aŋ kai, na ɗai aga e riyi pini, aga a vada edi, war sarti n’EPIƊ-ƊAI aga a siɗiɗi gir arɗi ɗa.

¹⁹Amma Alaw na a buri na wiini Yakob ɗa, a na maini nɵa kai, buri ɓa a za wazagai paŋ ɗa A ni, Izrayel te pinziba zi bulum na wiini, yikini ɗa ɓa: EPIƊ-ƊAI zi spak paŋ.

²⁰Ku naka war ta aŋ marto, aŋ wala zi hatam, gaiku tuku, mu kirpa pinziba viya, gaiku tuku, mu tuura aftiɗi paakai viya,

²¹gaiku tuku, mu kirpa plasai gaiɗi ɗai na duɓani, gaiku tuku, mu kirpa saretai zi gaw gaiɗi ɗai n’e diɓiriŋ,

²²gaiku tuku, mu kirpa maɵagai gaiɗi falakai, gaiku tuku, mu kirpiɗi aliyagoi gaiɗi ɗai na walakai, gaiku tuku, mu kirpiɗi aliyagoi na maɵagai gaiɗi na falakai.

²³Gaiku tuku, mu kirpiɗi ɗai zi giɗimi gaini farani farai, gaiku tuku, mu kirpiɗi ɗai n’e hirimi gaini garakai n’e hirmi gaini, gaiku tuku, mu kirpiɗi lawanai gaiɗi ɗai zi ɗûkliti sariya.

²⁴Aga mu virgiɗi meefeŋ na wiiɗi Babilon gaiɗi ɗai na Babilon ɗa lai, buri meefeŋ na e ziŋɗi wiiɗi Siyon wuzani arki, a miɗi na sini EPIƊ-ƊAI par.

²⁵Girna ɗa, tuku gaya ta mu nuvumu li, huwuŋ na wiini ɓilki n’edi, a miɗi na sini EPIƊ-ƊAI par. Tuku na ku naka ku tuura afti paŋ, mu na woɗi ta muduku. Aga mu hugukusi amai midini huwuŋ par, aga mu bunduku aŋ huwuŋ na te na ya.

²⁶Ɗai aga e nivisi ali-fuŋ na war koŋni dalam suku par kai, ali-fuŋ n’e tûûri ezini dalam midini kaalai, buri ɓa aga ku tuura edi gamai, a miɗi na sini EPIƊ-ƊAI par.

²⁷Pi drapo amai midini afti, yibi faana arbani pinzibaɗi ɗai, tipiɗisi ɗai midiɗi Babilon, yikisi aftiɗi paakai hanɗa midiɗi Ararat, Minni gaini Askenaz. Ki piyi askarai n’abakai n’e mili ɗai war askar kapai e hitimiti, ki ɵini plasai midiɗi viya maini farani ayuwi nɵa.

²⁸Tipiɗisi pinzibaɗi ɗai midiɗi, a suwa paŋ paakai na Mede, lawanai gaiɗi ɗai ɗi zi ɗûkli sariya paŋ, gaini afti na piɗi paŋ lai.

²⁹Won hlai na wala n’EPIƊ-ƊAI a hiinaŋ buriɗi Babilon a va li amai ɗa, a bunda afti na babilon aŋ hlai na kadai su, na ɗai warni kir kai.

³⁰Askarai na gaŋgalaŋai na Babilon ɗa, e ɗiyi hatam zaw, e wiyi aha warni hlai zi ŋoyai ɗa, gdaŋɗi a vada tak, e bindi maiɗi falakai ɵa, ɗai e ɵi afu pini dalamɗi, e hiɗi kawai n’e ɵi mini hlai gaini ɗa.

³¹Ɗai zi ɵeŋ n’e ki labar ɗa, e zûûni marɗi gaini zûûni aŋ ki labar wiini pai na babilon ɓa: fuŋ n’abai ɗa e tikiŋ li kafa,

³²hlai n’e hiwi woni ta ta ɗa, aŋ gaini ciki cak cak, hlai zi ŋoyai ɗa e tiki afu pin ta ta lai, askarai hunai n’abai a yimiɗi yaw yaw lai.

³³Buri Epiɗ-ɗai Alaw zi spak pŋ, Alaw na wiiɗi Izrayel a na muɗa maini nɵa: Babilon na juvi te na maini luluf n’e ɵirɓi warni nɵa, a hina agwiya ɗa, a sarti na wiini hiɗi na wiiɗi lai.

³⁴Nebukatnezar pai na babilon a lumaŋa, a hiɓaŋa, a hina maini tasa na wala warni kai nɵa, a rɓaŋa maini wala meefeŋ n’abai nɵa, a va warni gaini derŋa na pɗamai ɗa, a hinaŋa suul.

³⁵Ɗai na Siyon e miɗi ɓa: Karai na babilon te ziŋyi ɗa, ɗai na Yeruzalem e miɗi ɓa: A zuva ɓa felyi ɗa a zilba war tiɗi ɗai na Babilon.

³⁶Buri hanɗa, EPIƊ-ƊAI a na muɗa maini nɵa: Aga mu tika seŋku ta, mu vurga meefeŋ na ɗai e ɗa e ziŋku ɗa, aga mu siita yem-ra n’abai na Babilon ɗa amai, aga mu hiɗika hlai zi liwi yem ɗa amai lai.

³⁷Babilon aga te bunda aŋ hlai zi deeɓer, aŋ hlai zi simni na wiini belemke, aŋhlai na kadai su aŋ wala na hi-hir zi mili hunai piɗi ɗai, ɗif a sumna warni kir kai.

³⁸Tiyana ɗa, ɗai na Babilon e ɗa nûmi maini gurnai nɵa, e ɓiri maini alini gurnai nɵa,

³⁹won hlai na siɗi a pa li afu ɗa, e zi fet, aga mu siɗi viŋ e cii haa e ciini, kapai firyiɗi a va amai, kapai e fini azumai war weseŋ n’a vada kai, kapai e ɵiyisi amai kir kaalai, a miɗi na sini EPIƊ-ƊAI par.

⁴⁰Aga mu kiɗi warni hlai n’e fiɗi farai warni, maini alini adumai, maini adumai na maɵagai gaini haakai na maɵagai nɵa.

⁴¹Fuŋ n’abai na Sisak na yikini a wa edi midiɗi yai paŋ, e tikiŋ li war hatam, a za ɵa maɵa maɵa ɗa? Babilon te hina aŋ hlai na kadai su, arbaɗi pinzibaɗi ɗai, a za ɵa maɵa maɵa ɗa?

⁴²Yem ra n’abai a tikiti babilon ɗa li, mayaw na gdaŋ na viya a dûgûti azumai.

⁴³Fuŋni n’abakai a hina kadai su su, afti na hûleŋ, na koloŋ, afti na ɗif a za fuŋ warni kai, na ɗif murɗek a vuga warni kaalai.

⁴⁴Aga mu siɗini gir arni Bel, alaw na wiiɗi babilon, aga mu hultasi wala n’a rɓa ɗa edi war mini par, pinzibaɗi ɗai aga e tipisi aha sini sek sek kir kai, ɵagai na Babilon ɗa ma te hurba azumai hroɓ.

⁴⁵Tiki ɗaiŋa, niyisi edi warɗi par, ɗif paŋ a ka sini, edi gai gai sini hiy n’abai na wiini EPIƊ-ƊAI par.

⁴⁶Ki hini agulki a ɓiriki kai, ki hûni burini labar n’aga ki ɵiniŋ midini afti ɗa kaalai. Buza ktai ɗa e miɗi seŋ ktai, na zamai ɗa e miɗi ɗa a seŋ zamai. Garmas ɗa a wa tini edi midini afti paŋ, ktaia birga maini, a tika hlai gaini gdaŋ.

⁴⁷Buri nɵa mefeŋ a na halasi, na woni aga mu siɗiɗi gir arni wazagai zi rgi na Babilon, aftini paŋ siyer aga a yimaŋ, nagai n’e mri paŋ aga e hini azumai waŋ waŋ war fuŋ n’abai na Babilon.

⁴⁸Hlai n’amai gaiɗi yai, gaini wazagai na warni paŋ aga a ɗuula gaini firiyi piɗi Babilon, buri nagai n’e tûûriti edi ɗa aga e hilisi war gal n’azumai par, a miɗi na sini EPIƊ-ƊAI par.

⁴⁹Tiki ɗai na Izrayel na ki nivi mri, Babilon aga te kɵa lai, maini na Babilon te fuɗa ɗai viya midini afti ɗa nɵa.

⁵⁰Tiki na ki kûrɗisi mini kaɵkar par ɗa, ki ɗiyi kir kai, edi gai gai par ki hini midiki a kɵa gaini EPIƊ-ƊAI, midiki a kɵa gaiɗi Yeruzalem lai.

⁵¹Mi ɗifu war siyer, won hlai na mi ɵini tirki, aryi a yima amai tini siyer kai, won hlai na ɗai na morkokoi e hilisi e niyi amlai war hlai na sɗik na wiini tempel na wiini EPIƊ-ƊAI ɗa.

⁵²Buri nɵa mefeŋ a na halasi, a miɗi na sini EPIƊ-ƊAI par, war mefeŋ ni ɗa, aga mu siɗini gir arni alawai zi rgi ɗa midini afti paŋ, ɗai na gaini wuruk paŋ aga e ɵi hama,

⁵³koo ɓa Babilon te sɗa siɗi haa amai war hlai n’amai, koo ɓa hlaiɗi zi ŋoyai ɗa tini ɗif a kiɗa sini kai tekeɗeɗi, aga mu ɵina ɗai e tûûriti edi.

⁵⁴Ɗuuwal a wasi war Babilon par, suurani ɓilki n’edi n’abai a na wasi midini afti na wiiɗi ɗai na Babilon par.

⁵⁵Buri EPIƊ-ƊAI a na tûûriti Babilon edi, a na ɗiya suuraɗi n’abai ɗa, mayawɗi a suura maini yem n’abakai na wulani a wa ɗa nɵa.

⁵⁶Nkam, Ni n’a tuura wazagai ɗa a na halasi midiɗi Babilon, aga e yimiɗi askaraiɗi ɗa, aga e hiɗi ɓarawɗi edi lai, buri Epiɗ-ɗai Alaw a waya meefeŋ midini meefeŋ, a za sini a siya ɗi paŋ midini meefeŋni n’a na ɗa.

⁵⁷Aga mu siɗi viŋ aŋ cii wiiɗi paakaiɗi, wiiɗi ɗai ɗi na yalakai, wiiɗi lawanai gaiɗi ɗai n’e ɗûkliti sariya gaiɗi gaŋgalaŋaiɗi lai haa e ciini gaini, aga e kili weseŋ n’a vada kai, e ɵiyisi amai kir kai, a miɗi na sini Pai na yikini ɓa, EPIƊ-ƊAI zi spak paŋ par.

⁵⁸EPIƊ-ƊAI zi spak paŋ a na muɗa maini nɵa: Zlaga na deɓelem n’aŋ siɗi Babilon hanɗa, aga a gzila azumai kafa, porte na mogokai na siɗi hanɗa, afu aga a tuuraŋ edi, ɗai e kiyi siɗi na ɗa meere, ɗai e vidi gdaŋɗi edi na ɗa burini afu.

⁵⁹Miɗi na ɗif na mini Alaw Yeremiyas a miɗiŋni wiini Seraya n’ahini Nerya, na tiyni Maseya, won hlai n’a na hala gaini pai Sedesiyas pai na Yuda a Babilon, war buza n’ag'a! ŋ puɗu na Sedesiyas aŋ warɗi pai. Seraya a nafu a n’abai na midini wazagai n’ahani pai.

⁶⁰Yeremiyas a ɗo gir n’aga a za siɗi babilon paŋ gaini seŋ n’a ɗo li midiɗi Babilon ɗa paŋ war maktuɓ ɗo.

⁶¹Yeremiyas a miɗini wiini Seraya: Won hlai na ku co li a Babilon ɗa, aga ku ŋa seŋ hanɗa paŋ,

⁶²Aga ku muɗa maini nɵa: EPIƊ-ƊAI ku muɗa midini hlai hanɗa ɓa aga a tuura edi, ɗai aga e zi fuŋ warni kir kai, wazagai n’edi buza a sumna warni kaalai, a hina edi ɵa gamai ku tuku mal.

⁶³Won hlai na ku vada li gaini ŋini maktuɓ hanɗa, ku rga ahi-fuŋ sini ɓak, ku blaŋ edi arbani yem-ra na Öfrata.

⁶⁴Asakal par ku muɗa ɓa: Babilon aga te buɗeha maini nɵa, Gir na mu nakaŋsi idiɗi na ɗa aga te kiɗa aŋ ɗiyasi amai tini kir kai. "Ɗai e kiyi siɗi na ɗa kadai meere". Seŋ na wiini Yeremiyas ɗa a ɗiya ɵa ta.