Read Mousgoum Yeremiyas 52 Bible Online

Yeremiyas 52 - Mousgoum bible

Yeremiyas 52

¹Sedesiyas a suma pai sek ɗa buzani caaɓa pi ktai; a buza warɗi pai aha war Yeruzalem buza doogo pi ktai lai. Emini yikiɗi ɓa Hamutal, t'ahini Yeremiyas na Libna par.

²A za sda na meefeŋ arni EPIƊ-ƊAI kal kal maini na Yoyakim a zaŋ ɗa ɵa.

³Wala n’a za aha war Yeruzalem gaiɗi Yuda, a glasi hiy na wiini EPIƊ-ƊAI midiɗi, haa a birgiɗi edi wuzani arni par gai gai. Sedesiyas, a faka amai sini pai na Babilon.

⁴War buza n’ag'aŋ ɵeeŋe na Sedesiyas aŋ warɗi pai, war mefeŋ n’ag'aŋ doogo na wiini tile n’aŋ doogo, Nebukadnezar, pai na Babilon a cikiti Yeruzalem, gaiɗi askarai na wiini; e pi kaŋɗi min fuŋɗi n’abai, e ɓili waŋ siɗi ɗawwa.

⁵Fuŋ n’abai hanɗa a hina gai ciki aha ɵa cak haa sin buza n’ag'aŋ doogo pi ktai na wiini pai Sedesiyas.

⁶War mefeŋ n’ag'aŋ ɵeeŋe na wiini tile n’ag'aŋ puɗu, wiyamai te sawa aha siɗi ta, wala na ɗai e simiŋ aŋ kir kai,

⁷ɗai na Babilon e bli baŋa ktai siɗi ɵagai su. Nɵa, pai Sedesiyas gaiɗi askarai na wiini e prisi edi, e niyisi aha par duvuk, warɗi futi na te na arbani ɵaga na sulu, na gobi gaini zardeŋ na wiini pai ɗaw, e tikiti futi na Araba sek ɗa. Paŋ ktai, fuŋ n’abai ɗa a nafu gai guni azumai tiɗi ɗai na Babilon ɗa gun.

⁸Amma askarai na Babilon e tiki futi pini pai Sedesiyas, e yimiŋsi midini afti na plas na Yeriko par, askarai na wiini e ɵiri edi.

⁹E yimiŋ, e kiŋ a Ribla midini afti na Hamat, wuzani pai na Babilon. Woni pai Nebukadnezar a ɗiyiti sariya n’aga te za burini ɗa.

¹⁰Pai na Babilon sa futi buri e ɵi wulaɗi alini pai Sedesiyas wuzani arni epiɗi, a sa futi buri e ɵi wulaɗi n’abakai na Yuda paŋ lai a Ribla.

¹¹Asakal par a sa futi buri e cuni arni pai Sedesiyas co co, e nigiŋ gaini jaɓ zi kiya lai. A kaŋ war Babilon, a ɵaŋ warɗi daŋgai, haa a mra woni.

¹²War mefeŋ n’ag'aŋ doogo, na wiini tile n’ag'aŋ ɵim, hanɗa a buza n’ag'aŋ doogo pi ɵeeŋe, na Nebukadnezar, pai na Babilon aŋ warɗi pai, Nebuzaradan, abaiɗi ɗai zi gɗam na na wiini a halasi a Yeruzalem.

¹³A ɵa afu pini Tempel, gaini dalam na wiini pai, gaini dalamai na Yeruzalem paŋ lai. A suwa paŋ dalamai n’abakai ta ta ɗa.

¹⁴Askarai na Babilon n’e ɗa gaini ɗa, e hu ɵaga na siɗi Yeruzalem ɗa azumai.

¹⁵Nɵa Nebuzaradan abaiɗi ɗai zi gɗam a miliɗi ɗai n’e hini ka aha war fuŋ n’abai ɗa: Zamai arbaɗi e ɗi na murgakai, zamai e ɗi n’e tipi miɗi gaini pai na Babilon, gaiɗi ɗai n’e zizini wazagai n’e hini ktai ktai lai.

¹⁶Amma, Nebuzaradan, abaiɗi ɗai zi gɗam, a hina ɗai zamai arbaɗi na murgakai aŋ simni aha midini afti na Yuda, aŋ zi zardeŋ zi vin, aŋ hirmi vowai lai.

¹⁷Ɗai na Babilon e hiɗi gaarakai zi kiya n’amlai warni Tempel azumai, gaini saretai n’e libi wazagai gaini, gaini daya n’abai zi kiya n’amlai Tempel ɗa lai. E libi kiya hanɗa a Babilon.

¹⁸E mili wazagai zi kiya n’e zi sda gaini warni Tempel ɗa kafa: tasakai, pelai, muguɗai, kupai gani kopai n’e zi sda gaini paŋ.

¹⁹Abaiɗi ɗai zi gɗam a mula wazagai zi or gaini zi arzaŋ n’e zi sda gaini amlai warni Tempel ɗa paŋ: Dumbakai, wazagai n’e yi wazagai zi ɗûgûdi zi lûgûzi gaini, gaini tasakai, gaini wazagai n’e higi lampa amai sini kupai gaini kopai lai, wazagai n’a za gaini or gaini arzaŋ ɗa paŋ.

²⁰Gaarakai na sulu, daya n’abai zi kiya, gaini garakai na doogo pi sulu n’e tiki daya midini lai, na Salmun a zaŋ burini Tempel, wazagai zi kiya hanɗa paŋ ɗa, kiloni a pɵa tini ɗif kai.

²¹Gaarakai ɗa, garai n’avut ɗa mogoɗi n’amai sek ɗa metir ɵeeŋe, warɗi n’amlai baŋa su, sogom na paɵaɗi ta ɗa metir ɵaara, diɓilikni kiya ɗa, santimetir mitwis lai.

²²Amai merfeŋni gaarakai na sulu ɗa a zizina wazagai zamai sulu gaini kiya na midini gai ɵiri edi ɵar ɵar, mogoni n’amai sek ɗa metir sulu gaini gal gal, a zizina wazagai zamai na sɗa maini ava ɵa, na zamai maini alini grenade ɵa lai. Gaarakai na sulu ɗa, wazagai na sini mai marni ɵa.

²³War gal paŋ ɗa, alini luwuŋ grenade a nafu doogo doogo ɵeeŋe pi ɵaara ɵaara, ali luwuŋ grenade na sini ava taha ɗa a na miya ɗaw.

²⁴Abaiɗi ɗai zi gɗam a yima Seraya pai zi ɓaka n’abai gaini Sefaniya pai zi ɓaka n’a ga wulani, gaiɗi nagai na hu n’e giɗimi min Tempel ɗa lai.

²⁵A yima ɗif n’abai ktai na a abai na midiɗi askarai, gaiɗi zagalakaini pai muguzak, gaini sekreter na wiini abaiɗi askarai n’a mula ɗai war askar ɗa, gaiɗi ɗai na Yuda zamai doogo doogo ɵaara, n’e ɗifu aha war fuŋ n’abai hanɗa.

²⁶Nebuzaradan a miliɗi, a kiɗi wiini pai na Babilon a Ribla.

²⁷Pai na Babilon a siɗi aŋ fiɗi edi a Ribla, midini afti na Hamat. Ɗai na Yuda par e nivisi siɗi edi gai ai sini aftiɗi par mai hanɗa nɵa.

²⁸Pɵaɗi ɗai na Nebukadnezar a kiɗi edi midini afti zamai a na maini nɵa: War buza n’ag'aŋ muguzak ɗa, Yudiyakai 3023

²⁹War buza n’ag'aŋ doogo pi mitwis, a mula ɗai a Yeruzalem par 832,

³⁰War buza n’ag'aŋ caaɓa pi hu ɗa, Nebuzaradan n’abaiɗi ɗai zi gɗam a mula ɗai 745 lai. E tipi paŋ ɗai 4. 600.

³¹War buza n’ag'aŋ doogo doogo hu pi muguzak na Yoyakin, pai na Yuda a na edi midini afti zamai, war mefeŋ caaɓa pi ɵim na wiini tile n’ag'aŋ doogo ɗa, Evil Merodak, pai na Babilon, war buzani n’avut na warɗi pai ɗa, a za yim sini Yoyakin, pai na Yuda, a ɵaŋsi edi warɗi daŋgai par.

³²A miɗini gaini wule na pɗem, a tikaŋ amai midiɗi paakai n’e ɗa gaini war Babilon paŋ.

³³A miɗini wiini Yoyakin buri a wa sapani zi daŋgai ɗa sini kir kai. A halasi a suma ɓa midiɗi tabel na wiini ɵa haa sin mrini ta.

³⁴Yoyakin a nava zinai sini pai na Babilon ɗa par, mefeŋ mefeŋ paŋ, midini kiɗini na war yivai ta ta, haa sin mrini.