Read Mousgoum Yama zi tuwi 1 Bible Online

Yama zi tuwi 1 - Mousgoum bible

Yama zi tuwi 1

¹Maɵa maɵa ɗa! Te bunda edi ezini hlai dam ɗa! Yeruzalem na gaiɗi ɗai warɗi viya te bunda maiɗi muni na war greŋ ɵa ɗa! na na te naka amai arbani afti na wiiɗi lawanai paŋ, te bunda tiyana aŋ bagai ɗa.

²Te fana aŋ tuwi ɵa, tuwi n’arɗi a siita kai, ktai n’a siɗi arai zi pi arbaɗi marmakaiɗi par aŋ kai. marɗi na gaiɗi paŋ e hiniti edi, e bindi aŋ gawɗi.

³Ɗai na Yuda paŋ e kiɗi edi midini afti zamai, war siyer, war bege n’abai, nagai e simni arbaɗi ɗai na kadai, e nivi si-n’amla kai, nagai n’e ziɗi gir ɗe paŋ e sikiɗi piɗi war futi na te co edi kai.

⁴Futi na Siyon sek ɗa aŋ war kwimi, ɗif ktai n’a halasi mini fet na wiiɗi aŋ kai, hlai na ɗai e tipi woni a hina edi kadai su su, paakaiɗi zi ɓaka e nûmi, aliɗi na ɓulamai e ɗi war gir, Siyon t'aŋ war gir n’abai.

⁵Nagai n’e ziɗi gir ɗa e sûwiɗi suwai, gawɗi e ɗa war firiyi buri EPIƊ-ƊAI a tikiɗi gir midiɗi, pini meefeŋɗi na viya ɗa. Aliɗi n’agogoi e hili aŋ bagakai wuzaɗi nagai n’e ziɗi gir.

⁶Siyon na zufi ɗa kol n’a sa siɗi aŋ kir kai. Paakaiɗi ɗa e bindi maini ŋolomo, n’a nava hlai n’a suma kuzum woni kai nɵa, hiliɗi n’e hili wuzaɗi nagai n’e ziɗi gir ɗa gdaŋ warɗi kai.

⁷Won hlai na t'aŋ war gir gaini siyer, Yeruzalem, midiɗi a kɵa, gaini wazagaiɗi na pɗamai n’avut par, Won hlai na ɗai ɗi e kɵi war tiɗi gawɗi, ɗif ktai maa a zaŋa piɗi kai, gawɗi e tiliti gaini arɗi, e riyi piɗi gaini riyi Won hlai n’e ɗa ɓilkiti edi.

⁸Yeruzalem te za meefeŋ viya gara, te bunda tiyana aŋ zilgid. Nagai paŋ n’e ɗika e kûliti e bindi e miisiti gaini miisi, buri e tili gaŋalaɗi ɓa, na te hina te nuuma gaini nûmi, te bunda arɗi edi pla.

⁹Hihir na wiiɗi a niyasi haa edi sini sapa na siɗi paŋ, te hiina ɓa aga a za ɵa kai, kɵiɗi n’azumai, a kɵi n’a bunda ɗif hiyak. Ɗif n’a siɗi arai zi pi aŋ kai. EPIƊ-ƊAI tala hawŋa, gawŋa a na kola sini buri rɗini n’amai mada ɗa.

¹⁰Gawɗi e wi tiɗi midini wazagaiɗi na pɗamai paŋ. Te tiliɗi ɗai na kadai e ɗa niyi amlai war hlai na sɗik, na ku miɗiɗi ɓa e niyi amlai warni kai ɗa, war diŋgi na wiiɗi ɗai na wiiku ɗa.

¹¹Ɗai ɗi paŋ e ɗa ŋûmi, e ɗa piyi wala zi simi, e bindi wazagaiɗi na pɗamai gaini wazagai zi simi, kapai e nivi gdaŋ. EPIƊ-ƊAI, tala haw ɗa, tala miisi n’e ɗa miisiŋa ɗa!

¹²Tiki paŋ na ki ɗa vigisi warɗi futi hanɗa, tili haw ɗa, gir na maini na mu na sɗaŋ na ɵa, n’EPIƊ-ƊAI a tikaŋŋa mada war mefeŋ n’a za hiy abai sa ɵa ɗa, gir na maini hanɗa ɵa a na ɗe?

¹³Amai war hlai n’amai par, a ɵinasi afu, amlai war sa, epin-gezani a ni, a gaŋa azaw wuza gaŋ, a blaŋa azumai su. A bundaŋa maiɗi muni na wuzaɗi a na fiɗiti, na kureɗ daiɗi a ɗiya kai.

¹⁴EPIƊ-ƊAI a tala meefeŋŋa, gaini tini a nag'aŋ war hlai ktai ɓak maini juk ɵa, a tikaŋa amai wula ta, a vada gdaŋŋa ɗa edi. EPIƊ-ƊAI a hinaŋa war tini, haa gdaŋŋa na mu ɗiya amai maa aŋ kai.

¹⁵Askarai na agulɗi a huna kai n’e ɗika ahaya paŋ, EPIƊ-ƊAI a birgiɗi edi sa. A yikasi vokɗi askarai mada, kapai a vidiɗi askaraiŋa na karɗi edi. EPIƊ-ƊAI a saraŋa ta Siyon na juvi edi maini n’e siri alini luwuŋ zi vin ɗa nɵa.

¹⁶Mu tuwa na ɗa buri hanɗa, tuwi na pini ara paŋ gaini vidi edi vat. Buri ni n’a saŋa arai zi pi, n’a saŋa gdaŋ lai ɗa aŋ sa kir kai. Aliya ɗe gdaŋɗi a vada vat, buri gawɗi ɗa, gdaŋɗi a sûwiɗi suwai.

¹⁷Siyon te firiya zinai, amma ktai n’a siɗi arai zi pi aŋ kai. EPIƊ-ƊAI a siɗi futi wiiɗi gawɗi Izrayel na ɵimani buri e ziɗi gir. Yeruzalem te bunda arbaɗi maini zilgid nɵa.

¹⁸EPIƊ-ƊAI ni a jre, buri mu ɵina pini gadaini kai. Nɵa tiki ɗai paŋ ɵini, tili gir n’aŋ sa lai. Aliya na ɓulamai gaiɗi na gawlakai, e hili edi aŋ bege.

¹⁹Mu ɗûûliɗi marmakaya ɗa, amma nagai e dirisi sa kir kai, paakaiŋa zi ɓaka gaiɗi ɗaiŋa na abakai n’arbaɗi ɗai e mri aha war fuŋ n’abai ɗa, Won hlai n’e ɗa piyi wala zi simi kapai e nivi gdaŋ.

²⁰EPIƊ-ƊAI, tala gir n’aŋ sa ɗa, agula te huura amlai wara, agula t'aŋ wara gaini tûrli tiɓ, buri ɵeŋ na pini gadaiku, mu ɵina kai. Anene ɗa, kaɵkar a vidiɗi aliya li. Aha war dalamyi ɗa, mi tili siyi na ɗa ahani mri.

²¹Nûmi na mu na nuuma ɗa e ɵini ɓa, amma ktai n’a saŋa arai zi pi aŋ kai. Gawŋa paŋ e ɵini gir n’aŋ sa ɓa, e firiyi gaini firiyi pini wala na ku zaŋŋa ɗa. Ku kasi Mefeŋ na ku muɗa midini ya, azuva ɓa nagai lai e siɗi gir maya ta nɵa!

²²Azuva ɓa meefeŋɗi paŋ a vugasi wuzani arku kafa; za siɗi maini na ku za sa ta pini hiŋa n’amai midini gadai ɗe nɵa buri ŋûmiŋa ɗa a viya gara, Agula te na veglek lai.