Read Mousgoum Yama zi tuwi 2 Bible Online

Yama zi tuwi 2 - Mousgoum bible

Yama zi tuwi 2

¹Maɵa maɵa ɗa? EPIƊ-ƊAI war hiyni ɗa, a firiya a kasi gegeŋ midiɗi Siyon na zûvi ɗa! A ɵeŋkasi ŋili na wiiɗi Izrayel amai war hlai n’amai par haa azumai midini afti ɗa. War mefeŋni zi hiy ɗa midini kaw a kɵa gaini tubla n’azumai pini ezini kai ɗa.

²EPIƊ-ƊAI a tuura hlai zi simni na wiini Yakob paŋ edi gaini hiinini haw kai. War hiyni n’abai a haɗa fuŋ n’abakai zi ɵaga na Yuda azumai. A ɵa azumai, A ŋiti pai gaiɗi paakai na warɗi mini aŋ wala kai.

³War hiyni na gdaŋ a vada spakɗi Izrayel ɗa edi. A zina piɗi wuzaɗi gawɗi kai, a tika afu pini Yakob ta, n’a ya hlai na ɵimani paŋ.

⁴A zizina taŋni maini ɗif zi gaw nɵa, tini na wus gaini yimi amai kaai maini ɗif zi gaw nɵa, a fiɗiɗi nagai n’e tili zavai paŋ edi. A hina hiyni n’abai midini tempel na war Siyon na zûvi maini afu nɵa.

⁵EPIƊ-ƊAI a za sini maini gawɗi nɵa a biɗi Izrayel ta, a tuura fuŋɗi na pɗamai paŋ lai; a haɗa fuŋɗi n’abakai zi ɵaga ɗa azumai. A riya tuwi gaini yama zi tuwi na war Yuda na zûvi amai.

⁶A ɓasa ɵaga na siɗi Siyon gaini gdaŋ maini n’e ɓisi ɵaaɓ na sini zardeŋ nɵa, A tuura hlai n’e tipi woni edi. EPIƊ-ƊAI a hina midiɗi a wula gaini fet gaini Sabbat n’a za aha war Siyon ɗa. War hiyni na gdaŋ a birgiɗi paakai gaiɗi paakai zi ɓaka edi wuzani arni par.

⁷Hlaiɗi zi ɓaka a baza mini EPIƊ-ƊAI ta, hlaiɗi na sɗik a bunda arni hi-hir lai; Zlaga na sini dalamɗi na pɗamai ɗa, a hinaŋ war tiɗi gawɗi. Ɗai e sûûrisi amlai war tempel na wiini EPIƊ-ƊAI par maini na war mefeŋ zi fet nɵa.

⁸EPIƊ-ƊAI a rga warni buri a haɗa ɵaga na siɗi Siyon na zufi azumai. Aga a kata midini hlai paŋ kal kal, aga a yimitisi tini edi sai na ɓa sda hanɗa paŋ a daba li. Waŋ gaini ɵaga zi ŋoyai ɗe paŋ a hinaŋ war tuwi, gaini sulogaini paŋ a tuura edi.

⁹Porte na miɗi Siyon a pa azumai pini afti, a tuura, a haɗa kawakai n’e ɵi miɗi gaini. Paiɗi gaiɗi ŋarakaiɗi e ɗi edi aŋ bagakai arbaɗi ɗai na kadai. Ɗai na mini Alaw maa wala zi siŋki na sini EPIƊ-ƊAI par a za siɗi kir kai. Ɗif n’a hitra gadai na wiini edi aŋ kir kaalai.

¹⁰E simni azumai arni afti sa, e miɗi seŋ kai, n’abakai n’arbaɗi ɗai na war Siyon na zûfi ɗa e kûalogodo midiɗi, e wi sapa zi tuwi siɗi, ɓulamai na Yeruzalem e pi midiɗi azumai tiɓ tiɓ.

¹¹Tuwi a suma ara edi ta, agula te huura amlai wara, gdaŋŋa a yima edi tak, buri vidi n’e vidiɗi ɗaiŋa ɗa, hlai na aliyagoi n’agogoi gaiɗi na koɗokokai e ɗa mri. War hlai na ɗai e tipi woni n’arbani fuŋ n’abai ɗa.

¹²E zilbiɗi tamaiɗi na falakai ɓa, simi gaini ci ɗa aŋ wata ɗa? hlai n’e ɗa e mri war hlai na ɗai e tipi woni n’arbani fuŋ n’abai maiɗi ɗai n’e mri mini huruk nɵa hlai na suŋfaɗi ɗa a firiya a niya edi amai paɵaɗi tamaiɗi ɵak ɵak ɗa.

¹³Na mu muɗuku tiɓ ɗa a maɗa? Na mu kata gaiku ɗa asiya ɗa? Yeruzalem na zûvi. Na mu kataŋ gaiku kapai a suku arai zi pi ɗa asiya ktai ɗa, ɓulmi, Siyon na zûvi? Buri ɓa girku a suwa abai maini yem-ra n’abai ɗe nɵa. N'aga a zuuluku ɗa asiya ɗa?

¹⁴Wala n’a siŋka arɗi ɗaiku na mini Alaw a rhai kadai meere na lemni aŋ kai. e ɗa suŋkuku midini meefeŋku, n’a kiɗa a bunda gir n’aŋ suku ɗa kai. Na a siŋka arɗi, n’e ɗa muɗuŋku ɗa, a miɗi na kadai meere, n’a wuuluku edi sek.

¹⁵Ɗai n’e vigi war futi ɗe paŋ aga e ɵiɓi graŋɗi puku pik pik e yibi hûwit, e ɵiɓi midiɗi kis kis lai piɗi Yeruzalem na zûvi ɗa: aga e zilbi siɗi ɓa: Hanɗa a fuŋ n’abai n’e ɗika e yikiŋ ɓa: zuf n’abai, firiyi na wiiɗi duniya tiɓ ɗi?

¹⁶Gawku paŋ aga e miɗi gaiku, e yibi hûwit, e hirɗi sesiyeŋɗi suku, E miɗi: mu suwuɗumu li. Daba, a na kiɗi, mefeŋ na mu biyunmu ɗa. Mu sumsi li sini, mu tulunmu li gaini armu lai.

¹⁷EPIƊ-ƊAI a za ɗa a wala n’a kataŋsi ya ɓa a za ɗa, a va seŋni n’a muɗaŋ ɗa amai, n’a muɗaŋsi ka haa gamai par ɗa, a haɗa hlai azumai gaini hiinini haw kai. A hiniɗi gawku e firiyi puku; a riya spakɗi gawku amai.

¹⁸Tiki ɗai na Siyon, tipi hiiniki ktai, ɗûûli sini EPIƊ-ƊAI. Zlagai na siɗi Siyon na zûvi, hina tuwi n’arku a ka girvudi gaini duvuk paŋ maiɗi arai zi yem nɵa. Ku hina suku amla kai, ku hina tuwi n’arku a siita kaalai.

¹⁹Faka amai, ɗuula sini EPIƊ-ƊAI, war duvuk, war ɓrawni hlai na ta ta ɗe paŋ. Gusda seŋ n’a warku paŋ edi wuzani EPIƊ-ƊAI, maini yem n’a buduma edi nɵa. Yima tuku amai pini EPIƊ-ƊAI, burini suŋfaɗi aliku na agogoi, n’e ɗa mri miɗi wiyamai, edi ɵimani futi su su ɗa.

²⁰EPIƊ-ƊAI mulasi arku, tala haw ɗa, na ku na sɗini gir arni na ɗa asiya ɗa? Na kapai falakai e bindi haa e limiɗi e ɗi aliɗi ɗa, aliɗi n’e wi gaini futiɗi! Haa kapai e fiɗiɗi paakai zi ɓaka gaiɗi ɗai na mini Alaw, amlai war hlai na sɗik na wiini EPIƊ-ƊAI ɗa!

²¹War futi, kopoŋɗi n’abakai gaiɗi n’agogoi azumai waŋ waŋ; aliya na ɓulamai gaiɗi gawlakai e mri mini kaɵkar; ku fiɗiɗi edi war mefeŋku zi hiy, ku ɵiɗi wulaɗi gaini hiinini haw kai.

²²Ku tipiɗisi nagai na ɵima zi sabapai paŋ mada, maini war mefeŋ zi fet nɵa; war mefeŋ zi hiy na wiini EPIƊ-ƊAI ɗa, ɗif n’aga a kurɗa edi aŋ kaalai, n’aga a hina karni aŋ kaalai. Nagai na mu ziyiɗi, na mu wûliɗi amai lai, gawŋa a vidiɗi edi kafa.