Read Mousgoum Yama zi tuwi 3 Bible Online

Yama zi tuwi 3 - Mousgoum bible

Yama zi tuwi 3

¹Ta mu ɗif na mu sɗa gir viya gara, tiɗi amaraŋai zi suwar na wiini.

²A ɵa wuza su, a hala gaya, war gaglai kai, amma war gegeŋ.

³Mefeŋ paŋ a haŋa gaini kutupa.

⁴A lumaŋa haa amlai sini keɵkeŋa ta, a haɗa keɵkeŋa lai.

⁵A gunaŋa amlai gaini gir gaini hûwyi zamai zamai lai maini gaini ɵaga nɵa.

⁶A tikaŋa war hlai na gegeŋ ta maiɗi nagai n’e mrisi ɗipar nɵa.

⁷A rga ɵaga amai sa ɓak kapai mu niya anene kai, a rgaŋa gaini jaɓ n’abakai.

⁸Mu ɗuula haa, mu yikaŋ buri a zina pa haa, a taka ɵimani mini siiwaŋa tek.

⁹A rga ɵaga war buwal na za gaini ali-fuŋ n’abakai, a tosa mini futiŋa n’agogoi tos tos lai.

¹⁰A bunda buriya maini Urs n’a na pra wala nɵa, maini Gurnai n’a na ripta wala nɵa.

¹¹A turla futi n’aza, a ɓasaŋa edi, a zuzuɗaŋa edi zuɗ zuɗ.

¹²A tikiti ɓurwiini war taŋ ta, a ɗiyaŋa edi zaw, kapai a ɗigraŋa.

¹³Ɓaraw n’aŋ warni gloŋni kafa, a vadaŋ amai sini paɵa kafa.

¹⁴Mu bunda aŋ wala zi yewere na wiiɗi ɗaiŋa, yuvai paŋ e zini yama gaya.

¹⁵A siinaŋa gaini gir na ɗewek, a siinaŋa gaini wala zi ci na ɗewek.

¹⁶A zaŋa dewele mada aŋ bodo gorhoyo gaini sesiyeŋŋa, a paŋa azumai arni alogodo.

¹⁷Ku saŋa ara edi sini ɵeɗ par ta, mada a wula gaini simni na ɵeɗ cikeŋ.

¹⁸Mu muɗa: ta mu vada edi vat, bayaiŋa na pini ɵeɗ na pini EPIƊ-ƊAI a vada edi vat lai.

¹⁹Hina muduku a kɵa gaini siyer na m’aŋ woni gaini giliŋiŋa na blaŋ blaŋ ɗa, a wala na ɗewek gaini musnaw.

²⁰Mada a kɵa gaini ɵa, a kɵa gaini ɵa, gdaŋŋa a vada edi wara par tak.

²¹Amma wala n’aga mu yimaŋ mada, n’aga mu bayaŋ pini ɵeɗ lai ɗa, a na ɓa:

²²Pɗemi na wiini EPIƊ-ƊAI te vada kai, dirini ɗa a vada kaalai.

²³Gorof par paŋ a wayasi paŋ, jreku ɗa abai gara.

²⁴Mu muɗa war agula ɓa: na wiya ɗa a EPIƊ-ƊAI, mu baiya tini na ɗa buri hanɗa.

²⁵EPIƊ-ƊAI a pɗem buri ni n’a na baiya war tini ɗa, burini ni n’a na payaŋ ɗe lai.

²⁶A pɗem buri ku baiya pili n’edi na wiini EPIƊ-ƊAI muku duk.

²⁷A pɗem ɓa ɗif a za pini gadai war agwiyeŋeni par.

²⁸A yima sini edi kiini, a sumna hiyak, Won hlai n’EPIƊ-ƊAI a na yimiŋni midini.

²⁹Mini azumai duk, ablaŋtaŋkai pɗem a za wiini ɗi ɗa,

³⁰A sini galaini wiini ni n’a ɵeɓaŋ, a yima tirki sini lai.

³¹Buri EPIƊ-ƊAI, a bla ɗif edi gamai kai.

³²Buri ɓa hlai n’a zini gir wiini ɗif, hiinini haw a yimaŋ lai, buri dirini n’abai.

³³Buri ɓa a na firiya pini hûsi n’azumai na wiini ɗif kai, pini gir n’a ziŋɗi wiiɗi ɗai kaalai.

³⁴Won hlai n’e biziɗi ɗai zi daŋgai na midini afti ktai azumai.

³⁵Won hlai n’e ziti sariya wiini ɗif war jre kai, wuzani arni Alaw n’amai,

³⁶Won hlai n’e zini meefeŋ wiini ɗif war zini sariya ɗa, EPIƊ-ƊAI a na tala kai ɗi?

³⁷Ɗif n’a muɗa, wala ni a za lai asiya ɗa? A zaŋ nɵa a EPIƊ-ƊAI n’a sa futi ɗe kai ɗi?

³⁸Pɗem gaini meefeŋ paŋ a niyasi edi war mini Alaw n’amai ɗe par kai ɗi?

³⁹Ɗif a ɵa hama sini tiɓ buri maɗa, na ɓa a na karni ɗa, a zuva ɓa ɗif paŋ a fuɗa was gaini meefeŋni.

⁴⁰Tulumu payaimu ɗa, hiinumu midini hulum, wuyumusi sini EPIƊ-ƊAI.

⁴¹Yumumu agulmu amai gaini tumu paŋ, pini Alaw n’a na war hlai amai.

⁴²Tiyi ɗa mi fiki amai suku, mi ɵini puku kai, tuku ku arku midini meefeŋyi kai.

⁴³Ku niya war hiy, ku tika futi piyi, ku fiɗiyi edi gaini hiinini haw kai.

⁴⁴Ku ŋoya suku duɓani ɗugul cok, kapai siiwaii a kiɗaɗi suku kai.

⁴⁵ku bindiyi aŋ zilgid, aŋ wala na nafani aŋ kai, edi arbaɗi pinzibaɗi ɗai.

⁴⁶Gawyi paŋ, e miɗi siyi kafa.

⁴⁷A hina buriyi ɗa a hunai, a waŋ n’abai, a ɓilki n’edi gaini gir lai.

⁴⁸Tuwi a ka ara maini arakai nɵa, buri gir na wiiɗi ɗaiŋa.

⁴⁹Kiini tuwi n’ara ɗa a ɗiya kai, buri si n’amla aŋ kai,

⁵⁰Haa EPIƊ-ƊAI war hlai n’amai par, a mulasi arni azumai a tala;

⁵¹Ara a fuɗaŋa buri wala na mu na talaŋ siɗi ɗai na war fuŋŋa n’abai ɗa.

⁵²Nagai na gawŋa e birgiŋa, e tiki futi pa maini wala zi ɗufli nɵa, pini wala ktai kaalai.

⁵³E biliŋa azumai war waŋ kara su, e dukiti fukuni mini waŋ ɗa duk.

⁵⁴Yem a ka amai mada ɗaw, mu muɗa: mu ɓa li.

⁵⁵EPIƊ-ƊAI, mu ɗuula suku azumai war huduk na wuuŋŋa par.

⁵⁶Ku ɵina tûwiŋa ɓa, taka ɵimaku mini siiwaŋa kai, mini siriyiŋa kaalai.

⁵⁷Mefeŋ na mu ɗuuluku, ku wayasi sa gobi, ku muɗaŋa ɓa: mu huna kai.

⁵⁸EPIƊ-ƊAI ku fuɗa was buriya wuzaɗi sariya, ku vurga midini sunfaŋa kapai a plasi edi.

⁵⁹EPIƊ-ƊAI, ku tala meefeŋ n’e ziŋŋa ya, siŋkiti jreŋa ɗa edi.

⁶⁰Tala warɗi n’a na limiɗi sa, gaini seŋ n’e ɗa rgiŋ mada lai.

⁶¹EPIƊ-ƊAI, ku na ɵina tirki n’e ɗa tirkiŋa; gaini seŋ n’e ɗa rgiŋ mada;

⁶²gawŋa ɗa e yivi nɵa sa aŋ miɗi gaya,

⁶³koo ɓa e ɗa azumai sa, ɓa koo e ɗa amai sa, e zi yama gaya.

⁶⁴EPIƊ-ƊAI, pini sdaɗi ɗa, aga ku za siɗi nɵa lai,

⁶⁵Aga ku dinra agulɗi ɗa, tusa na wiiku aga a sumna midiɗi!

⁶⁶War hiy n’abai aga ku ziɗi gir, ku vidiɗi edi midini afti par.