Read Mousgoum Yama zi tuwi 4 Bible Online

Yama zi tuwi 4 - Mousgoum bible

Yama zi tuwi 4

¹Maɵa maɵa ɗa, or ɗa a bunda a ŋala kir kai ɗa! kawai na zuf hanɗa a tuura ɵa ɗa? Ali-fuŋ na sɗik a bunda edi, ɵimani futi puk puk ɗa?

²Ɗai na Siyon na wiriɗi saŋ gara n’e kiti gaini Or na gaini futini nɵa, e bindi maini grak z'afti na ɗif a zizinaŋ gaini tini nɵa maɵa maɵa ɗa.

³Barka ceŋ-ceŋ maa a ɗiya sa, a sa fiyaw miɗi alini. Amma ɗaiŋa na pɗamai hanɗa ebindi jaaɗi siɗi aliɗi kai, maini elket n’edi basga nɵa.

⁴Alesɗi akoɗokokai, a diŋga amai pini hŋahŋaɗi tiɗi sai, aliyagoi n’agogoi e piyi wala zi simi, ɗif n’a siŋɗi aŋ kai.

⁵Nagai n’e simi wazagai na pɗamai, gdaŋɗi a vada edi war futi. Nagai n’e ɗika war muluk ɗa e piyi simiɗi edi war hlai n’e pûki salte woni ɗa.

⁶Meefeŋ na wiiɗi ɗaiŋa a suwa tuwur na wiiɗi Sodoma suwai, na te tuura edi gaini yafai kai, na tini ɗif maa a tika siɗi kai.

⁷Paakaiɗi e ɗika hilu e sûwi glas, muɗukokai e sûwi fiyaw. Amur-siɗi a ŋala maini korai ɵa, wuzani arɗi maini ali-fuŋ safir nɵa lai.

⁸Wuzani arɗi a bunda murɗek maini anji ɵa, war futi yaw ɗif a kiɗa a siɗiɗi kir kai, amur-siɗi a mula yewek sa sa, a bunda hûleŋ maini luwuŋ ɵa.

⁹Mri na miɗi wiyamai ɗa, marya mri na mini kaɵkar ɗa, ɗif a mra sek ɗa gdaŋ warni kai, buri wala zi simi na war vuwai par aŋ kai.

¹⁰War mefeŋ na ɗaiŋa e ɗi war gir ɗa, falakai zamai n’e diriɗi aliɗi gara ɵa tiɓ lai e di ɗi, e bindi aŋ walaɗi zi simi.

¹¹EPIƊ-ƊAI a va hiyni n’abai ɗe li amai, a hinasi hiyni n’abai ɗa edi, a tika afu piɗi Siyon ta, a ya haa azumai sini eziɗi zi tûûri ta.

¹²Ɗif a hiina ka hanɗa duk kai, paakai na midini afti kaalai, ɗai na midiɗi duniya gaini hlaiɗi kaalai, ɓa gawɗi Izrayel aga e niyi aha warɗi Yeruzalem ɗa.

¹³Hanɗa a za buri meefeŋ na wiiɗi ɗai ɗi na mini Alaw, gaini meefeŋ na wiiɗi paakaiɗi zi ɓaka, n’e mi felɗi ɗai na jrekai edi, aha war fuŋ n’abai hanɗa.

¹⁴E hini yaw e tûrli war futi maiɗi ɗai na malvanai nɵa, siɗi gaini didiɓi gaini fel, sapa na siɗi maa ɗif a kiɗa a tetemaŋ gaini tini kai.

¹⁵E ɗûûli piɗi maini nɵa: fiki edi ɗif na hi-hir a na halaɗi, fiki edi, fiki edi, ki tiki tiki sini kai, e rivi, e giliŋi arbaɗi ɗai, ɗai e miɗi: mi yumuɗumu aha sumu kai.

¹⁶EPIƊ-ƊAI gaini midini a ɵiriɗi edi ɵar, a firiya a tiliɗi wuzani arni kai. Ɗai e bindi e siɗi hormo wiiɗi paakai zi ɓaka kai, jaaɗi gaiɗi ɗai n’abakai n’arbaɗi ɗai kaalai.

¹⁷Kureɗ aryi nɵa sa aŋ biyi zinai n’a nava kai. Amai midini hlai zi gɗam par, mi ɗa ɵiɓi vulai wiini pinziba n’a halasi aŋ kûrɗiyi edi, amma a halasi kai.

¹⁸Ɗai ɗa arɗi eziyi nɵa ca, mi kiɗi mi wiyi war balamyi kai, dibiyi a nafu gobi, mefeŋyi gaini vi ta, nkam, dibiyi a cosi co.

¹⁹Nagai n’e siɗiyi gir aryi ɗa, kokolaiɗi ɗa, a suwa muka n’arbani hlai n’amai. E rifiyi amai sini huwuŋ, E tiki eziyi war basga na kaɗataŋ.

²⁰Ni na tiyi mi ɗi pini sa ɗa, Mesiyas na wiini EPIƊ-ƊAI ɗa, aŋ war daŋgai, war waŋ na wiiɗi. Ni na mi hiini waryi ɓa: pini spak na wiini, tiyi aga mi simni ɵeɗ arbaɗi pinzibaɗi ɗai na zamai ɗa.

²¹Firiyi wiiki, siŋki firyiki wiiki edi, tiki ɗai na Edom, na tiki na ki ɗa midini afti na Us ɗa, kop zi gir hanɗa aga ku tetemaŋ lai, aga a siiniku, aga ku hina edi ganala lai.

²²Siyon na juvi, meefeŋku a haza li edi, aga a kuku edi aŋ bege midini afti zamai kir kai, Edom na juvi, EPIƊ-ƊAI a n’a tala meefeŋku tiɓ, aga a siŋkasi tuwurku ɗa edi.