Read Mousgoum Yama zi tuwi 5 Bible Online

Yama zi tuwi 5 - Mousgoum bible

Yama zi tuwi 5

¹EPIƊ-ƊAI, hina muduku a kɵa gaini wala n’a na za siyi, mulasi arku, tala tirki n’e ɗa tirkiyi.

²Bulum na wiyi a bunda wiiɗi ɗai zamai, dalamyi ɗe aŋ wiiɗi ɗai na mi siɗiɗi kai.

³Tala, mi bindi aŋ ɗai zi huyakai, tamaiyi na maɵagai e ɗi kai, tamaiyi na falakai ɗe, e bindi maiɗi falakai na war greŋ nɵa.

⁴Yemyi ɗe mi wiriŋ na gaini wûri, luwuŋ zi yi ɗe mi wiriŋ na gaini wûri lai.

⁵Nagai n’e siɗiyi gir ɗa, e yivi midiyi nɵa ca, mi kiyi ca, si n’amla buriyi aŋ kai.

⁶Mi yimi tiyi na piɗi ɗai n’Egipte gaiɗi ɗai na Siriya, kapai mi nivi simi n’a kiɗiyi ta.

⁷Tamaiyi e zi tuwur, tiyana e ɗi kir kai, tiyana meefeŋɗi a hina na midiyi.

⁸Bagakai e bindi e ŋi midiyi, ɗif ktai n’a hûltiyi edi war tiɗi par aŋ kai!

⁹Kapai mi kisi wala zi simi aha ɗa mi tiki mriyi edi ta, buriɗi gorɓolokai n’e ɗi edi war basga.

¹⁰Amur-si ɗa a sawa maini fur nɵa, tini gir na wiini wiyamai ɗa.

¹¹E fini gaiɗi falakai ɗa aŋ gdaŋ aha war Siyon, e fini gaiɗi aliɗi na ɓulamai aŋ gdaŋ lai aha war fuŋ n’abakai na Yuda lai.

¹²Nagai gaini tiɗi, e rgiɗi paakai amai, Hormo na wiiɗi n’abakai n’arbaɗi ɗai aŋ kir kai.

¹³Aliyagoi n’agogoi e libi fuŋ zi siri, gawlakai e kikiyi pini luwuŋ zi libi.

¹⁴N'abakai n’arbaɗi ɗai e hili war faada kir kai, n’agogoi e zini yamaɗi zi firiyi kir kaalai.

¹⁵Firiyi na warɗi agulyi a vada edi vat, didimi na wiyi a bunda aŋ tuwi.

¹⁶Bogorai na midiyi te kɵa su, haw gara buriyi, buri mi zi tuwur!

¹⁷Mi bindi vaglakai, aryi a bunda a tala pɗem kaalai na buri hanɗa:

¹⁸buri na ɓa huwuŋ Siyon te tuwura kok, a bunda a hala warɗi ɗa a barka ceŋ-ceŋ.

¹⁹Tuku EPIƊ-ƊAI, tuku ku pai ɵa kureɗ, paramaiku te na ɵa haa hlai n’a vada kai na vada kai.

²⁰Muduku a wula gaiyi ɵa gamai buri maɗa? Ku hiniyi edi ɵa marwai buri maɗa?

²¹EPIƊ-ƊAI, wiyiyisi suku, tiyi aga mi wiyisi, bindiyi maini n’avut par ɗe nɵa.

²²Na ɓa ku tikiyi na ɗa piyi edi gamai kai ɗa, hiyku na siyi ɗa a suwa edi suwai.