Read Mousgoum Ezekiyel 1 Bible Online

Ezekiyel 1 - Mousgoum bible

Ezekiyel 1

¹War mefeŋ n’ag'aŋ ɵim na wiini tile n’ag'aŋ puɗu, na wiini buza n’ag'aŋ doogo doogo hu ɗa, mu nafu arbaɗi ɗai n’e yimiɗi e kiɗi edi midini afti zamai ɗa gobi ɵimani ra Kebar. Hlai n’amai ɗa a mala edi, mu tala wazagai zi siŋki na sini Alaw par.

²Mefeŋ n’ag'aŋ ɵim na wiini tile ni ɗa, buza n’ag'aŋ ɵim na wiini pai Yoyakim n’a zaŋ edi midini afti zamai ɗa.

³Midini afti na wiiɗi ɗai na Babilon gobi ɵimani ra Kebar, EPIƊ-ƊAI a muɗaŋa Seŋ wiini ta Ezekiyel n’ahini pai zi ɓaka Buzi, woni spakni EPIƊ-ƊAI a niya sa.

⁴Mu tala ara ɗa berber na gdaŋ a halasi war gal n’azumai par, a na hogosi ɗugul n’aba na sini paŋ a luma afu paŋ, arbani n’amlai a afu paŋ, a ŋala maini or na afu a ɵaŋ ɗa nɵa.

⁵Wazagai na karni puɗu amlai arbani afu tar ca, a sɗa maiɗi ɗai ɵa.

⁶Wala na karni paŋ ɗa wuzani arni puɗu puɗu, graŋni puɗu puɗu lai.

⁷Eziɗi ɗa gaini ɗiyi cir cir, eziɗi n’azumai ɗa maini, tötrök n’ezini ahi ɵeŋ nɵa, e ŋili maini kiya na gaini futini nɵa.

⁸War galɗi na puɗu paŋ, wuzani pini gaŋgraŋɗi ɗa, tiy woni tiɓ tiɓ. Wazagai na puɗu hanɗa paŋ, wuzani arni a na lai, gaŋgraŋni a na lai.

⁹Gaŋgraŋni gaini pi mini marni tiɓ tiɓ, won hlai n’a faka li aŋ hili ɗa, a kiɗa a bunda kai, a siya ɗi paŋ a hala wuzani cir cir.

¹⁰Wala na karni paŋ ɗa, wuzani sek ɗa a wuzani arni ɗif, midiɗi tini na wus ɗa a wuzani arni gurnai, midiɗi tini na muni ɗa, a wuzani gari, duɓani sek ɗa a wuzani arni Muka lai.

¹¹Wala na karni paŋ graŋni na sulu gaini yimi amai yaw, gaini pi mini marni tiɓ tiɓ, na sulu hanɗa ɗe sini gaini pi duk duk lai.

¹²Wala na karni paŋ ɗa, a hala wuzani cir, e hili ɗa war hlai n’e diri e hili woni sek ɗa, e fiki li aŋ hili ɗa, e kiɗi e bindi kai.

¹³Amlai arbani wazagai na karni na puɗu ɗa, wala ktai a na maini morjo na mekele hiliz ɗa nɵa, a tala maini afu na mini kalu z'afu nɵa, afuni ɗa a guna amlai arbani wazagai na puɗu na karni hanɗa, afu ni ɗa a za gaglai, wilɗi a niyasi edi sini par lai.

¹⁴Wazagai na karni hanɗa a hala a wayasi, a hala a wayasi, kokolai maini wilɗi nɵa.

¹⁵Won hlai na mu na tala wazagai na karni na puɗu hanɗa, mu tala ezini saret azumai su su ɵimani wazagai na karni ɗa wuzani arni na puɗu ɗa.

¹⁶Ezini saret na puɗu hanɗa a sɗa maini marni ɵa, a ŋala maini ahi-fuŋ krizolit nɵa, a rga maini marni ɵa, a za sda ɗa maini na ɓa azi paŋ te na amlai warɗi maiɗi ɗik ɗik.

¹⁷A faka li aŋ hili ɗa, a hala war gal na puɗu paŋ, a viyɗa war hlai zamai kai, sai wuzani cir.

¹⁸Azi hanɗa, mogoni n’amai sek ɗa a zi mili hunai pini ɗif, azi paŋ ɗa gaini gûni gun gaini tini wazagai zi ŋili.

¹⁹Won hlai na wazagai na karni a faka li aŋ hili ɗa, ezini saret ɗa ɵimani yaw aŋ hili lai.

²⁰Wazagai na karni hanɗa a hala woni hlai n’a daraŋ, ezini saret ɗa a hala gaini ktai, buri ɓa hiini na wiini wazagai na karni a nafu warni ezini saret ɗa.

²¹A faka li aŋ hili ɗa, ezini saret ɗa a faka gaiɗi lai, a ɗiya li ɗa, ezini saret ɗa a ɗiya ca lai. A faka li aŋ ɗufla ɗa, ezini saret ɗa a ɗufla gaini lai, buri ɓa hiini na wiini wazagai na karni ɗa a nafu warni.

²²Amai par midini wazagai na karni ɗa, wala ktai a sɗa maini midini dalam ɵa gaini yimi kaai, a ŋala maini ali-fuŋ kristal nɵa, gaini yimi amai par midiɗi kaai lai.

²³Graŋni wala na karni paŋ sulu, gaini yimi amai yaw pini wala na maini midini dalam ɵa sek, gaini tiki sini marni ta ta. Na sulu ɗa, na sulu ɗa a kusuɓa sini gaini, gaini pi sini duk duk lai.

²⁴Mu ɵina suura na gaŋgraŋni a zaŋ, won hlai n’a na hala ɗa, a na maini suura na wiini yem-ra n’abai ɗa nɵa, zaw maini wulani Alaw zi spak ɗa nɵa, a suura n’abai maini na wiiɗi vokɗi askarai nɵa, a ɗiya li ɗa, a yima gaŋgraŋni azumai yaw.

²⁵Amai midini wala na maini midini dalam ɵa n’aŋsi amai par midiɗi ɗa, wûle a wasi woni par. A ɗiya li ɗa, a yima graŋni azumai yaw.

²⁶Amai par midini wala na maini midini dalam ɵa n’aŋsi amai par midiɗi ɗa, wala a sɗa maiɗi Paramai ɵa, a ŋala maini ali-fuŋ Safir nɵa, wala ktai midini dam a sɗa maini ɗif ɵa.

²⁷Mu tala wala zamai ktai na ŋilini ɗa a luma afu, n’a sɗa maini afu ɵa, na sini paŋ afu sal, sini wuzani par ta haa amai, sin wuzani par ta haa azumai lai. Mu tala wala n’a sɗa maini afu ɵa, sini paŋ gaglai.

²⁸Gaglai na sini ɗa a sɗa maini kraŋ n’a ɵa amai arbani ɗugul nɵa, won hlai na faŋ a na ɵa ɗa nɵa, abai na wiini EPIƊ-ƊAI te tala maini hanɗa ɵa. Won hlai na mu tala hanɗa, mu kɵa azumai mu pa ara azumai, mu ɵini wulani ɗif a na muɗa.