Read Mousgoum Ezekiyel 10 Bible Online

Ezekiyel 10 - Mousgoum bible

Ezekiyel 10

¹Mu tala ara amai midini wala na maini midini dalam ɵa, n’aŋsi amai par midiɗi Kerubimkai ɗa, mu tala wala ktai na maini ahi-fuŋ safir ɵa, amai par midiɗi ɗa, wala ktai a sɗa maini paramaiɗi pai nɵa.

²Alaw a miɗini wiini ɗif na gaini sapa zi leŋ sini ɗa ɓa: Niya amlai arbani ezini Saretai n’a na azumai pini kerubimkai par ɗa, ku mulasi morjo war tuku gaini vi ta amai arbaɗi Kerubimkai par, hala ku pokoŋ midini fuŋ n’abai ɗa. Ɗif a niya amlai ara sini nɵa ca.

³Won hlai na ɗif a niya amlai na ɗa, kerubimkai ɗa e ɗifu war galni tempel n’amai par, ɗugul a viti pakatai n’aha ta.

⁴Abai na wiini EPIƊ-ƊAI te yima warɗi amai midiɗi Kerubimkai par te halasi mini magalani tempel ɗa sek, tempel ɗa a va gaini ɗugul ta, pakatai ɗa te va gaini ŋiliɗi abai na wiini EPIƊ-ƊAI.

⁵Suurani baada na gaŋgraŋni a wasi haa anene warɗi pakatai n’anene, kal kal maini wuulani Alaw zi spak paŋ Won hlai n’a na muɗa ɗa nɵa.

⁶Won hlai n’Alaw a miɗini wiini ɗif na sapa zi leŋ sini buri a hala a tikasi afu amlai arbani ezini Saret arbaɗi Kerubimkai par ɗa, a hala a ɗiya ɵimani ezini Saret ktai zaw.

⁷Kerubim zamai ktai a waa tini amlai arbaɗi kerubimkai midini afu n’a na amlai arbaɗi kerubimkai ɗa, a mulasi morjo, a vini tini ɗif na gaini sapa zi leŋ sini ɗa. Ɗif a yimaŋsi, a niyasi anene gaini.

⁸Wala ktai a sɗasi amlai pini gaŋgraŋɗi Kerubimkai par maini tini ɗif ɵa tiɓ tiɓ.

⁹Mu tala ara ɗa ezini Saret puɗu ɵimani kerubimkai ca. Kerubim paŋ ɗa ezini Saret ɵimani zaw zaw. Ezini Saret hanɗa a ŋala maini ahi-fuŋ krisolit nɵa.

¹⁰Azi na puɗu hanɗa a tala, a sɗa maini marni ɵa, azi paŋ te tala maini na ɓa te na amlai warɗi maiɗi ɗik ɵa.

¹¹A faka li aŋ hili ɗa, a hala war gal na puɗu paŋ, a viiɗa warni hlai zamai kai. A hala pini hlai n’arni aŋ woni sek ɗa, a viiɗa woni hlai zamai kai.

¹²Siɗi kerubimkai paŋ, duɓaɗi lai, tiɗi lai, gaŋgraŋɗi lai, gaini gûni gun tini wazagai zi ŋili, ezini Saret na puɗu n’a na azumai piɗi nɵa lai.

¹³Mu tala e ɗa yiki ezini Saret hanɗa ɓa: Avulvuli.

¹⁴Kerubim paŋ ɗa wuzani arni puɗu puɗu: N'avut ɗa a wuzani arni Kerubim, n’ag'aŋ sulu ɗa a wiini ɗif, n’ag'aŋ hu a wiini gurnai, n’ag'aŋ puɗu a wiini muka lai.

¹⁵Kerubimkai ɗa e yimi warɗi amai arbani hlai, a wazagai na karni na mu talaŋsi wulani ra na Kebar.

¹⁶Won hlai na kerubimkai e fiki li aŋ hili ɗa, ezini Saret ɗa a hala gaiɗi lai. Won hlai n’e yimi gaŋgraŋɗi li amai aŋ ɗufli ɗa, azi ɗa a ɗufla gaiɗi lai.

¹⁷Won hlai n’e ɗiyi li ca ɗa, azi ɗa a ɗiya ca lai, e fiki li amai ɗa, a faka amai gaiɗi lai, buri ɓa hiini na wiini wazagai na karni ɗa a nafu warni lai.

¹⁸Abai na wiini EPIƊ-ƊAI te yima siɗi edi mini magalani tempel ɗa par, te hala te ɗiya amai par midiɗi kerubimkai zaw.

¹⁹Kerubimkai ɗa e yimi gaŋgraŋɗi amai, aŋ yimi warɗi amai midini afti par wuzani ara, azi a yima amai gaini ktai lai. Kerubimkai e hili e ɗiyi mini magala na wiini tempel na wiini EPIƊ-ƊAI piɗi futi na dawai par ca, abai na wiini Alaw na wiiɗi Izrayel te nafu amai midiɗi amai par.

²⁰Mu talasi wazagai na karni hanɗa azumai par pini Alaw na wiini Izrayel gobi ɵimani ra na Kebar ɗa, a yima mada ɓa e ɗi kerubimkai.

²¹Kerubim paŋ ɗa, wuzani arni puɗu puɗu, gaŋgraŋni puɗu puɗu lai, azumai pini gaŋgraŋni ɗa wala ktai maini tini ɗif ɵa gaini pi tiɓ tiɓ lai.

²²Wuzani arɗi ɗa a tala maini wuzani arai na mu talaŋsi gobi ɵimani ra na Kebar ɗa nɵa, a tala maini marni ɵa kal kal, e ɗi nagai dama, Kerubim paŋ ɗa a hala wuzani cir cir.