Read Mousgoum Ezekiyel 11 Bible Online

Ezekiyel 11 - Mousgoum bible

Ezekiyel 11

¹Smer na wiini EPIƊ-ƊAI a yimaŋa amai, a kaŋa mini magala na wiini tempel na wiini EPIƊ-ƊAI n’a na piɗi futi na dawai par, arni piɗi dawai sek ɗa, ɗai e ɗifu mini caɓa pi ɵim, Yazaniya n’ahini Azur gaini Pelatiya n’ahini Beneya lai, abakai na wuzaɗi ɗai e ɗifu arbaɗi.

²A muɗaŋa: Ɗif murɗek, hanɗa e ɗi ɗai n’e hiini ɗa midini sda na maafanai, n’e si aha warɗi Yeruzalem ɗa a gadai na maafanai lai.

³E miɗi ɓa: Sarti na mu rgumu dalam aha warɗi Yeruzalem warni ɗa a na hai, fuŋ n’abai na Yeruzalem ɗa a na maiɗi doknai ɵa, tumu ɗa, mu ɗumu neŋ na warɗi lai.

⁴Buri nɵa, muɗa siɗi maiɗi ɗai na mini Alaw ɵa, muɗa siɗi ɗif murɗek.

⁵Nɵa smer na wiini EPIƊ-ƊAI a niya sa, a muɗaŋa: ku miɗiɗi ɓa, EPIƊ-ƊAI a na muɗa maini nɵa, tiki ɗai na Izrayel ki ɗa miɗi nɵa, nɵa, nɵa. Wala na ki ɗa hiiniŋ ɗa mu sɗaŋ ya.

⁶Ki fiɗi ɗai viya aha warni fuŋ n’abai hanɗa, haa ki vi futi ɗa gaini kopoŋɗi ɗai zi mri ta lai.

⁷Buri nɵa, Epiɗ-ɗai Alaw a na muɗa maini nɵa: Ɗai na ku fiɗiɗi ɗa, na ku pûkûɗi arbani fuŋ n’abai ɗa puk puk ɗa, nagai ɗa e ɗi neŋ ɗa, fuŋ n’abai ɗa te doknai ɗa lai, amma tiki ɗa, aga mu birgiki edi won na par.

⁸Tiki ɗa hunai piki wuzani gaw ɗa ta, amma aga mu hinasi gaw miɗiki, a miɗi na sini Epiɗ-ɗai Alaw par.

⁹Aga mu birgiki edi warni fuŋ n’abai ɗa par, mu siki war tiɗi ɗai n’edi par, ta aga mu zitiki sariya na wiya.

¹⁰Aga ki mri mini gaw, aga mu zitiki sariya aha midini afti na wiiɗi Izrayel ɗa mal, kapai a yima miɗiki ɓa EPIƊ-ƊAI muta.

¹¹Fuŋ n’abai ɗa aga a za aŋ doknai buriki kai, tiki ɗe aga ki zi aŋ neŋ na warni kaalai, aga mu zitiki sariya aha midini afti na wiiɗi Izrayel ɗa mal.

¹²Nɵa aga a yima miɗiki ɓa: EPIƊ-ƊAI muta, tiki na ki yimi gadaiŋa zi ɗû kai, ki zi pini gadaiŋa zi ɗiyi kaalai, amma ki zi ɗa pini gadai na wiiɗi pinzibaɗi ɗai n’e gûniki azumai ɗa.

¹³Won hlai na mu tika pa aŋ muɗa seŋ maiɗi ɗai na mini Alaw ɵa ɗa, Pelatiya n’ahini Benaya a kɵa azumai a mra. Mu bula sa azumai, mu pa ara azumai tiɓ, mu ɗuula, mu muɗa: Hai! Epiɗ-ɗai Alaw, ku vidiɗi piɗi Izrayel n’a hina edi na ɗa ku tuku pra ɗi?

¹⁴EPIƊ-ƊAI a muɗaŋa seŋ, a muɗaŋa maini nɵa ɓa:

¹⁵Ɗif murɗek, ɗai na Yeruzalem ɗa e miɗiɗi wiiɗi tawalakaiku, wiiɗi zagalakaiku gaiɗi aliɗi Izrayel n’e ɵiri edi paŋ na ɗa ɓa: Simnisi edi gaigai sini EPIƊ-ƊAI ɗa, afti hanɗa a siŋyi aŋ wiyi ta.

¹⁶Buri nɵa ku miɗiɗi ɓa: Epiɗ-ɗai Alaw a na muɗa maini nɵa: Ɓa koo mu birgiɗi edi arbaɗi ɗai, mu ɵiriɗi edi midini afti paŋ kaw ɗi ɗa, hlai na e hili woni paŋ ɗa, mu na arbaɗi ɗa maini woni hlai na sɗik nɵa.

¹⁷Buri nɵa, ku miɗiɗi ɓa: Epiɗ-ɗai Alaw a na muɗa maini nɵa: Aga mu tipikisi edi arbaɗi pinzibaɗi ɗai par, mu diŋgikisi edi midini afti na ki ɵiri edi midini kiini kiini par, aga mu siki afti na wiiɗi Izrayel.

¹⁸Won hlai n’e wiyisi li ɗa, aga e hili, aga e fidi siiwa na haharai n’e ɗa ziŋ wiini alawai zi rgi ɗa edi gaini sdakai na maafanai paŋ lai.

¹⁹Aga mu sitiki agul na hahai, aga mu waa hiini na hehe warki, aga mu tikiti agulki zi kriyit ɗa edi, mu sitiki agul zi neŋ,

²⁰kapai e zi pini gadaiŋa zi ɗû, e yimi gadaiŋa zi ɗiyi, e zi pini lai. Nɵa aga e bindi aŋ ɗaiŋa, ta aga mu bunda aŋ Alaw na wiiɗi lai.

²¹Amma nagai na agulɗi a nagga sini alawai zi rgi gaini sdaɗi na haharai ɗa, payaiɗi na meefeŋ ɗa aga mu zilbaŋ war tiɗi. A miɗi na sini EPIƊ-ƊAI par.

²²Kerubimkai e yimi gaŋgraŋɗi amai, ezini Saret a faka aŋ hili gaiɗi lai. Abai na wiini Alaw na wiiɗi Izrayel ɗa te nafu amai midiɗi amai par.

²³Abai na wiini EPIƊ-ƊAI te zogosi aha warni fuŋ n’abai ɗa par, te ɗiya midiɗi huwuŋ na te na piɗi futi na dawai par, tini fuŋ n’abai ɗa zaw.

²⁴Smer na wiini EPIƊ-ƊAI a tikaŋa, a kaŋa war Babilon, siɗi nagai n’e kiɗi edi woni aŋ bege ɗa, wala n’a siŋka ara hanɗa a za pini smer na wiini Alaw, asakal par wala n’a siŋ ka ara ɗa a ɗiya zaw.

²⁵Mu miɗiɗi seŋ paŋ n’EPIƊ-ƊAI a siŋkaŋŋa ara ɗa wiiɗi nagai n’e kiɗi edi aŋ bege ɗa.