Read Mousgoum Ezekiyel 12 Bible Online

Ezekiyel 12 - Mousgoum bible

Ezekiyel 12

¹EPIƊ-ƊAI a muɗa seŋ, a muɗaŋa ɓa:

²Ɗif murɗek, ku sumna na ɗa arbaɗi pinzibaɗi ɗai a hraŋai, n’e ɵini Gat kai, arbaɗi ɗai n’arɗi a na, amma a tala kai, ɵimaɗi a na amma a ɵina kai buri ɓa e ɗi pinzbaɗi ɗai na hraŋai.

³Tuku ɗif murɗek, rga wazagaiku ɓak ɓak, maini na ɗai n’e kiɗi edi aŋ bege e rgiŋ ɗa ɵa. Hala edi aŋ bege girvudi wuzani arɗi paŋ. Faka war hlai na k’aŋ woni par midini zamai wuzani arɗi paŋ, ablaŋtaŋkai n’aga e siɗi ɓa e ɗi pinzibaɗi ɗai na hraŋai ɗi ɗa.

⁴Ku mulasi zakku anene, wuzani arɗi paŋ, tuku ku niyasi anene koskoi wuzani arɗi paŋ lai, maini na ɗai n’e kiɗi edi aŋ bege e ziŋ ɗa ɵa.

⁵Wuzani arɗi pra, kuɓula ɓla baŋa arni ɵaga tiɓ, ku wasi zakku anene warni ɗaw.

⁶Wuzani arɗi ku tikaŋ amai wulaku ta, ku niyasi anene gaini arni gegeŋ ɗa, ku bara wala arku bar, kapai ku tala hlai na ku hala woni sek ɗa kai, buri mu firiya ɓa ku za aŋ wala zi zaida buriɗi aliɗi Izrayel.

⁷Mu za wala n’EPIƊ-ƊAI a muɗaŋa midini ɗa, mu mulasi zakŋa anene girvudi, maini zak na wiiɗi ɗai n’e kiɗi edi aŋ bege ɗa nɵa. Koskoi ɗa mu ɓula ɵaga ɗa gaini ta, mu kaŋsi anene mu tikaŋ amai wula wuzani arɗi ta.

⁸Dawaini gorof par ɗa, EPIƊ-ƊAI a muɗaŋa seŋ, a muɗaŋa ɓa:

⁹Tuku ɗif murɗek, aliɗi Izrayel, pinziba na hraŋai, n’e ɵini Gat kai hanɗa aga e ɵbuku tetew ɓa, na ku za ɵa na ɗa a maɗa?

¹⁰Aga ku wiyiɗi seŋ ɓa: Epiɗ-ɗai Alaw a na muɗa maini nɵa, hanɗa a zaida sini pai n’a na war Yeruzalem gaiɗi ɗai na warɗi paŋ.

¹¹Ku miɗiɗi ɓa: Ta mu wala zi zaida buriki, na mu zaŋ na ɗa a wala n’aga a za siki, aga e kiki edi aŋ bege, ki hili edi midini afti zamai.

¹²Pai n’a na arbaki ɗa aga a luba zakni ɗa amai wulani arni gegeŋ, aga a niyasi edi war fuŋ n’abai ɗa par. Aga e ɓili waŋ siɗi zilaagai ɗa tiɓ, kapai e yimiŋsi anene warni ɗaw. Aga a bara wala arni bar kapai a tala hlai n’a hala woni ɗa kai.

¹³Ta EPIƊ-ƊAI aga mu gaŋa azaw ezini, mu yimaŋ, mu kaŋ a Babilon midini afti na wiiɗi Kaldeyakai amma aga a talaŋ gaini arni kai, a mra woni.

¹⁴Nagai n’abakai n’e ɗa gaini, ɗai n’e giɗimiŋ gaiɗi askarai na wiini lai, aga mu ɵiriɗi war koŋni hlai paŋ, aga mu birgiɗi piɗi gaini kaɵkar.

¹⁵Won hlai na mu ɵiriɗi li edi arbaɗi pinziba na zamai, midini afti na zamai lai ɗa, aga a yima midiɗi ɓa: EPIƊ-ƊAI ɗa muta.

¹⁶Amma aga mu hina ɗai zamai karɗi agwi, pini gaw ɗa par, piɗi wiyamai par, pini vlak ɗa par lai, kapai e miɗiɗi wiiɗi pinzibaɗi ɗai n’e hili arbaɗi paŋ gaini sda na haharai n’e ziŋ ɗa. Nɵa aga a yima midiɗi ɓa, ta m’EPIƊ-ƊAI.

¹⁷EPIƊ-ƊAI a muɗa seŋ pra na muɗaŋa ɓa:

¹⁸Tuku ɗif murɗek, aga ku suma simi na muku gaini ziriyi, ku ca yem ɗa war hunai, hunai na buri dawai aga a hunuku kaalai.

¹⁹Asakal par ku miɗiɗi wiiɗi ɗai na midini afti ɗa ɓa: Epiɗ-ɗai Alaw a muɗa siɗi ɗai na war Yeruzalem, midini afti na wiiɗi Izrayel ɗa maini nɵa: Aga e simi simi na miɗi ɗa war hunai na buri dawai, e ci yem ɗa war ziriyi na tini hunai, buri aftiɗi ɗa aga a tuura edi gaini wazagai na warni paŋ, wala ktai maa aga a hina kai, buri karai na wiiɗi ɗai n’e simni warɗi ɗa paŋ.

²⁰Fuŋ n’abakai na ɗai woni ca ca ɗa, aga a bunda edi aŋ greŋ, afti ɗe aga a tuura edi lai, nɵa aga a yima midiki ɓa ta m’EPIƊ-ƊAI.

²¹EPIƊ-ƊAI a muɗa seŋ, a muɗaŋa ɓa:

²²Tuku ɗif murɗek, seŋ na ki ɗa miɗiŋ araki midini afti na Izrayel ɓa: Mefeŋ ɗa a riya na ɗa wuzani sek, wala zi siŋki ɵa ɗa buri maɗa?

²³Buri hanɗa, mu miɗiɗi ɓa: Epiɗ-ɗai Alaw a na muɗa maini nɵa: Aga mu ɗiya seŋ ni ɗa, ɗif aga a muɗaŋ war Izrayel kir kai, ku miɗiɗi ɓa: Tiyana ɗa, mefeŋ a ŋasi gobi, wala zi siŋki n’aga a va amai kai ɗa aŋ kir kai.

²⁴Wala zi siŋki na jre kai gaini seŋ na wuze z'eles arbaɗi aliɗi Izrayel ɗa aga a za kir kai.

²⁵Buri Ta m’EPIƊ-ƊAI, seŋ na mu muɗaŋ li ɗa, aga a va amai gaini yafai kai. Tiki pinziba na hranai, na ki ɵini Gat kai, war mefeŋ na wiki tiyana ɗa, aga mu muɗa seŋ ktai, mu vaŋ amai lai. A miɗi na sini Epiɗ-ɗai Alaw par.

²⁶EPIƊ-ƊAI a muɗaŋa seŋ, a muɗaŋa:

²⁷Tuku ɗif murɗek, ɗai na Izrayel ɗa e ɗa miɗi maini nɵa: Wala n’a siŋka arni Ezekiyel na ɗa, a na burini meefeŋ na girna ɗa kai; seŋ n’a muɗaŋ war wûle na wiiɗi ɗai na mini Alaw na ɗa, a wala n’a za ɗa haa wuzamu sek gai gai.

²⁸Buri nɵa, ku miɗiɗi ɓa: Epiɗ-ɗai Alaw a na muɗa maini nɵa: Seŋ paŋ na mu muɗaŋ li ɗa, aga a va amai gaini yafai kai. A miɗi na sini Epiɗ-ɗai Alaw par.