Read Mousgoum Ezekiyel 13 Bible Online

Ezekiyel 13 - Mousgoum bible

Ezekiyel 13

¹EPIƊ-ƊAI a muɗa seŋ a muɗaŋa ɓa:

²Tuku ɗif murɗek, muɗa war wûle na wiiɗi ɗai na mini Alaw siɗi ɗai na mini Alaw na war Izrayel, ku muɗa siɗi nagai n’e miɗi pin hiini na wiiɗi dama ɗa ku miɗiɗi ɓa, e zibiri seŋ na mu na miɗiŋɗi ɗa.

³Epiɗ-ɗai Alaw a na muɗa maini nɵa: Haw gara buriɗi ɗai na min Alaw zi duulakai, n’arɗi a tala wala ktai kai, amma e zi pini hiini na wiiɗi ɗa.

⁴Tiki ɗai na Izrayel, ɗaiki na mini Alaw e ɗa maini huɗi na war hlai zi greŋ ɗa ɵa.

⁵Buri tiki kirgi arɗi zilaagai n’a ho azumai ɗa amai kai, ki rgi ɵaga amai siɗi ɗai na Izrayel kapai ki niyi aha warni war mefeŋ zi hatam, mefeŋ zi hiy na wiini EPIƊ-ƊAI ɗa kai.

⁶Wala n’a siŋka arɗi ɗa jreni aŋ kai, seŋɗi na wuze ɗe a eles kadai, e miɗi ɓa: A miɗi na sini EPIƊ-ƊAI par, paŋ ktai ta EPIƊ-ƊAI, mu ɵiniɗiɗi kai, amma e ɗa biyi ɓa seŋɗi ɗa aga a va amai.

⁷Tiki ɗai na mini Alaw ɗa, wala na ki miɗi ɓa a siŋka arki na ɗa a jre kai kai ɗi? Seŋ na wuze na ki miɗiŋ na ɗa a eles kai ɗi? Ki miɗi ɓa: A miɗi na sini EPIƊ-ƊAI par, paŋ ktai, mu muɗa kai ɗa koo.

⁸Buri hanɗa, ta Epiɗ-ɗai Alaw mu muɗa ɓa: Buri na ɓa seŋki ɗa a jre kai, wala n’a siŋka arki ɗa a eles lai ɗa, ta m’aŋ gaiki kai.

⁹Aga mu faka amai siɗi ɗai na mini Alaw na wala n’a siŋka arɗi ɗa a jre kai, na seŋɗi na wuze ɗa a eles kadai lai ɗa, aga e simni warni diŋgi na buri kitini-mi na wiiɗi ɗaiŋa kai, yikiɗi aga a ɗo war maktuɓ na wiiɗi pinzibaɗi Izrayel ɗa kai, aga e niyi aha midini afti na Izrayel ɗa kaalai, kapai a yima midiɗi ɓa, ta m’EPIƊ-ƊAI.

¹⁰Nagai e wûliɗi ɗaiŋa edi gaini miɗi na ɓa: A hina tiyana ɗa a ɵeɗ, paŋ ktai ɵeɗ aŋ kai, ɗaiŋa e gi ɵaga ɗa, nagai e ɵiɓiŋ gaini afti n’a ziyho.

¹¹Miɗiɗi wiiɗi nagai n’e ɵiɓiŋ ɗa ɓa: Zlaga ni ɗa aga a kɵa, faŋ n’abai a na gizi, wutiŋ aga a yaka, berber na gdaŋ aga a haɗa wazagai azumai.

¹²Won hlai na zilaagai te haɗa li azumai ɗa, ɗai aga e zilbiki ɓa: Afti na ki ɵiɓiti gaini ɗa, aŋ wata pra, ɗa kai ɗi?

¹³Buri hanɗa, EPIƊ-ƊAI a na muɗa maini nɵa: War suwarŋa ɗa aga mu hinasi berber na gdaŋ, faŋ n’abai aga a ɵa, wutiŋ aga a yaka gdaŋ, a tuura wazagai edi lai.

¹⁴Zlaagai na ki ɵiɓi siɗi gaini afti ɗa aga mu hiɗiti azumai, mu hiɗiti haa azumai ta. Eziɗi zi tûûri ɗa aga a hina amai kadai suuwa, aga mu hiɗiti azumai, warɗi par ɗa aga e vidiki edi.

¹⁵Hiyŋa na siɗi ɵagai gaiɗi nagai n’e ɵiɓiti ɗa, aga mu ɵaŋ haa edi su, aga mu miɗiki ɓa ɵaga aŋ kir kai! Nagai n’e ɵirɓiŋ ɗe, ɗif kir kaalai.

¹⁶Ɗai na min Alaw na war Izrayel n’e ɗika e miɗi midiɗi Yeruzalem, n’e ɗika e miɗi ɓa: A hina tiyana a ɵeɗ, kapai na ɗa ɵeɗ aŋ kaalai, ktai maa aga a hina kai, a miɗi na sini EPIƊ-ƊAI par.

¹⁷Tuku ɗif murɗek, muɗa war wûle na wiiɗi ɗai na mini Alaw na falakai, n’e zi siɗi aŋ ɗai na mini Alaw na falakai pini hiini na wiiɗi dama ɗa,

¹⁸ku miɗiɗi ɓa: Epiɗ-ɗai Alaw a na muɗa maini nɵa: Haw gara buriɗi falakai n’e ziygi sapa na laara, n’e niggiŋ wulani tiɗi, n’e hi adiko sini humokni ɗif ɗif kapai ki yimi sezeɗi ɗai gaini, kapai ki yimiɗi ɗaiŋa ɵa haa na ɗa, tiki ki hini wiki kiɗi?

¹⁹Tiki ki miisiŋa wuzaɗi ɗaiŋa burini orge na tiy zuguɗ zuguɗ kadai gaini wala zi simi n’agwi kadai lai. Won hlai na ki ɗa ziɗi eles wiiɗi ɗaiŋa n’e ɗa yimi eleski ɗa, nagai na tiɓ e fiɗiɗi edi ɗa, ki fiɗiɗi kai, ki fiɗiɗi na ɗa, e ɗi nagai na tiɓ e fiɗiɗi edi kai ɗa.

²⁰Buri hanɗa, EPIƊ-ƊAI a na muɗa maini nɵa: Aga mu za wala sini sapa na laara na ki rgiŋ wulani tiki, na ki yimi ɗai gaini maini wala ɗufli nɵa ɗa, aga mu ɓasaŋ edi, aga mu mulaŋ edi wulani tiki par, mu piliɗi nagai na ki yimiɗi gaini maini wala zi ɗufli ɵa ɗa edi lai.

²¹Aga mu ɓasa adikoki ɗa edi, aga mu pla ɗaiŋa edi war tiki par, kapai ki zi sda gaini maini azaw ɵa kir kai, kapai a yima midiki ɓa ta m’EPIƊ-ƊAI.

²²Buri ɓa tiki ki ɓilkiɗi hiiniɗi ɗai na jre kai gaini seŋki z'eles ɗa, paŋ ktai ta ɗa mu ɓilkiɗi hiiniɗi kai, ki hûgûɗi na maafanai piɗi haa e kiɗi e wiyisi edi warɗi futi na pɗemi kir kai. A wala na kadai tiɓ e kiɗi e simni karɗi burini ɗa.

²³Wala n’a siŋka arki na jre kai ɗa, aga a za kir kai, seŋ na wuze z'eles ɗa aga a ɗiya lai. Aga mu piliɗi ɗaiŋa edi war tiki par, nɵa aga a yima midiki ɓa ta m’EPIƊ-ƊAI.