Read Mousgoum Ezekiyel 14 Bible Online

Ezekiyel 14 - Mousgoum bible

Ezekiyel 14

¹Mefeŋ ktai zamai arbaɗi abakai n’arbaɗi ɗai na Izrayel e hilisi sa esimni azumai wuza ca.

²EPIƊ-ƊAI a muɗa seŋ, a muɗaŋa ɓa:

³Tuku ɗif murɗek, ɗai hanɗa, alawai zi rgi na wiiɗi a na amlai warɗi agulɗi, mefeŋ paŋ hangalɗi aŋ gaini tiki midini wala n’a kiɗi aŋ zi tuwur ɗa, nɵa na ɓa e zilbiŋa li ɗa, mu wiyiɗi seŋ kiɗi ɗi?

⁴Buri hanɗa ku muɗa gaiɗi, ku miɗiɗi ɓa: Epiɗ-ɗai Alaw a na muɗa maini nɵa: Ɗif na Izrayel paŋ, na alawai zi rgi na wiini a na amlai warɗi agulni, n’a tika hangalni midini wala n’a kaŋ aŋ za tuwur, na ɓa ɗif a halasi li mini ɗif na mini Alaw ɗa, aga mu wiyini seŋ ɗa muta EPIƊ-ƊAI won hlai n’a halasi li ɗa. Aga mu za hanɗa pin alawai zi rgi na viya ɗa.

⁵Nɵa aga mu yimasi hiiniɗi aliɗi Izrayel paŋ n’e hiniŋa edi burini alawaiɗi zi rgi ɗa.

⁶Buri hanɗa, miɗiɗi wiiɗi ɗai na Izrayel ɗa ɓa, Epiɗ-ɗai Alaw a na muɗa maini nɵa: Wiyisi sa, sini duɓaki wiini alawai zi rgi na wiiki, hinisi wazagai na haharai na ki ɗa ziŋ ɗa paŋ edi.

⁷Buri ɓa ɗif na Izrayel paŋ, zaw zi zak n’a sumna aha war Izrayel paŋ, n’a hinaŋa edi, na alawai zi rgi na wiini a na warɗi agulni, n’a tika hangalni midini wala n’a kaŋ aŋ zi tuwur ɗa, - na ɓa ɗif hanɗa a halasi mini ɗif na mini Alaw aŋ zilba dirini ɗa, aga mu wiyini seŋ ɗa muta EPIƊ-ƊAI gaini mada dama.

⁸Aga mu faka gaini, mu zaŋ aŋ wala zi siŋki, aŋ wala na ɗai e miɗi seŋ joro gaini, aga mu hazaŋ edi arbaɗi ɗaiŋa par. Nɵa aga a yima midiki ɓa ta m’EPIƊ-ƊAI.

⁹Na ɓa ɗif na min Alaw a hina sini li piɗi aŋ ɗûûli, a wiyiɗi seŋ li lai ɗa, mu duula ɗif na mini Alaw ni ɗa muta EPIƊ-ƊAI, aga mu zini wala n’arni a talaŋ, mu hazaŋ edi arbaɗi Izrayel na ɗaiŋa par.

¹⁰Nagai sulu paŋ meefeŋɗi aga a pɵa midiɗi, meefeŋ na wiini ɗif na mini Alaw gaini meefeŋ na wiini ɗif n’a halasi mini aŋ zilba dirini ɗa, a ni ktai.

¹¹Kapai ɗai na Izrayel ɗa e wili edi sa par gaigai kir kai, kapai e bindi siɗi haharai gaini hi n’amai midini gadai na wiiɗi kai, nɵa aga e bindi aŋ ɗaiŋa, ta mu bunda aŋ Alaw na wiiɗi lai. A miɗi na sini Epiɗ-ɗai Alaw par.

¹²EPIƊ-ƊAI a muɗaŋa seŋ, a muɗaŋa ɓa:

¹³Tuku ɗif murɗek, na ɓa ɗai na midini afti ktai e zi tuwur li sa war zini wazagai na haharai ɗa, na ɓa mu faka li gaiɗi, mu yima simi na wiiɗi li edi, na ɓa mu ɵina wiyamai li midiɗi, na ɓa mu vidiɗi ɗai gaini wazagai n’ezini puɗ puɗu li edi,

¹⁴amma na ɓa, arbaɗi ɗa, Nowa, Daniyel gaini Yob, ɗai na hu hanɗa ɓa e ɗa ɗa, nagai suŋfaɗi aga a kurɗa burini jre na wiiɗi. A miɗi na sini Epiɗ-ɗai Alaw par.

¹⁵Na ɓa mu hinasi li wazagai n’edi buza na sabapai midini afti paŋ, a fiɗiɗi aliyagoi edi, na afti ni ɗa a bunda aŋ basga na ɗif a vuga woni kai burini wazagai hanɗa,

¹⁶koo ɓa ɗai na hu hanɗa e ɗa midini afti hanɗa ɗi, jre zaŋ a miɗi na sini Epiɗ-ɗai Alaw par, aga e kûrɗi ahi na wus edi kaalai, na muni kaalai, e kûrɗi ɗa e ɗi nagai kiiɗi.

¹⁷Zaw na ɓa mu hinasi gaw midini afti hanɗa, na ɓa mu muɗa liɓa: Gaw suma afti hanɗa, na ɓa mu vidiɗi ɗai gaini wazagai na karni ɗa edi,

¹⁸amma na ɓa ɗai na hu hanɗa e ɗa arbaɗi ɗa, jre zaŋ a miɗi na sini EPIƊ-ƊAI par, aga e kûrɗi ahiɗi na wus kaalai, na muni kaalai, e kûrɗi ɗa e ɗi nagai kiiɗi.

¹⁹Zaw na ɓa mu ɵina li vlak midiɗi afti hanɗa, na ɓa mu siŋka suwar na wiya li edi sini gaini gir n’a fuɗa ɗai, gaini wazagai n’ezini puɗu puɗu lai edi ɗa,

²⁰amma na ɓa midini afti hanɗa, na ɓa ɗai na maini Nowa ɵa, Daniyel ɵa, Yob ɵa, ɗai na hu hanɗa e ɗa ɗa, Jre zaŋ, a miɗi na sini Epiɗ-ɗai Alaw par, aga e kûrɗi ahiɗi na wus edi kaalai, na muni edi kaalai, pini jre na wiiɗi ɗa, e kûrɗi ɗa a suŋfaɗi taaha.

²¹Aakam, Epiɗ-ɗai Alaw a na muɗa maini nɵa: mu ɵinaɗi gir n’abakai na puɗu na mu ziti sariya gaini ɗa midiɗi Yeruzalem ya: Gaw, wiyamai, wazagai n’edi buza na sabapai gaini vlak lai, kapai mu vidiɗi ɗai gaini wazagai n’ezini puɗu puɗu gaini.

²²Arbaɗi maɵagai gaiɗi falakai ɗa, zamai aga e hini karɗi, aga e niyiɗi edi lai, aga e cûɗi siki, aga ki tili payaiɗi gaini sdaɗi ɗa. Gir na mu hinaŋsi midiɗi Yeruzalem gaini sda zamai zamai na mu zaŋ siɗi paŋ aga a siki gdaŋ.

²³Nagai aga e siki gdaŋ, won hlai n’aga ki tili payaiɗi gaini sdaɗi ɗa. Nɵa, aga a yima midiki ɓa: Wala na mu zaŋ siɗi Yeruzalem ɗa mu zaŋ ɗa kadai meere kai. - A miɗi na sini Epiɗ-ɗai Alaw par.