Read Mousgoum Ezekiyel 16 Bible Online

Ezekiyel 16 - Mousgoum bible

Ezekiyel 16

²Tuku ɗif murɗek, siŋkiɗi meefeŋ na wiiɗi Yeruzalem ɗa.

³Ku miɗiɗi ɓa: EPIƊ-ƊAI a na muɗa siɗi Yeruzalem maini nɵa: Aftiɗi tiyakaiku ɗa ta Kanaan, tuku ɗe ku a woni lai, a puku ɗa a Amorit, amuku te Hittite lai.

⁴Sarti n’e pukuku ɗa, mefeŋ ni ɗa ɗif a ɗûkûliti kuftiku kai, e wuku arni yem n’a zuku edi hilu kai, e girdi manta suku kai, e fuɗuku warni sapa kaalai.

⁵Ɗif ktai n’a hiina haw buriku aŋ za ktai arbani wazagai hanɗa suku aŋ kai. Maa mefeŋ na ku wa woni ɗa, e buluku edi basga su buri ɓa miɗi puku kai.

⁶Mu na vuga ɗaw ɗa, mu tuluku ku na ɵada arni felku ɗa, mu muɗuku ɓa: gaini fel na ku na arni paŋ ɗa, sumna karku. Mu muɗuku ɓa: Sumna karku arni felku.

⁷Mu wuluku haa amai maini luwuŋ n’edi basga ɵa, ku va edi aŋ ɓulmi kiŋ, ku za amai, ku bunda juvi gara. Fiyaw a pasi muku, ayir a diya digirku. Amma ku nafu ganala, ganala sul.

⁸Mefeŋ zamai mu na vuga ɗaw, mu tuluku ɗa, ku za aŋ fana gaini wus ta, mu baraɗi mini sapaŋa muduku, mu ŋoya ganalaku, mu huku wala ma, mu za bonu gaiku lai. - A miɗi na sini Epiɗ-ɗai Alaw par. - Asakal hanɗa ku hina aŋ wiya.

⁹Mu muku suku edi gaini yem yok yok, mu girda fel na suku edi sek sek, mu yumuku emel suku kaai kaai,

¹⁰Mu suku sapa zi tihiri, mu suku harabak z'amurni hilif Dofen, santir zi leŋ, borgo na gaini futini lai.

¹¹Mu wuku wazagai zi gaŋ suku: Wala na wulani tuku, aidaw na wulaku,

¹²wala na merfeŋku, wala na ɵimaku gaiɗi bogorai na te ŋala gara muduku lai.

¹³Nɵa wazagaiku zi gaŋ na wiiku ɗa, a zi or gaini arzaŋ, sapa na suku ɗa a zi leŋ na gaini futini, gaini z'aduzi na wiini musuɗek gaini sapa na gaini tihiri lai. Ku suma ɗa a avudi na hiniŋ, a emel ami gaini emel lai. Ku bunda juvi a suwa n’avut ɗa pra, ku juva miɗi pai ɗa lai.

¹⁴Yikuku a wa edi arbaɗi pinzibaɗi ɗai paŋ burini jufku ɗa, buri ɓa tirki na nɵa agwi maa suku aŋ kai, pini ŋili na mu waŋ suku aŋ gaŋ ɗa. - A miɗi na sini EPIƊ-ƊAI par.

¹⁵Amma ku pɵa midini jufku, ku niya war zini zawar buri yikuku n’a wa ɗa. Ku za maɵara gaiɗi ɗai n’e vigi ɗa paŋ, ku bunda ku walaɗi.

¹⁶Ku mula zamai arbani sapaku par, na jereni kiini kiini ku yimaŋ amai sini hlaiku zi ɓaka, ku za zawar war hlai lai. Wala na maini hanɗa ɵa a za ka duk kai, aga a za pra kaalai.

¹⁷Ku mula wazagai zi gaŋ, zi or gaini zi arzaŋ na mu suŋku ɗa, ku zizina wazagai zi rgi na maɵagai gaini, ku fana gaini lai.

¹⁸Sapakaiku zi tihiri ɗa ku wiŋni sini, ku sini emel na wiya gaini wazagai zi ɗûgûdi zi lûgûzi na wiya lai.

¹⁹Kapai ku ɵiɗi tiɗi agulɗi ɗa, ku ziɗi avudi na himiɗ gaini emel, gaini emlni ami na mu suŋku, na mu wuluku amai gaini ɗa aŋ ɓaka. Hanɗa a wala na ku zaŋ ɗa. - A miɗi na sini Epiɗ-ɗai Alaw par.

²⁰Yeruzalem, ali na maɵagai gaiɗi na falakai na ki wiɗiŋa ɗa, ku miliɗi yaw, ku za ɓaka gaiɗi wiini alawai na jre kai kai ɗa ta kapai e limiɗi. Zawar na ku na zaŋ ɗa, a kiɗa ta kai ɗi!

²¹Ku ɵa wulaɗi aliya ɗa, ku siɗi edi aŋ ɓaka kapai e yiɗi edi gaini afu buriɗi.

²²Sdaku na haharai gaini zawar na ku na zaŋ na ɗa, muduku a na kɵa gaini hlai na ku naka agwi par, na ku naka ganala, ku naka ku ɵada arni fel ɗa tiɓ ɗi!

²³Mefeŋ na ku zaŋ hanɗa paŋ ɗa, haw gara, haw gara buriku. A miɗi na sini Epiɗ-ɗai Alaw par.

²⁴Ku rga dalamai n’agogoi cap cap, war faada paŋ ku liba hlai amai ɓuk ɓuk kapai ɗai e ɗiyisi amai par midini.

²⁵Mini dagrani futi paŋ, ku liba hlai amai woni ɓuk ɓuk, jufku ɗa ku bundaŋ aŋ wala na hihir, ɗif n’a vuga paŋ ɗa, ku bula edi sini kai, ku riya zini maɵaraku ɗa amai.

²⁶Ku za maɵara gaiɗi ɗai n’Egipte, n’e ɗa ɵimaku na piɗi ɗa gargalakai, ku ɓulkaŋa agula gaini zawarku ɗa.

²⁷Mu siŋka spakŋa edi suku, mu faya simi na muku azumai, mu suku war tiɗi gawku na Filistrekai na payaiku na meefeŋ ɗa a fiɗiɗi siɗi gara ɗa, aŋ zi suku maini n’e diri nɵa.

²⁸Ku za maɵara gaiɗi ɗai n’Asiriya buri ɓa zini maɵara ɗa a vuku kai, ku za maɵara gaiɗi amma a vuku kai ɗaai.

²⁹Ku hala wuzaku gaini maɵaraku gaiɗi ɗai na midini afti zi cakal par, afti na Babilon amma gaini hanɗa paŋ a vuku kai ɗaai.

³⁰A huruf na maɵa ɗa! -A miɗi na sini Epiɗ-ɗai Alaw da na wiiɗi zawar na siɗi gaini si edi mini ta.

³¹Won hlai na ku rga dalamai n’agogoi cap cap mini dagrani futi paŋ, ku liba hlai amai ɓuk ɓuk war hlai zi faada paŋ lai ɗa, ku za maiɗi zawarai ɵa kai, jaku gaini vrak kai.

³²Ku nafu maiɗi muni zi maɵara, na te bla edi sini mafaɗi, amma te fana gaiɗi ɗai n’edi par ɗa zila.

³³Zawarai na zamai ɗa, ɗai e siɗi katu gaini si, amma tuku ku siɗi katu wiiɗi marmakaiku ku tuku, ku ziɗisi midiɗi ɗa gaini katuku, kapai e hilisi suku woni hlai paŋ par, e zi maɵara gaiku.

³⁴Zawar na wiiku ɗa a na maini marku ɵa kai, Tuku ɗa e piyuku gaini piyi kai, e suku vrak kaalai. Ku paya ɗai ku tuku lai, ku virgiɗi ku tuku lai. Sda na ku zaŋ na ɗa marku e ziŋ ɗa ɵa kai.

³⁵Buri hanɗa tuku muni zi zawar ɗa, ɵina seŋ n’EPIƊ-ƊAI a na muɗaŋ hanɗa.

³⁶Epiɗ-ɗai Alaw a na muɗa maini nɵa: buri ɓa ku hina suku edi tiɗi ɗai ganala nɵa sul, warni zini maɵaraku ɗa, ku fana gaiɗi marmakaiku lai, gaiɗi alawai zi rgi na haharai ɗa lai, aliku maa ku za ɓaka gaini felɗi wiiɗi alawai zi rgi na wiiku ɗa.

³⁷Buri hanɗa aga mu tipiɗisi marmakaiku na ku naka ku ɵa dawaŋ gaiɗi ɗa, nagai na ku diriɗi gaiɗi nagai na ku diriɗi kai ɗa paŋ, aga mu tipiɗisi warni hlai paŋ par muduku. Aga mu koɵa sapa na suku edi, mu hunuku ganala sul, ɗai paŋ aga e tili ganalaku ɗa.

³⁸Aga mu zutuku sariya n’e zitiɗi wiiɗi falakai n’e zi maɵara gaiɗi nagai n’e ɵiɓi belek ɗa. Aga mu fuɗuku edi gaini suwar na wiya, gaini sile zi diri na wiya lai.

³⁹Aga mu hunuku war tiɗi, aga e hiɗi dalamaiku n’agogoi azumai, hlaiku na gaini libi amai ɓuk ɓuk, e hûŋ azumai lai, aga e kûɵi sapa na suku edi, e mili wazagai zi gaŋ n’aŋ suku ɗa, e hinuku ku hala ganala sul.

⁴⁰Aga e ziɗi piɗi ɗai aŋ fiki amai suku, aga e piyi aŋ fuɗuku gaini kriyit, aga e buluku gaini kaɵkar lai,

⁴¹aga e ɵi afu pini dalamku, aga e zutuku sariya na wiiɗi wuzani arɗi falakai viya. Aga mu ɗiya zini zawarku ɗa, aga ku kiɗa ku virgiɗi marmakaiku kir kai.

⁴²Aga mu vada suwarŋa edi suku vat, sileŋa zi diri na buriku ɗa aga a vada edi lai, aga mu hina gaini hangala, agula a lumaŋa kir kai.

⁴³Yeruzalem, ku hina muduku a kɵa gaini sda na mu zaŋ suku gaini agwiku par kai, gaini sdaku ɗa ku ɓilkitiŋa agula, nɵa ta lai aga mu suku vrak na pini payaiku na meefeŋ ɗa, a miɗi na sini Epiɗ-ɗai Alaw par. Tuku ɗa, ku za wazagai na haharai, ku za wazagai zi siyer pra lai kai ɗi?

⁴⁴EPIƊ-ƊAI a muɗa zamai ɓa: Yeruzalem! ɗai n’e miɗi seŋ joro ɗa aga e miɗi seŋ joro gaiku ɓa: Ahi ɗa te tika ɗa a eziɗi emiɗi!

⁴⁵Tuku ɗa, k’ahiɗi muni na te bula gaw sini mafaɗi gaiɗi aliɗi mal mal, ku tawalɗi tawalakaiku n’e bili gaw siɗi maɵagaiɗi gaiɗi aliɗi mal lai. Emiki ɗa te Hittite, epiki ɗa a Amorite lai.

⁴⁶Tawalku n’amai ɗa te Samariya t'aŋ war galku n’azumai sek gaini fuŋ n’abakai na dai dai na ɵimaɗi lai. Tawalku n’agwi ɗa te Sodoma war galku n’amai sek gaini fuŋ n’abakai na ɵimaɗi lai.

⁴⁷Tuku ku ɗiya sini payai na wiiɗi nagai ta kai, sini wazagai na haharai n’e ziŋ ɗa ta kaalai, a tala arku ɗa agwi, payaiku na meefeŋ ɗa maa a suwa na wiiɗi nagai ɗa.

⁴⁸A jre zaŋ, a miɗi na sini EPIƊ-ƊAI par, Sodoma na tawalku ɗa gaini fuŋ n’abakai na dai dai na ɵemaɗi ɗa, e kiti gaiku tuku gaini fuŋ n’abakai na ɵimaku ɗa kai.

⁴⁹Sodoma na tawalku gaini fuŋ n’abakai na dai dai na ɵemaɗi ɗa, meefeŋ na wiiɗi a hanɗa: kûlini-si a na, gorom a na, simni na muluk a na lai, nagai e si arai zi pi wiiɗi na murgakai gaiɗi na haw ɗa kai.

⁵⁰Kûlini-si a sûwiɗi su, e bindi e zi wazagai na haharai wuzani ara, Won hlai na mu tala sda hanɗa mu vidiɗi edi maini na ku sɗaŋ na ɗa ɵa.

⁵¹Amma Samariya ɗa te za galni tuwur na ku zaŋ ɗa kai, wazagai na haharai na ku zaŋ ɗa a suwa na wiiɗi agwi. Sdaku na haharai hanɗa, a siŋka ɓa Sodoma gaiɗi Samariya na tawalakaiku pɗamai a suwuku.

⁵²Tuku na ku naka ku kûti sariya midiɗi tawalakaiku ɗa, liba siyer na muduku ɗa, burini tuwur na ku zaŋ n’a bunduku hi-hiri a sûwiɗi nagai, nagai e bindi jrekai e suwuku tuku lai ɗa, yima siyer ɗa suku, liba siyerku ɗa lai. Buri ku siŋka edi ɓa tawalakaiku pɗamai e suwuku.

⁵³Aga mu wiyiti Sodoma gaini fuŋ n’abakai na dai dai na ɵemaɗi warni balamni n’avut ɗa, Samariya gaini fuŋ n’abakai na dai dai warni balamni n’avut ɗa lai, tuku lai aga mu wuyuku war balamku n’avut ɗa gaiɗi lai.

⁵⁴Kapai ku liba siyerku ɗa, siyer a yimuku burini sda na ku zaŋ paŋ ɗa, wala hanɗa aga a sa gdaŋ wiini fuŋ n’abakai hanɗa.

⁵⁵Sodoma gaiɗi Samariya gaini fuŋ n’abakai na dai dai na ɵimani aga a waya warni ezini n’avut, tuku Yeruzalem gaini fuŋ n’abakai na dai dai na ɵimaku aga ki wiyi warni eziki n’avut ɗa nɵa lai.

⁵⁶Won hlai na ku naka warni kûlini-si ɗa, muku a muɗa seŋ zi miisi siɗi Sodoma na tawalku kla kadai kir ka!

⁵⁷sarti ni ɗa meefeŋku ɗa a siŋka edi kai hai, Tiyana ɗa ɗai na Siriya gaini fuŋ n’abakai na dai dai na ɵemaɗi aga e tirkuku, Filistrekai gaini fuŋ n’abakai na dai dai na ɵimani lai aga e miisuku lai, ɗai na ɵimaku paŋ aga e miisuku.

⁵⁸Luba siyerku gaini sda na haharai na ku zaŋ ɗa haw, lbaŋ haw, a miɗi na sini EPIƊ-ƊAI par.

⁵⁹Buri Epiɗ-ɗai Alaw a na muɗa maini nɵa: aga mu za suku maini na ku zaŋ sa ɗa ɵa, buri ku yima tusa n’a halasi pini zi na pini gadai na wiini bonu maini wala na kadai nɵa.

⁶⁰Amma ta ɗa mada aga a kɵa gaini bonu na mu zaŋ gaiku warni hlai na ku naka agwi hai ɗa. Aga mu za bonu n’a vada edi kai gaiku.

⁶¹Muduku aga a kɵa gaini payaiku, siyer aga a yimuku, won hlai n’aga mi siɗi tawalakaiku n’abakai gaiɗi n’agogoi li war tuku ɗa kapai ku ŋa midiɗi maiɗi ɗaiku ɵa ɗa, amma aga mu za hanɗa burini bonu na mu zaŋsi gaiku kai.

⁶²Ta ɗa aga mu za bonuŋa gaiku, nɵa aga a yima muduku ɓa, ta m’EPIƊ-ƊAI

⁶³kapai muduku a kɵa, siyer a yumuku, siyer a hina muku a tika amai kai, won hlai na mu haza meefeŋ na ku zaŋ ɗa li paŋ edi ɗa, a miɗi na sini Epiɗ-ɗai Alaw par