Read Mousgoum Ezekiyel 18 Bible Online

Ezekiyel 18 - Mousgoum bible

Ezekiyel 18

¹EPIƊ-ƊAI a muɗaŋa seŋ, a muɗaŋa ɓa:

²Midini afti na wiiɗi Izrayel ɗa, ɗai e ɗa miɗi seŋ zi siŋka maini ktai ɓa: tamai e limi alini luwuŋ zi vin n’a naiya kai, amma a ɵaya ɗa a sesiyeŋɗi aliɗi. Siki pini miɗi ni ɵa tiɓ buri maɗa?

³Jre zaŋ, a miɗi na sini Epiɗ-ɗai Alaw par, seŋ zi siŋka maini hanɗa, aga ki miɗiŋ katawai midini afti na Izrayel ɗa kir kai!

⁴Suŋfa paŋ Epin-gezani mu ta, suŋfa na wiini api gaini na wiini ahi paŋ ɗa a wiya, ni n’a za tuwur li ɗa a mra ɗa a ni.

⁵Ɗif n’a na jre, n’a za paŋ maini n’a na ɗa ɵa, war jre lai,

⁶n’a suma wala amai midini huwauŋ kai, n’a bunda arni amai pin alawai na kadai, na wiiɗi aliɗi Izrayel ɗa kai, n’a tûûriti munini maini kai, n’a fana gaiɗi muni na te na war mefeŋ na wiini walaɗi falakai ɗa kai,

⁷a kara maini kai, wala na ɗif a zigiŋni li midini tumuŋ ɗa a bla midini kai, a tika walani ɗif gaini gdaŋ kai, ɗif na wiyamai te zaŋ ɗa a sini simi, n’a na sini sapa sini lai,

⁸a tufa wala edi gaini riba kai, a zilba riba n’a suwa edi zudut kai, a wa sini war seŋ na jre kai ɗa kai, seŋ a za li arbaɗi ɗai ɗa, a ziɗi sariya war jre,

⁹a za na ɗa pini gadaiŋa zi ɗû gaini gadaiŋa zi ɗiyi lai, Won hlai n’a na paya war jre ɗa maini hanɗa ɵa ɗa, ɗif hanɗa a ɗif na jre, aga a sumna karni; a miɗi na sini Epiɗ-ɗai Alaw par.

¹⁰Na ɓa ɗif hanɗa a waa ahi su, ahi hanɗa hala, a ɵiɓa belek, zaw a za ktai arbani meefeŋ hanɗa sini maini,

¹¹paŋ ktai epini ɗa a za wazagai na maafanai hanɗa kai, ni ɗa a suma simi n’a sa sini alawai na jrekai kai amai midini huwuŋ, a tûriɗi falakaiɗi marni,

¹²a kara ɗif na murga gaini na haw ɗa, a zilba riba n’a suwa edi zudut, wala na ɗif a zigiŋni li midini tumuŋ ɗa, a bla midini dam, a siiwa tini alawai zi rgi kai, a za wazagai na haharai,

¹³a tufa wala edi ɗa gaini riba, a zilba riba n’a suwa edi zudut lai, ahi hanɗa aga a sumna karni ɗi! aga a sumna karni kai, a za wazagai na maafanai hanɗa paŋ, fakat aga a mra, felni aga a zilba tini lai.

¹⁴Amma na ɓa ɗif hanɗa a waa ahi su, ahini ɗa a tala tuwur n’epini a na zaŋ ɗa paŋ, amma a za maini ɵa kai,

¹⁵a suma simi n’a sa sini alawai na jrekai kai amai midiɗi huwuŋ ɗa kai, a siiwa tini alawai zi rgi na wiiɗi Izrayel ɗa kai, a tûûriti munini maini kai,

¹⁶a kara maini kai, wala na ɗif a zigiŋni midini tumuŋni ɗa, a bla midini kai, a tika walani ɗif gaini gdaŋ kai, ɗif na wiyamai te zaŋ ɗa a sini simi, n’a na ganala ɗa a sini sapa sini lai.

¹⁷A kara ɗif na haw kai, a paya riba gaini riba n’a suwa zudut ɗa kai, a za ɗa pini gadaiŋa, gadaiŋa zi ɗiyi gaini gadaiŋa zi ɗû ɗa, ɗif hanɗa aga a mra burini meefeŋ na wiini epini ɗa kai, aga a sumna karni.

¹⁸A ziɗi gir wiiɗi ɗai ɗa a epini, a mula wazagai tiɗi marni gaini gdaŋ, a za wala na pɗem arbaɗi ɗaini kaalai, pini hanɗa, aga a mra, a mra burini meefeŋni.

¹⁹Tiki ki zilbi siki ɓa: meefeŋ na wiini api ɗa a pɵa midini ahi kai ɗa buri maɗa? A za nɵa buri ɓa, ahi ɗa a za ɗa maini n’a na ɗa ɵa, war jre lai, a yima gadaiŋa zi ɗûpaŋ a za pini lai, nɵa aga a mra kai.

²⁰Ɗif n’a za tuwur li ɗa a mra ɗa a ni, ahi ɗa aga alba meefeŋ na wiini api kir kai, api ɗe aga a liba meefeŋ na wiini ahi kir kaalai. Jire na wiini ɗif na jre ɗa te pɵa midini, meefeŋ na wiini ɗif na meefeŋ ɗa te pɵa midini lai.

²¹Na ɓa ɗif na meefeŋ ɗa, a hina meefeŋ n’a naka a zaŋ paŋ ɗa edi, a waiyasi sa, a yima gadaiŋa zi ɗûpaŋ, a za paŋ maini n’a na ɗa ɵa warni jre lai ɗa, aga a sumna karni, aga a mra kai.

²²Midini ɗif aga a kɵa gaini hi-n’amai midini gadai ɗa kai, pini jreni n’a zaŋ ɗa aga a sumna karni.

²³Hiini n’aɓa ɗif na meefeŋ a mra li ɗa, a saŋa firiyi ɗa, ki hiini ɓa a jre ɗi ɗ a miɗi na sini Epiɗ-ɗai Alaw par. Mu firiya ɗa ɓa, a hina payaini na meefeŋ ɗa edi, a waiyasi kapai a sumna karni kai ɗiɗ

²⁴Amma na ɓa ɗif na jre, a hina jreni ɗa edi, a tika pini aŋ za wazagai na haharai maini na ɗif na meefeŋ a na zaŋ ɗa ɵa ɗa, ki hiini ɓa a za hanɗa lai, a sumna karni lai ɗiɗ jreni ɗa midini ɗif aga a wula gaini kai ɗiɗ Aga a mra buri ɓa a ɗiya midini jre kai, a za wazagai na maafanai.

²⁵Tiki ki miɗi ɓa: wala n’EPIƊ-ƊAI a zaŋ na ɗa a futini kai. Zi barka ziɓiri haw ɗai na Izrayel, a futini kai ɗa a sda na wiya zaw, na wiiki ɗiɗ

²⁶Na ɓa ɗif na jre a hina jreni edi, a za meefeŋ a mra mini lai ɗa, a mra burini meefeŋni n’a zaŋ ɗa.

²⁷Na ɓa ɗif na meefeŋ a hinasi meefeŋ n’a zaŋ ɗa edi, a waiyasi sa, a za paŋ maini n’a na ɗa ɵa, war jre lai ɗa aga a kurɗa suŋfani.

²⁸Na ɓa a sɗa meefeŋni ɓa, a hinaŋsi edi mak ɗa, aga a sumna karni, a mra kir kai.

²⁹Tiki ki miɗi ɓa wala n’EPIƊ-ƊAI a zaŋ na ɗa a futini kai. A futini kai ɗa, a sda na wiya ɗi ɗai na Izrayel ɗ a futini kai ɗa a sda na wiiki tiki ɗa kai ɗi!

³⁰Buri nɵa tiki ɗai na Izrayel aga mu zitiki sariya, ɗif paŋ payaini payaini, a miɗi na sini Epiɗ-ɗai Alaw par. Wiyisi, hinisi hi-n’amai midini gadai na wiiki ɗa edi, kapai wala na ki dibi eziki sini n’a kiki aŋ zi tuwur a za buriki kir kai.

³¹Hini sda na maafanai na ki ɗika ki ziŋ paŋ ɗa edi, piyiti agul na hahai gaini hiini na hehe, ki mri kadai meere buri maɗa, ɗai na Izrayelɗ

³²Ta mu na firiya pini mri na wiini ɗif n’a na mra kai, a miɗi na sini Epiɗ-ɗai Alaw par, nɵa ɗa wiyisi kapai ki simni karki.