Read Mousgoum Ezekiyel 2 Bible Online

Ezekiyel 2 - Mousgoum bible

Ezekiyel 2

¹Ɗif n’a naka a muɗa ɗa a muɗaŋa ɓa Ɗif murɗek, ɗiya amai zaw, mu dara mu muɗuku seŋ.

²Won hlai n’a muɗaŋa seŋ hanɗa ta ɗa, smer ktai a niya sa, a ɗiyaŋa amai zaw, mu tika pa mu zuɓura ɗif n’a na muɗaŋa seŋ ɗa.

³A muɗaŋa: Ɗif murɗek, mu ɵunuku na ɗa muta, mu ɵunuku na ɗa siɗi aliɗi Izrayel, siɗi ɗai na midiɗi gdaŋ n’e fiki amai sa, nagai gaiɗi tamaiɗi paŋ haa girna.

⁴Aliɗi ɗa midiɗi gdaŋ, e ɵini seŋ kai, mu ɵunuku na ɗa siɗi, ku miɗiɗi ɓa: Epiɗ-ɗai Alaw a na muɗa maini nɵa.

⁵E yimi seŋku maa kal, e yimiŋ kai maa kal, buri ɓa e ɗi pinziba n’e ɵini seŋ kai, aga a yima midiɗi ɓa, ɗif na mini Alaw a n’arbaɗi.

⁶Slina pɗem ɗif murɗek, ku hûniɗi kai, ku huna seŋɗi zi miɗi ɗa kai, buri k’aŋ na arbani duvuɗvuɗ gaini saari, aga ku sumna azumai ɗa midini hurdi. Aga ku huna seŋɗi zi miɗi ɗa kai, wuzani arɗi ɗa, aga a muluku hunai puku kaalai, buri ɓa e ɗi pinziba n’e ɵini seŋ kai.

⁷Aga ku miɗiɗi seŋŋa ɗa, e yimiŋ maa kal, e yimiŋ kai maa kal, buri ɓa e ɗi ɗai n’e ɵini seŋ kai.

⁸Tuku ɗif murɗek, ɵina seŋŋa mu na muɗuŋku ɗa, ku za hriŋ maini pinziba na hriŋ hanɗa ɵa kai! mala muku amai, suma wala n’aga mu suŋku ɗa!

⁹Mu tala ɗa tiy ktai gaini miɗi sa sek meɗ, gaini maktuɓ na gaini fiɗi feɗ tiɗi kaai.

¹⁰A badaŋ edi wuzani ara, ɗû amlai warni par lai, duɓani par lai, seŋ na warni ɗa a hanɗa: A ɵini marava, gaini ɵini hama, gaini nûmi lai.