Read Mousgoum Ezekiyel 20 Bible Online

Ezekiyel 20 - Mousgoum bible

Ezekiyel 20

¹War mefeŋ n’ag'aŋ doogo na wiini tile n’ag'aŋ ɵim na wiini buza n’ag'aŋ muguzak ɗa, asakal n’e kiyi edi aŋ bege ya ɗa, zamai arbaɗi n’abakai n’arbaɗi ɗai na Izrayel e hilisi sa aŋ zilbi dirini EPIƊ-ƊAI, e simni azumai wuza ca.

²EPIƊ-ƊAI a muɗaŋa seŋ, a muɗaŋa ɓa:

³ɗif murɗek, miɗiɗi wiiɗi n’abakai n’arbaɗi ɗai na Izrayel ɗa, ku miɗiɗi ɓa: Epiɗ-ɗai Alaw a na muɗa maini nɵa: ki hilisi na ɗa aŋ zilbi diriŋa ɗi, jre zaŋ aga mu hiniki ki zilbi diriŋa kai, a miɗi na sini Epiɗ-ɗai Alaw par.

⁴Tuku ɗif murɗek, ku dara ku zitiɗi sariya ɗi, ku dara ku zitiɗi sariya ɗi ɗ siŋkiɗi midini wazagai na haharai na tamaiɗi e ziŋ ɗa.

⁵Ku miɗiɗi ɓa: Epiɗ-ɗai Alaw a na muɗa maini nɵa: mefeŋ na mu viriti Izrayel aŋ wiya ɗa, mu yima ta amai mu ha wala ma wiini pinzibani Yakob, mu siŋka sa arɗi midini afti n’Egipte, mu yima ta amai mu hiɗi wala ma maini nɵa: Ta m’Epiɗ-ɗai Alaw na wiiki.

⁶War mefeŋ ni ɗa, mu yima ta amai mu hiɗi wala ma ɓa: aga mu miliɗisi edi war Egipte par, mu kiɗi midini afti na mu talaŋsi buriɗi ya, a afti na fiyaw gaini emelni ami a ka warni, a afti na jufni ɗa a suwa afti paŋ.

⁷Mu miɗiɗi ɓa: a pɗem ɓa ɗif paŋ a hina wazagai na haharai n’a na tanaŋ ɗa edi, ki bindi siki haharai gaini alawai zi rgi na wiiɗi Egipte ɗa kai, ta m’Epiɗ-ɗai Alaw na wiiki.

⁸Amma tamaiki ɗa e fiki amai sa, e diri e ɵini ma kai, wazagai na haharai n’a na tiniɗi ɗa ɗif a hinaŋ edi kai, alawai zi rgi na wiiɗi Egipte ɗa ɗe ɗif a hinaŋ edi kaalai. Mu hiina wara ɓa, mu hinasi suwarŋa midiɗi aha warɗi Egipte, haa hiy n’aŋ wara siɗi ɗa mu ɵaŋ edi su.

⁹Gaini hanɗa paŋ, kapai hormoŋa a tika edi wuzani arɗi pinzibaɗi ɗai n’e simni arbaɗi, n’e siɗi ɓa mu miliɗisi aliɗi Izrayel edi war Egipte par muta ɗa kai mu za hanɗa kai.

¹⁰Mu miliɗisi edi warɗi Egipte par, mu kiɗi edi war basga na kaɗatan.

¹¹Mu siɗi gadaiŋa zi ɗû, mu siŋkiɗi gadaiŋa zi ɗiyi lai, na ɗif a za pini kapai a sumna karni ɗa.

¹²Mu siɗi Sabbat na wiya ta aŋ wala zi siŋki arba gaiɗi, kapai a yima midiɗi ɓa, mu zaŋ edi sɗik ɗa muta EPIƊ-ƊAI

¹³Gaini hanɗa paŋ, edi warni basga na kaɗataŋ ɗa, aliɗi Izrayel e fiki amai sa, e zini pini gadai zi ɗû na mu siŋɗi gaini gadai zi ɗiyi na ɗif a za pini kapai a sumna karni gaini ɗa kaalai. E kisi miisi n’abai sini Sabbat na wiya ɗai na Izrayel, nɵa mu hiina wara ɓa: mu hinasi suwarŋa midiɗi edi war basga na kaɗatan ɗa, kapai mu vidiɗi edi.

¹⁴Gaini hanɗa paŋ, kapai hormoŋa a tika edi wuzani arɗi pinzibaɗi ɗai na mu miliɗisi edi war Egipte par wuzani arɗi kai ɗa mu za hanɗa kai.

¹⁵Edi warni basga na kaɗatan ɗa, ta ɗaai mu yima ta amai mu ha wala ma pra ɓa: aga mu kiɗi aha midini afti na mu siŋɗi kir kai, afti na fiyaw gaini emelni ami a kaa warni, afti na juf a suwa afti paŋ ɗa.

¹⁶Mu zaŋ nɵa buri ɓa e hini gadaiŋa zi ɗiyi edi, e zi pini gadaiŋa zi ɗûkai, e kisi miisi sini Sabbat na wiya lai, buri ɓa agulɗi a nafu gaini rgi sini alawai zi rgi na wiiɗi ɗa.

¹⁷Amma hiinini haw a yimaŋa buriɗi, mu tûriɗi edi kai, mu vidiɗi edi warni basga na kaɗatan kaalai.

¹⁸Mu miɗiɗi wiiɗi aliɗi edi warni basga na kaɗatan ɓa: ki tiɓi pini gadai zi ɗû na wiiɗi tamaiki kai, ki zi pini gadai zi ɗiyi na wiiɗi kaalai, ki zi siki haharai gaini alawai zi rgi na wiiɗi kai.

¹⁹Ta m’Epiɗ-ɗai Alaw na wiiki, ki zi ɗa pini gadai zi ɗû na wiya, ki yimi gadai zi ɗiyi na wiya ki zi pini lai.

²⁰Yimi Sabbat na wiya ɗa aŋ mefeŋ na sɗik, aga a hina arbamu aŋ wala zi siŋki, gaini hanɗa ɗai aga e siɗi ɓa ta m’Epiɗ-ɗai Alaw na wiiki.

²¹Amma ali ɗa e fiki amai sa, e zi pini gadai zi ɗû na wiya kai, e tiki hangalɗi sini gadaiŋa zi ɗiyi kai, e zi pini kaalai, gadai na kadai tiɓ ɗif a za pini kapai a sumna karni gaini ɗa. E kisi miisi sini Sabbat na wiya ɗa, nɵa mu hiina wara ɓa mu hinasi suwar na wiya midiɗi edi war basga na kaɗatan haa hiy n’aŋ wara siɗi ɗa mu ɵaŋ edi su.

²²Gaini hanɗa paŋ mu yima ta wara, kapai hormoŋa a tika edi wuzani arɗi pinzibaɗi ɗai na mu miliɗisi edi warɗi Egipte par wuzani arɗi kai ɗa, mu za hanɗa kai.

²³Edi warni basga na kaɗatan ɗa ta ɗaai mu yima ta amai mu ha wala ma ɓa aga mu birgiɗi edi arbaɗi pinzibaɗi ɗai, mu ɵiriɗi edi midini afti paŋ lai.

²⁴Buri e zi pini gadai zi ɗiyi na wiya kai, e ɗiyi sini gadai zi ɗû na wiya kai, e kisi miisi sini Sabbat na wiya, e mili arɗi pini alawai zi rgi na wiiɗi tamaiɗi ɗa.

²⁵Mu siɗi gadai zi ɗû na gaini futini kai ɗa muta ɗaai, mu siɗi gadai zi ɗiyi na ɗif a kiɗa a sumna karni gaini kai ɗa muta pra,

²⁶mu bindiɗi haharai gaini ɓakaɗi n’e ziŋ ɗa, Won hlai n’e yiɗi aliɗi n’e wii avut edi gaini afu aŋ ɓaka ɗa, mu zaŋ nɵa ɓa kapai e giɵiri tini hunai, a yima midiɗi lai ɓa ta m’EPIƊ-ƊAI

²⁷Buri hanɗa, ɗif murɗek, miɗiɗi wiiɗi ɗai na Izrayel, ku miɗiɗi ɓa: Epiɗ-ɗai Alaw a na muɗa maini nɵa: tamaiki ɗa, gaini sda na haharai n’e ziŋ sa ɗa, e ɗifu na yaw aŋ tirkiŋa ɵa

²⁸Mu kiɗi aha midini afti na mu yima ta amai, mu ha wala ma ɓa aga mu siŋɗi ɗa, amma e cûsi woni ɗa e piyi ɗa a hlai na boŋorai gaini luwoŋai na hisik ɗa e zi ɓaka na wiiɗi woni, e zi ɓakaɗi zi lima agul ɗa, e zizini ɓakaɗi n’a luguza pɗem ɗa ta ta, e mi ɓaka zi vin ɗa azumai hok hok lai.

²⁹Mu zilbiɗi ɓa, hlai zi ɓaka na ki hili woni na ɗa, azi maɗa? E sini yiki wiini hlai ni ɓa: Hlai zi ɓaka, haa girna.

³⁰Buri hanɗa, ku miɗiɗi wiiɗi ɗai na Izrayel ɗa ɓa, Epiɗ-ɗai Alaw a na muɗa maini nɵa: ki zi siki haharai na ɗa maiɗi tamaiki ɵa kai ɗi, alawai zi rgi na ki hûrgi azumai wuzani na ɗa, ki zi na maiɗi tamaiki ɵa kai ɗi!

³¹Won hlai na ki ɗa ki ɓaka na wiiki wuzani alawai zi rgi na wiiki, ki yiɗi aliki edi aŋ ɓaka gaini afu wuzani lai ɗa, a siki haharai ɵa haa girna! ta ɗa aga mu siki wara kai, ɗai na Izrayel, jre zaŋ, a miɗi na sini Epiɗ-ɗai Alaw, aga mu siki wara kai.

³²Na ki ɗa hiiniŋ ɗa aga a va amai kai, Won hlai na ki hiini ɓa, mi firiyi mi bindi maiɗi pinziba zamai zamai ɗa ɵa, maiɗi ɗai n’e ɗa midini afti zamai ɗa ɵa, mi firiyi mi hûrgi azumai wuzani alawai zi luwoŋai gaini z'ali-fuŋ na ɗa.

³³Jire zaŋ, a miɗi na sini Epiɗ-ɗai Alaw par, fakat aga mu za siki gaini gdaŋŋa, gaini spakŋa, aga mu hinasi suwarŋa miɗiki.

³⁴Aga mu milikisi edi arbaɗi ɗai par, mu tipikisi edi midini afti na mu ɵiriki edi midini par gaini gdaŋŋa, gaini spakŋa, mu hinasi suwarŋa miɗiki.

³⁵Aga mu kiki edi war baŋa kiiki, edi siɗi ɗai na zamai ɗa par, woni aga mu niyumu war sariya armu arɗi marni ca ca.

³⁶Aga mu niya war sariya gaiki tiki maini na mu za sariya gaiɗi tamaiki edi war basga na kaɗatan n’Egipte ɗa nɵa, miɗi na sini Epiɗ-ɗai Alaw par.

³⁷Aga mu wiikisi amlai warni fara na wiya, aga mu ɵa wuzaki pini gadai na wiini bonu.

³⁸Aga mu ɓirwiiki edi siɗi nagai n’e ɵini Gat kai gaiɗi n’e fiki amai sa par, aga mu miliɗisi edi midini afti n’e ɗa woni aŋ zak ɗa par, amma aga e tiki eziɗi midini afti na wiiɗi Izrayel ɗa kai, nɵa aga a yima miɗiki ɓa ta m’EPIƊ-ƊAI

³⁹Tiyana ɗa, tiki ɗai na Izrayel, Epiɗ-ɗai Alaw a na muɗa maini nɵa, hili wiiki, ɗif paŋ a hurga wiini azumai wuzani alawni zi rgi wiini, asakal hanɗa par ɗa koo kaswa ɗi aga ki ɵini seŋŋa ɗaai. Nɵa aga ki kisi tirki sini yikiŋa na sɗik gaini ɓaka na wiiki gaini alawai zi rgi na wiiki ɗa kir kai.

⁴⁰Buri ɓa ɗai na Izrayel ɗa paŋ, gaiɗi nagai n’e ɗa midini afti na wiiɗi Izrayel ɗa paŋ aga e hûrgi azumai wuza amai midiɗi huwuŋ na sɗik, midiɗi huwuŋ na war Izrayel na te suwa marɗi amai paŋ ɗa, a miɗi na sini Epiɗ-ɗai Alaw par. woni aga mu yimiki sa gaini firyi, mu yima wala paŋ na ki yimiŋ edi aŋ wiya ɗa tiki par, gaini ɓaka na wiiki na pɗamai a suwa paŋ, gaini wala paŋ na ki tikiŋ edi ɓa a wiya lai.

⁴¹Won hlai na mu milikisi li edi arbaɗi ɗai par, mi tipikisi li edi midini afti na mu ɵiriki edi midini par lai ɗa, aga mu ymiki sa gaini firiyi maini ɓaka n’a luguza pɗem nɵa, gaiki aga mu siŋka e ɗi wuzani arɗi ɗai paŋ ɓa ta m’Alaw na sɗik.

⁴²Nɵa aga a yima miɗiki ɓa ta m’EPIƊ-ƊAI won na mu wiyikisi li aha midini afti na wiiɗi Izrayel, afti na mu yima ta amai, mu ha wala ma ɓa aga mu siŋɗi wiiɗi tamaiki ɗa.

⁴³Woni ɗa miɗiki aga a kɵa gaini payaiki, gaini sdaki na ki bindi siki haharai gaini ɗa, ki diri ki tili siki kir kai burini sda na maafanai na ki ziŋ ɗa.

⁴⁴Nɵa aga a yima miɗiki ɓa ta m’EPIƊ-ƊAI Won hlai n’aga mu za siki tiki ɗai na Izrayel ɗa, mu za pini payaiki na meefeŋ gaini sdaki na ɗikat kai ɗa kai, amma aga mu za siki ɗa burini hormo na wiya, a miɗi na sini Epiɗ-ɗai Alaw par.