Read Mousgoum Ezekiyel 21 Bible Online

Ezekiyel 21 - Mousgoum bible

Ezekiyel 21

¹EPIƊ-ƊAI a muɗaŋa seŋ, a muɗaŋa ɓa:

²ɗif murɗek, bunda arku warni gal n’amai sek, muɗa seŋ na wuze sini gal n’amai sek ɗa, muɗa sini jur na Negev ɗa war wûle na wiiɗi ɗai na mini Alaw.

³Ku miɗini wiini jur na Negev ɗa ɓa: ɵina seŋ na wiini EPIƊ-ƊAI ɗa, Epiɗ-ɗai Alaw a na muɗa maini nɵa: aga mu ɵa afu puku, a ya luwuŋ na hûleŋ gaini na hirnaŋ ɗa paŋ, afu ni ɗa azi mri kai, aga a yasi war gal n’amai par haa azumai, ɗif n’aga a hina gaini wuruk sini kai aŋ kai.

⁴Nɵa ɗai paŋ aga e siɗi ɓa mu ɵa afu hanɗa muta EPIƊ-ƊAI, afu a ni ɗa aga a mra kai.

⁵Mu muɗa: Haai, Epiɗ-ɗai Alaw, e miɗi gaya na ɓa mu ɗif zi tiki murɵi lai ɗa.

⁶EPIƊ-ƊAI a muɗaŋa seŋ, a muɗaŋa:

⁷ɗif murɗek: bunda arku siɗi Yeruzalem sek, muɗa seŋ na wuze sini hlai na sɗik, muɗa sini afti na wiiɗi Izrayel war wûle na wiiɗi ɗai na mini Alaw.

⁸Ku muɗa sini afti na Izrayel ɗa ɓa, EPIƊ-ƊAI a na muɗa maini nɵa: mu na halaɗi muduku, aga mu sotosi kaɵkarŋa warni sutoni par, na pɗamai gaiɗi maafanai paŋ aga mu vidiɗi edi.

⁹Buri na ɓa aga mu vidiɗi na maafanai gaiɗi na pɗamai paŋ edi ɗa, kaɵkarŋa aga a niyasi edi warni sutoni par aŋ fiɗiɗi edi kafa, war gal n’amai par haa azumai.

¹⁰Nɵa ɗai paŋ aga e siɗi ɓa mu sotosi kaɵkarŋa edi war sutoni par muta EPIƊ-ƊAI, aga a waya amlai kir kai.

¹¹Ɗif murɗek, nuuma wuzani arɗi ɗa ɗa, ku za suku maini ɗif na gdaŋ warni kai ɵa, ku ɵa marava lai.

¹²E zilbuku li ɓa, ku nuuma nɵa buri maɗi ɗa, ku wiyiɗi seŋ ɓa: buri ɓa labar ktai na meefeŋ a na gizi, ɗai paŋ hunai aga a yimiɗi, graŋɗi a yima amai kir kai, gdaŋɗi a vada edi, kurnaiɗi a liwa, a na gizi a cosi ya lai, a miɗi na sini EPIƊ-ƊAI par.

¹³EPIƊ-ƊAI a muɗaŋ seŋ, a muɗaŋa ɓa:

¹⁴ɗif murɗek, muɗa war wûle na wiiɗi ɗai na mini Alaw, ku miɗiɗi ɓa: Epiɗ-ɗai Alaw a na muɗa maini nɵa: kaɵ kar, kaɵkar na mini aŋ gaini liɓi, a ŋala prik prik.

¹⁵Mini aŋ gaini liɓi burini fiɗi, sini aŋ gaini kûri edi kapai a ŋala.

¹⁶A saŋ kapai e kûri sini, a yima tiy pɗem, mini aŋ gaini liɓi, a n’a ŋala lai, kapai a sa tini ɗif zi fiɗi ɗai aŋ fuɗa gaini.

¹⁷Uula, tuwa tuwi zi haw, ɗif murɗek, buri ɓa e sûtiŋsi edi midiɗi ɗaiŋa, midiɗi paakai na warɗi Izrayel paŋ, e fiɗiɗi edi gaini kaɵkar gaiɗi ɗaiŋa paŋ,

¹⁸Buri ɓa a titimi na gdaŋ gara, a miɗi na sini EPIƊ-ƊAI par,

¹⁹Tiyana, tuku ɗif murɗek, muɗa seŋ na mu muɗuŋku ɗa, ku daba tuku azumai, azi ktai, sulu, hu, a kaɵkar zi mri, n’a fuɗa ɗai paŋ, a fuɗa woɗi woɗi paŋ lai.

²⁰Kapai gdaŋɗi a vada edi, kapai wazagai n’e ziɗi a daba li sini ɗa, e kɵi a riya amai. Mini magala paŋ mi ɗiyi ɗai n’e fiɗi ɗai gaini kaɵkar ɗa ca ca, kaɵkar hanɗa a zizina buri a ŋala, a na buri fiɗiɗi ɗai lai.

²¹Bula war gal hanɗa sek lai, hanɗa sek lai, kaɵkar na muku a suma gara woɗi paŋ na ku bunda arku woni paŋ.

²²Ta lai aga mu daba ta azumai, aga mu hinasi suwarŋa haa a ɵa edi, mu muɗa muta EPIƊ-ƊAI

²³EPIƊ-ƊAI a muɗaŋa seŋ, a muɗaŋa ɓa:

²⁴tuku ɗif murɗek, ɓasa futi sulu na pai na Babilon aga a vugasi woni ɗaw gaini kaskarni ɗa, futi na sulu hanɗa a niyasi midini afti ktai par. Ku za wala zi siŋki ktai ta, ku paŋ mini hlai n’e niyi aha warni fuŋ n’abai sek warni ɗa.

²⁵Futi na ktai ɗa te kiɗi askarai na Babilon par war Rabba fuŋ n’abai na wiiɗi Ammonitekai, na ktai ɗe te kiɗi a Yeruzalem fuŋ n’abai zi ɵaga na war Yuda ɗa lai.

²⁶Buri ɓa pai na Babilon a ɗiyasi aŋ mini dagrani futi ɗa zaw, mini hlai na futi ɗa a diŋga woni ɗa zaw, aŋ tala sini, a poko ɓarawni azumai, a zilba alawai zi rgi n’agogoi, a tala eɵeɵetni wazagai zi fiɗi ɗa lai.

²⁷Ɓurwi na te siŋka midiɗi Yeruzalem ɗa te kɵa midiɗi tini na wus kapai e zizini masin zi gaw ɗa azumai ta ta, e si futi buri e fiɗiɗi ɗai, e sûûri sura zi gaw, e zizini masin zi gaw azumai mini magalani fuŋ paŋ ta ta, e libi hlai amai ezini ɵaga, e ɓili waŋ n’e ŋûyi warni lai.

²⁸Amma ɗai na Yeruzalem e hiini ɓa sda na pai na babilon a zaŋ na ɗa jreni aŋ kai buri wuzani arɗi ɗa e ɗa war gɗam. Alaw a ha wala mini ɓa, aga a giɗimiɗi. Amma pai na babilon a na ɵiɗi midiɗi gaini meefeŋ n’e ziŋ ɗa, a na a ziɗi zaida lai ɓa: Mefeŋ ktai ɗa aga a yimiɗi aŋ bagakai.

²⁹Buri hanɗa, EPIƊ-ƊAI a na muɗa maini nɵa: Buri ki hini midini ɗif a wula gaini meefeŋki kai ɗa, aga mu siki war tiɗi gawki.

³⁰Tuku pai na Izrayel, ɗif na meefeŋ, na ku yima wala na sɗik maini wala kadai ɵa ɗa, mefeŋku a na gizi, a mefeŋ na meefeŋ a va li amai pulmuɗuk ɗa.

³¹Epiɗ-ɗai Alaw a na muɗa maini nɵa: Kadamul na muduku ɗa aga e fûkiŋ edi, bogorai zi pai na muduku ɗa aga e tikiti edi lai. Hlai aga a bunda, ɗai na pɵaɗi kai ɗa aga e nivi rɗi n’amai, ɗai zi spak ɗa aga e wiyi azumai.

³²Aŋ greŋ, aŋ greŋ, aga mu binditi Yeruzalem edi aŋ greŋ. Hanɗa a wala n’aga mu zaŋ ɗa, hlai maa a bunda pla, ɗif na sariya a sa warni tini ɗa a gizi kai hai, n’aga mu siŋni war tini.

³³Tuku ɗif murɗek, muɗa warni wûle na wiiɗi ɗai na mini Alaw, ku muɗa ɓa: Epiɗ-ɗai Alaw a na muɗa siɗi Ammonitekai gaini tirki n’e tirki ɗai ɗa maini nɵa: Kaɵkar, kaɵkar ktai a sotosi edi war sotoni par, a ŋala prik prik. A na buri a fuɗa, a vada ɗai edi, a luma prik prik lai.

³⁴Won hlai n’aga ki hini yaw pini wazagai n’a siŋka arki na jreni aŋ kai, gaini seŋ na wuze na jreni aŋ kaalai ɗa, kaɵkar hanɗa aga a ɵa wulaki gaiɗi ɗai na maafanai paŋ, war mefeŋ na meefeŋɗi a va li amai pulmuɗuk ɗa.

³⁵Wiyi kaɵkarki war sotoni ɗa, aga mu zitiki sariya midini afti na ki wi warni, afti na wiiɗi tamaiki ɗa.

³⁶Aga mu hunasi suwarŋa midiki, mu kasi afuni hiyŋa midiki, mu siki war tiɗi ɗai na karasai, na hiinini-haw warɗi kai, sdaɗi tar ɗa a wala zi tûûri edi.

³⁷Afu aga a yiki edi, felki aga a ma edi midini afti, ɗif midini aga a kɵa gaiki kir kai. Mu muɗa na ɗa mu ta EPIƊ-ƊAI.