Read Mousgoum Ezekiyel 22 Bible Online

Ezekiyel 22 - Mousgoum bible

Ezekiyel 22

¹Miɗi na wiini Epiɗ ɗai a muɗa sa maini nlza:

²Tuku ɗif aga ku ziti sariya; nkam sariya wiini fuŋ n’abai zi fiɗi ɗai, siɗkini aŋ siɗa sdani na maafanai lai.

³Ku miɗini ɓa Epiɗ ɗai ALAW a na muɗa maini nɵa: A fuŋ na ɗai e fiɗi ɗai aha warni, tiyana hlaini zi ɓilki n’edi a na halasi, a fuŋ na zizina alawai zi rgi haa a bunda hi-hir.

⁴Pin felɗi ɗai na ku maŋ edi aga ku niviti emin seŋ; pin alawai zi rgi na ku rgaŋ, ku bunda suku hi-hir, nɵa ku torasi mefeŋku zi ɓilki n’edi gobi, ku cosi ya sin dibini buzaku. Buri nɵa mu zuku aŋ wala zi tirki arbaɗi ɗai, aŋ wala zi yewere burini afti paŋ.

⁵Kolku a ɓa edi ta, buri k’aŋ war turli. ai n’e ɗa gobi gaiɗi n’e ɗa gaigai lai aga e riyi puku

⁶Ahaku, paakai n’e ɗi midiɗi Izrayel e fiɗi ɗai, asiya ɗi paŋ pin spakni, spakni.

⁷Ahaku, ɗai e miisiɗi tamai na maɵagai gaiɗi na falakai; arbaki e kiri ɗif n’a zogosi aŋ fuŋ; ahaku ɗai e kiri arwagwi na huyuk gaiɗi muni na war greŋ.

⁸Ku miisa wazagaiŋa na sɗik; ku tala mefeŋni Sabbat na wiya aŋ wala kadai;

⁹Ahaku, ɗai z'alasakai n’e hugiɗi na zamai aŋ fiɗi marɗi e ɗa; ahaku ɗai e simi simi n’a sa sini alawai na kadai amai midini huwuŋ, ɗai e zi wala zi siyer arbaki

¹⁰Ahaku, zamai e fini gaiɗi falakaiɗi tamaiɗi, zamai e fini gai gdaŋ gaiɗi falakai n’e ɗa gaini walaɗi falakai siɗi.

¹¹Ktai a za meefeŋ gaiɗi munini maini; na zamai a fana gaiɗi munini ahini, na zamai pra a fana gaiɗi tawalni, n’epiɗi ktai.

¹²Ahaku ɗif a kiɗa a fuɗa maini burini vrak, ku yima riba n’a suwa gadaŋni; ku tika walani maiku gaini gdaŋ, ta ɗa muduku a wula gaya! A miɗi na wiini Epiɗ ɗai ALAW.

¹³Tala aga mu tika ta amai, burini der na jrekai na ku zaŋ gaini fiɗini humok n’a na za arbaki.

¹⁴Agulku aga a huna kai, ɗi, zaw graŋku aga a liiwa kai ɗi mefeŋ na mada a tikaɗi li gaiku ɗa Ta EPIƊ-ƊAI, mu muɗa seŋ, mu vaŋ amai lai.

¹⁵Aga mu ɵuruku edi arbaɗi ɗai, midini afti zamai zamai lai; aga mu ɗiya sdaki na haharai zaw.

¹⁶Pin meefeŋ na wiiku tuku dama ku ɓa hormoku edi, wuzani arɗi ɗai, amma aga ku siɗa ɓa ta m’Epiɗ ɗai."

¹⁷Miɗi na wiini EPIƊ-ƊAI a muɗa sa maini nɵa:

¹⁸"Tuku ɗif, aliɗi Izrayel e bindi maini flaini wazagai n’e siiwiŋ arni afu n’a pokasi edi nɵa. Nagai paŋ e ɗifu maini Arzaŋ; zaw kawai na mekele, zaw kawai na muɗukwi, zaw kawai na murɗek, zaw tatna nɵa. E bindi aŋ flaini, won hlai n’e miliŋ warni waŋ zi hiliyiŋ.

¹⁹Pin hanɗa Epiɗ ɗai ALAW a na muɗa maini nɵa: pin na ki bindi kafa aŋ flaini kawai zi hiliyi, aga mu tipiki aha arba war fuŋ na Yeruzalem:

²⁰Maini n’e tipi Arzaŋ, zaw kawai na mekele zaw, kawai na murɗek zaw, tatna, zaw kawai na muɗukwi ɗi, war waŋni n’e hiliyiŋ woni nɵa, kapai e ŋili afu midini haa a hiliya nɵa, nɵa lai, aga mu tipiki war hiyŋa n’abai, aga mu kiki war hlai zi hiliyi wazagai kapai mu hilyiki.

²¹Aga mu tipiki aha war Yeruzalem tar, mu yiba smer na wiini hiyŋa miɗiki; mu hilyiki edi maini kawai nɵa.

²²Maini Arzaŋ a hilya war waŋ zi hilyi nɵa, nɵa lai tiki aga ki hilyi edi aha war Yeruzalem; kapai ki siɗi ɓa m’EPIƊ-ƊAI n’a hinasi hiyni n’abai miɗiki.

²³Miɗi na wiini EPIƊ-ƊAI a muɗa sa pra:

²⁴Tuku ɗif, miɗiɗi wiiɗi Yeruzalem ɗa, na t'afti na te za edi aŋ hilu kai, afti n’a nava faŋ kai war mefeŋ ŋa zi hiy ɗa.

²⁵Kitini mi na wiiɗi ɗai ɗi na min Alaw a na za arbaɗi. Maini gurnai zi nuumi n’a na ɓasa neŋni nɵa, e limiɗi ɗai, e mili godaiɗi gaini faraiɗi; e riyi pɵaɗi falakai na war greŋ na war fuŋ ɗa amai.

²⁶Paakai zi ɓaka na wiiɗi e hi amai midini Gadai ɗa, e tili hlaiŋa na sɗik maini wala kadai nɵa, e zi ɓraw arbani wala n’a vara edi burini EPIƊ-ƊAI gaini na kadai kai, e siɗi ɓraw arbani wala na hilu gaini na hi-hir kai, e dûgi arɗi sini mefeŋ Sabbat na wiya duk. Arbaɗi ɗif n’a saŋa hormo ktai maa aŋ kai.

²⁷Paakaiɗi e ɗa arbaɗi maini belemke n’a ɓasa wala n’a fuɗaŋ nɵa, e ɗa gobi aŋ mi fel edi, aŋ fiɗiɗi ɗai kapai e mili wazagaiɗi.

²⁸aiɗi na min Alaw e ku hanɗa paŋ siɗi; arɗi a tala wazagai zi siŋki na woɗi futini kai, e miɗi seŋ na wuze z'ales; e miɗi: EPIƊ-ƊAI a na muɗa maini nɵa kapai na ɗa Epiɗ ɗai a muɗa seŋ kai.

²⁹ai na midini afti e zi girmis, e virmi wazagaiɗi marɗi, e kiriɗi ɗai na haw gaiɗi na murgakai, ɗai e kirpi ɗif na zogosi hehe midini afti, e zi pin jre kai.

³⁰Mu paya ɗif ktai arbaɗi n’aga a rgiti ɵagai amai, n’aga a ɗiya wuza min hlai zi ɓisi na siɗi ɵagai, buri pɗemni afti, kapai mu tuuraɗi edi kai: amma mu navaɗ kai.

³¹Nɵa mu ko hiyŋa n’abai midiɗi, mu vidiɗi edi gaini afu na wiini hiyŋa, mu tika gumani payaiɗi na meefeŋ midiɗi - A miɗi na wiini Epiɗ ɗai ALAW."