Read Mousgoum Ezekiyel 25 Bible Online

Ezekiyel 25 - Mousgoum bible

Ezekiyel 25

¹EPIƊ-ƊAI a muɗaŋa seŋ, a muɗa:

²ɗif murɗek, bunda arku siɗi pinzibani Ammon, muɗa siɗi war wûle na wiiɗi ɗai na mini Alaw.

³Ku miɗiɗi ɓa: ɵini seŋ n’Epiɗ-ɗai Alaw a na muɗaŋ ɗa, Epiɗ-ɗai Alaw a na muɗa maini nɵa: Won hlai na Hlaiŋa na sɗik a bunda aŋ hlai kadai, afti na Izrayel a tuura edi, n’e kiɗi ɗai na Yuda edi aŋ bagakai edi midini afti zamai zamai lai ɗa, tiki ki riyi coɗo coɗo.

⁴Buri hanɗa, aga mu suku tiɗi ɗai na piɗi futi na dawai par, nagai aga e hilisi e pi kaŋɗi arbaki, e gûniŋ amlai gaini ɵaga cup, e zi fuŋɗi arbaki lai. Aga e limi alini luwuŋ na wiiki tiki ta lai, e ci fiyaw na wiiki tiki ɗa lai,

⁵Aga mu binditi Rabba na kapital na wiiki ɗa aŋ hlai na ɵigini a suma woni, afti na wiiɗi pinzibani Ammon ɗa aŋ hlai na adumai gaini haakai a suma woni lai, kapai a yima miɗiki ɓa EPIƊ-ƊAI mu ta.

⁶Buri Epiɗ-ɗai Alaw a na muɗa maini nɵa: buri ki ɵiɓi tiki, ki pri amai gaini firiyi lai Won hlai na ki ɵini ɓa gir a nava afti na Izrayel zek ɗa, buri warki a nafu siɗi meefeŋ,

⁷buri hanɗa, aga mu siŋka spakŋa edi siki, aga mu hiniɗisi ɗai aŋ virmiki, aga mu vidiki edi arbaɗi ɗai par, ki hini ɗa aftiki aŋ kai. Aga mu vidiki edi, kapai a yima miɗiki ɓa EPIƊ-ƊAI muta.

⁸Epiɗ-ɗai Alaw a na muɗa maini nɵa: buri Mowab gaiɗi Seyir e ɗa emiɗi ɓa: ɗai na Yuda ɗa e ɗi maiɗi ɗai na zamai ɵa lai.

⁹Aga mu hinasi ɗai e hilisi aŋ ciki fuŋ n’abakai n’a ɗiliɗi ɗai aŋ niyi aha midini afti na Mowab paŋ ɗa, aga e hiɗiŋ azumai ktai ktai kafa haa sini fuŋ n’abakai n’a juva gara midini afti ɗa, maini fuŋ n’abai na Bet-Yesimot, na Baal-Meyon gaini na Kiryataiim lai.

¹⁰Aga mu siɗi tiɗi ɗai na piɗi futi na dawai par siɗi Amonitekai pra, kapai ɗif midini a kɵa gaini pinzibani Mowab arbaɗi ɗai kir kai.

¹¹Aga mu zitiɗi sariya wiiɗi ɗai na Mowab, kapai a yima midiɗi ɓa: EPIƊ-ƊAI mu ta.

¹²Epiɗ-ɗai Alaw a na muɗa maini nɵa: ɗai na Edom ɗa, e ziɗi meefeŋ wiiɗi ɗai na Yuda buri ɓa nagai e zika meefeŋ ta, wiyi n’e wiyi meefeŋ midini meefeŋ ɗa a kasi seŋ midiɗi ɗaw.

¹³Buri hanɗa Epiɗ-ɗai Alaw a na muɗa maini nɵa: aga mu siŋka spakŋa edi siɗi ɗai na Edom, aga mu fiɗiɗi ɗai gaini wazagai n’ezini puɗu puɗu paŋ edi, aga mu bunda afti ɗa edi aŋ greŋ, a Teman par haa a Dedan, ɗai aga e mri mini kaɵkar.

¹⁴Aga mu vurga meefeŋ na ɗai na Edom e ziŋ ɗa gaiɗi ɗai na Izrayel dama. Aga e zi siɗi ɗai na Edom ɗa pini hiyŋa gaini suwarŋa n’abai, nɵa aga a yima midiɗi ɓa ta mu sa vrak pini sda na meefeŋ ɗa, a miɗi na sini Epiɗ-ɗai Alaw par.

¹⁵Epiɗ-ɗai Alaw a na muɗa maini nɵa: Filistrekai e zi nɵa, buri e firiyi e wiyi meefeŋ midini meefeŋ, e zi siɗi aliɗi Izrayel pini agulɗi n’a na limiɗi midiɗi gara ɗa, kapai e tûriɗi edi, e ziŋ nɵa burini gaw n’a na arbaɗi ɗipar su.

¹⁶Buri hanɗa, Epiɗ-ɗai Alaw a na muɗa maini nɵa: aga mu siŋka spakŋa edi siɗi Filistrekai, aga mu vidiɗi Keretekai edi gaini nagai n’e simni agoɗom wuulani yem-ra n’abai ɗa.

¹⁷Aga mu wiyiɗi meefeŋ n’abai midini meefeŋɗi, mu ziɗi gir n’abai lai, kapai a yima midiɗi ɓa EPIƊ-ƊAI mu ta, Won hlai na mu wiyiɗi li meefeŋ midini meefeŋ ɗa.