Read Mousgoum Ezekiyel 27 Bible Online

Ezekiyel 27 - Mousgoum bible

Ezekiyel 27

¹Miɗi na wiini EPIƊ-ƊAI a muɗa sa maini nɵa:

²Tuku, ɗif, zina yama zi tuwi ktai midiɗi Tirus;

³Ku muɗa siɗi Tirus ɗa: Tuku na ku tika war futi n’eziɗi ɗai agoɗom min Yem ra n’abai tuku na ku za sakala gaiɗi ɗai viya gaini wudi viya lai Epiɗ-ɗai Alaw a na muɗa maini nɵa: Tirus, tuku ku muɗa gai warku ɓa: 'mu juva gara, tirki sa kai',

⁴Tuku na hagni aftiku a na haa edi arbani Yem ra n’abai, Nagai n’e rguku, e rguku zuf gara

⁵Nagai e zizinuku maini hulum n’abai nɵa. E piyisi luwuŋ Sipre na Senir par aŋ zizini duɓaku gaini, gaini luwuŋ Sedre na Liban par e zizini luwuŋ na mogo n’e higi sapa sini.

⁶Gaini luwoŋai n’abakai na Basan par e kilɗi hara n’e giriɗ ɵimani hulum; gaini sesiyeŋi pekne e kûri hlai n’e simni midini n’a zizina gaini luwuŋ Sipre na midini wudi na Kitim par;

⁷Sapa na e higiŋ amai a zizina gaini leŋ zi tikri n’Egipte par; Gaini hanɗa ɗai e kiɗi e siɗuku edi gaigai par. Wazagai zi sakala, e biri midini gaini sapa na mekele cih cih gaini na mekele keŋ na midini wudi na Elisa par.

⁸Ɗai n’e ɵikuku e ɗi ɗai na Sidon gaiɗi na Arvad par, Tirus, tuku ku miliɗi ɗai n’e yalakai n’e zizini wazagai warku; kapai e ki hulum hanɗa.

⁹Ɗai n’abakai na Gebal gaiɗi nagai n’e siɗi wazagai zi zizini e ɗifu a haku aŋ ɗai n’e zizini wala na tuura sin hulum. Hulamai n’abakai na guna war Yem ra n’abai paŋ gaiɗi ɗai zi sakala n’arni yem paŋ a yima a haku aŋ wura wazagai zi sakala.

¹⁰Ɗai na Persus, na Lud gaiɗi na Put e ɗifu war vokɗi askarai na wiiku, E ɗifu ɗai zi hatam na wiiku; E mili gamarɗi gaini bogoraiɗi a haku. E suku rɗi n’amai lai.

¹¹Ɗai na Arvad gaiɗi askaraiku e difu ɵimaku siɗi ɵagai ɗa, ɗai na Gammad e ɗiyi amai midini hlai zi gɗam. E giri gamarɗi ezini ɵaga n’aha suku gar, e riyi zufku amai katawai pra.

¹²Ɗai na Tarsis e sikili wazagai pinzibani kiini kiini viya gaiku: e suku Arzaŋ, Kawai na murɗek, Kawai na mekele, zaw Tûûsi Dorno.

¹³Ɗai na Gres, na Tubal gaiɗi na Mesek e zi sakala gaiku lai; nagai e cikili bagakai gaini wazagai na gai kawai na mekele.

¹⁴War Bet-Togarma par e wuri wazagaiku gaini plasai na kadai, gaini plasai zi gaw gaini plasai n’atoŋo lai.

¹⁵Ɗai na Dedan e zi sakala gaiku, wudi viya a za sakala gaiku, e wuri walaku gaini sesiyeŋ pekene, gaini luwuŋ meŋileŋ.

¹⁶Ɗai na Edom e wuri wazagai na ku zizinaŋ a haku par viya. E wuriŋ gaini ali-fuŋ na zuva gara, sapa na ɗo gaini wala na mekele; sapa na gai tikri, sapa zi leŋ, gaini korai gaini rubi,

¹⁷ɗai na Yuda gaini afti na wiiɗi Izrayel paŋ a za sakala gaiku. Nagai e kukusi algama na Minnit par, wai, emel n’ami, emel zi sugai gaini dubaŋ adnok lai.

¹⁸Ɗai na Damas e wuri wazagai na ku zizinaŋ a haku viya, na pinzibani kiini kiini. E kukusi vin na Helbon par, gaini ayirni adumai na Tsahar par.

¹⁹Ɗai na Wedan gaiɗi na Yavan-Mewuzzal e kukusi kawai na murɗek na ɗai zi fai fai e giɵiɗsi ya, gaini ali luwuŋ na yikini ŋa kas gaini vayai na luguza fur fur lai midini wazagai n’e diri wuriŋ.

²⁰Ɗai na Dedan e sikili sapa n’e biriŋ duɓani plasai.

²¹Ɗai na Arabi gaiɗi paakai na war Kedar paŋ e zi sakala gaiku; e bindi alini adumai, gamalakai gaini mapatakai gaiku.

²²Ai zi sakala na Saba par gaiɗi na Raema par lai e zi sakala gaiku. E suku midini libini zakɗi sugai zi lugizi na pɗamai a suwa gaini ali-fuŋ na wirini caŋ gara gaini or lai.

²³Harran, Kanne gaiɗi Eden, ɗai zi sakala na Saba par - Asiriya, Kilmad e zi sakala gaiku.

²⁴Nagai e wuruku edi sapa na faraini viya maini: sapa na ŋala gara, sapa na gaini purpre, na gai tikiri, sapa na pin nafarni kiini kiini, gaini sogom zi tirɗi na gdaŋ gara lai. E kiɗsi paŋ war koskoku.

²⁵Hulamai n’abakai na wiiɗi Tarsis a luba wazagaiku zi sakala. Ku naka gai vi gaini wazagai zi sakala, gai vi cik cik edi arbani yem maini hulum n’abai nɵa.

²⁶Ɗaiku zi vili e kuku edi war yem na hulum. Smer na piɗi futi na dawai par a huɗuku edi edi war yem n’abai hanɗa.

²⁷Faraiku, faraiku na midini jak n’e libiŋ, wazagaiku zi sakala, ɗaiku zi sakala n’agoɗom, ɗaiku n’e zi sda war hulum ɗaiku n’e zizini arni hulum, ɗaiku zi sakala, ɗaiku zi hatam paŋ, Ɗai n’e tipisi ahaku paŋ aga e bi agoɗom war yem-ra n’abai war mefeŋ n’aga ku biɗiha.

²⁸Won hlai na ɗai aga e ɵini ɗuwal na miɗi ɗaiku zi sda na war hulum, Ɗai na wulani daŋ aga e ziriyi.

²⁹Nɵa nagai n’e siɗi sdani hara paŋ aga e niyisi azumai war hulumɗi par, Ɗai zi sakala n’agoɗom, ɗai zi sda na war hulamai n’agoɗom paŋ: Aga e ɗiyi amai gdaŋ par.

³⁰Aga e ɵi hama muduku aga e tuwi tuwi na ɗewek, aga e ku alogodo amai midiɗi aga e bibli siɗi arni bono.

³¹Aga e fiɗɗi midiɗi edi buriku, aga e wi sapa zi sak siɗi. Agulɗi gai vi gaini marava aga e tuwi muduku abai gara, aga e ɵi hama siɗi viya gara.

³²War girɗi aga e ziniti yamai zi tuwi ktai muduku war tuwiɗi e ziniti yamai maini nɵa: N'a kata gaiɗi Tirus, hlai zi ŋoyai na war yem-ra n’abai asiya ɗaŋ

³³Won hlai na ku naka sikila wazagaiku edi war yem-ra n’abai par, ku va pinzibaɗi ɗai viya; gaini faraiku na viya gaini wazagaiku zi sakala na viya lai, Ku ziɗi paakai na midini afti paŋ aŋ ɗai zi farai.

³⁴Tiyana haaiku zi biɗihi na war yem-ra n’abai a sosili, War hulumni yem-ra n’abai; wazagaiku zi sakala, gaiɗi nagai n’e tipisi siɗi a haku paŋ e bi agoɗom.

³⁵Ɗai n’e ɗa edi midini wudi paŋ e ɗa war kwimi buriku, paakaiɗi lai e ziriyi tin hunai arɗi a yirɓa yireɓ.

³⁶Ɗai zi sakala n’edi par arbaɗi pinziba zamai paŋ e ɗa yibi huwit buriku: Ku bunda aŋ wala zi mili hunai. Haa kureɗ aga ku za pra kir kai."