Read Mousgoum Ezekiyel 28 Bible Online

Ezekiyel 28 - Mousgoum bible

Ezekiyel 28

¹Seŋ na wiini EPIƊ-ƊAI a muɗa maini nɵa:

²Tuku ɗif, miɗini wiini pai na Tirus: Epiɗ-ɗai Alaw a na muɗa maini nɵa: Buri ɓa ku niya war kûlûni-si, ku muɗa gai warku ɓa: Ta m’Alaw, mu sumna midiɗi paramai na wiini alaw edi arbani yem-ra n’abai paŋ ktai ku ɗif, k’Alaw kai, pin na ku tala suku maini alaw nɵa.

³Tala, ku na yel gara ku suwa Daniyel, wala si ŋoyai ktai na suwuku aŋ kai.

⁴Pin yelku zi zi wala gaini sɗiku, ku za farai ta; Ku nava der na maini or gaini arzaŋ nɵa war godai na wiiku

⁵Gaini yelku zi zi wala n’abai gaini sakalaku lai, ku riya faraiku amai ta. Ku niya war kûlûni-si burini faraiku na viya.

⁶Buri nɵa Epiɗ-ɗai Alaw a na muɗa maini nɵa: Buri ku tala suku maini alaw nɵa,

⁷Aga mu kiɗisi ɗai na morkokai muduku, ɗai na sababai gara arbaɗi pinziba paŋ; Aga e tûûri wazagai na pɗamai na ku zizinaŋ gaini yelku edi gaini kaɵkar aga e kisi tirki siɗi abai na wiiku.

⁸Aga e wuku azumai war waŋ, aga ku mra mri zi gir edi arbani yem-ra n’abai.

⁹Wuzani ni n’aga a fuɗuku, aga ku muɗa pra ɓa: 'ta m’Alaw ɗi', paŋ ktai ku ɗif, k’Alaw kai won hlai n’aga ku sa war tiɗi nagai n’aga e fuɗuku edi ɗa!

¹⁰War tiɗi ɗai na morkokai aga ku mra mri na wiiɗi ɗai na gaziɗaŋai. Nkam, mu muɗa ya - A miɗi na wiini Epiɗ-ɗai Alaw."

¹¹miɗi na wiini EPIƊ-ƊAI a muɗa sa katawai maini nɵa:

¹²Tuku ɗif, zina yama zi tuwi ktai midini pai na Tirus. Ku miɗini ɓa Epiɗ-ɗai Alaw a na muɗa maini nɵa: Tuku na vi n’amai war pɗem paŋ a daba suku na ku va gaini yel zi zi wala, na zuf, tirki suku kai,

¹³Ku naka war Eden, zardeŋ na wiini Alaw, gai guni azumai gun gaini ɵaga n’a rga gaini ali-fuŋ na wirini abai: sarduwon, topaz, yaspis, krisolit, beril gaini oniks, lazulit, eskarbukle, emerod; or n’e zizini darai gaini algeta n’a na tuwa muduku a zizina war mefeŋ na ku rgasi warni par.

¹⁴Ku naka aŋ kerub n’a ŋala gara, mu tukuku aŋ ɗif zi geɗam; Ku naka midiɗi huwuŋi na sɗik na wiini Alaw, ku naka ku paya arbani ali-fuŋ na gai curi mekele keŋ tin afu.

¹⁵Payaiku a naka pɗem haa sin mefeŋ na ku rgasi warni par, haa mefeŋ n’e nivi jre-ɗikat kai suku:

¹⁶Pin sakalaku n’a za abai, ku bunda ku za karai, nɵa ku za tuwur. tiyana aga mu tukuku arbaɗi nagai n’e nifi kai edi siɗi huwuŋi na wiini Alaw par gaigai; Tuku kerub zi geɗam, aga mu birguku edi arbani ali-fuŋ na cora mekele keŋ tini afu.

¹⁷Ku niya war kulini si burini zufku, ku hiniti abaiku te tuura yelku zi zi wala kok. Aga mu huguku azumai midini afti, aga mu zuku aŋ wala zi tili na wiiɗi paakai na midini afti.

¹⁸Pin tuwurku na viya gaini sakalaku na jre kai lai, ku kasi miisi sin halaiku na sɗik. Tiyana aga mu hinsi afu a niyasi edi arbaki par, aga a yiki edi, aga mu bunduku aŋ bono na min afu midini afti, wuzani arɗi nagai n’e tuluku paŋ.

¹⁹Nagai paŋ n’e suɗuku arbani pinziba n’edi par paŋ aga e miliɗi gaini hunai buriku; aga ku bunda aŋ wala zi mili hunai. aga ku vada edi gamai!"

²⁰Miɗi na wiini EPIƊ-ƊAI a muɗa sa maini nɵa:

²¹"Tuku ɗif, bunda arku siɗi Sidon sek, muɗa miɗi na sin Alaw par siɗi.

²²Ku miɗiɗi ɓa: Epiɗ-ɗai Alaw a na muɗa maini nɵa: Mu na halɗi, Sidon aga mu nava kol warku, nɵa ɗai aga e siɗi ɓa ta m’EPIƊ-ƊAI buriɗi sariya n’aga mu zitiɗi; nɵa aga e siŋka edi wuzani arɗi gaglai ɓa ta m’Alaw na sɗik.

²³Aga mu ɵinasi vlak muduku, fel aga a ma edi war futiku, Ɗai aga e mri viya aha war fuŋku burini gaw n’aga a fakasi amai muduku war koŋ hlai paŋ par. Nɵa ɗai aga e siɗi ɓa ta m’EPIƊ-ƊAI

²⁴Asari na duɓuka gaini hedek na ɓula aga a za ɵimaɗi pinzibaɗi Izrayel kir kai. Nɵa aga e siɗi ɓa ta m’EPIƊ-ƊAI.

²⁵Epiɗ-ɗai Alaw a na muɗa maini nɵa: "Won hlai na mu tipiɗisi li pinzibaɗi Izrayel edi arbaɗi ɗai n’e ɵiri edi arbaɗi par, aga mu siŋkiɗi wiiɗi pinziba hanɗa ɓa mu na sɗik siɗi Izrayel; aga e simni midini aftiɗi, afti na mu siŋɗi aɗipar wiini ɵeŋ na wiya Yakob.

²⁶Aga e simni ɵeɗ, e rgi dalam, e pi luwuŋ zi vin; aga e simni ɵeɗ. Won hlai na mu zitiɗi sariya li wiiɗi nagai n’e bli gaw siɗi, n’e guniɗi azumai, nagai aga e siɗi ɓa ta m’EPIƊ-ƊAI, Alaw na wiiɗi."