Read Mousgoum Ezekiyel 29 Bible Online

Ezekiyel 29 - Mousgoum bible

Ezekiyel 29

¹war mefeŋ doogo pi sulu, na wiini tile n’ag'aŋ doogo, na wiini buza n’ag'aŋ doogo, miɗi na wiini EPIƊ-ƊAI a sa sa maini nɵa:

²"Tuku ɗif, bunda arku sin Faraw, pai n’Egipte, miɗini seŋ n’a halasi sin Alaw par sini ni, siɗi Egipte gaini abaiɗi paŋ lai.

³Ku miɗini ɓa: Epiɗ-ɗai Alaw a na muɗa maini nɵa: Mu na halɗi muduku, Faraw, pai n’Egipte, krum n’abai n’a na war yem na Nil; tuku na ku muɗa ɓa: " Nil ɗa a wiya, ta ɗi mu rga sa muta dama lai."

⁴Aga mu pa kawai galaiku, aga mu duɓuka hilif na war ra Nil na wiiku par sini fotorokku, mu yimukusi edi war Nil par gaini hilif na warni par na mu duɓukaŋ sin fotorokku paŋ.

⁵Aga mu bulku edi war basga na kaɗataɗ gaini hilif na war Nil na wiiku par paŋ; aga ku mra amai gdaŋ, edi war basga, ɗif aga a yima wala puku kapai ku kɵa warni kai, aga a tapa neŋku amai kaalai. Aga mu suku aŋ wala zi simi na wiini wazagai na midini afti gaini wazagai zi ɗifli n’arbani hlai n’amai lai.

⁶Nɵa ɗai na war Egipte paŋ aga e siɗi ŋa ta m’EPIƊ-ƊAI Zinai na wiiɗi na pini pinzibaɗi Izrayel a tala spakni kai maini atilo nɵa.

⁷Buriɗi nagai n’e yimuku tiɗi kai, ku humko, ku ɓula kerpeɵɗi lai, buriɗi nagai n’e tipli gaiku, ku haɗa, ku vada gdaŋ na warɗi paŋ edi.

⁸Nɵa ɗa Ta m’Epiɗ-ɗai Alaw mu muɗa na ɗa: aga mu hinasi gaw muduku, aga mu vada edi warku par ɗai murɗakai gaini farai lai.

⁹Afti n’Egipte aga a bunda aŋ greŋ na ɗif midini kai; nɵa ɗai aga e siɗi ŋa ta m’EPIƊ-ƊAI buri ni a muɗa ɓa: Nil ɗa a wiya, mu zaŋ muta.

¹⁰Pin hanɗa mu na halɗi muduku, midini ra Nil na wiiku lai: aga mu bunda afti n’Egipte aŋ greŋ, greŋ na kaɗataŋ, si a Migdol par haa a Siyen, haa sin hagani afti na gaiɗi Etiopiya ta.

¹¹Ezini ɗif aga a vuga warni kai, ezini farai kaalai; Egipte aga te hina kadai su haa buza doogo doogo puɗu.

¹²Aga mu bunda afti n’Egipte aŋ hlai na basga kaɗataŋ arbani afti zamai n’a na aŋ basga, fuŋni n’abakai lai aŋ basga arbani fuŋ n’abakai zamai n’a na war greŋ lai, haa buza doogo doogo puɗu aga mu ɵiriɗi ɗai n’Egipte edi arbaɗi pinzibaɗi ɗai, edi midini afti zamai zamai.

¹³Amma ta Epiɗ-ɗai Alaw mu na muɗa maini nɵa: Won hlai na buza doogo doogo puɗu a vadali, aga mu tipiɗisi ɗai n’Egipte edi arbaɗi ɗai n’e ɵiri edi arbaɗi par.

¹⁴Aga mu bunda wala na mu hiinaŋ buriɗi Egipte, aga mu wiyiɗisi aha war Egypte n’Amai, midini aftiɗi n’e wii woni, aga e ziti pai ktai na daidai nɵa.

¹⁵Pai hanɗa aga te za agwi sin marɗi na zamai, aga te rɗa amai midini pinziba zamai kir kai. Aga mu fiyiti paiɗi azumai kapai te ŋa midini pinziba zamai kir kai.

¹⁶Kapai pinzibaɗi Izrayel e tiliɗi aŋ zinai n’abai n’e hugiɗi aŋ za tuwur, aŋ bindi arɗi siɗi sek kir kai. Nɵa ɗai aga e siɗi ɓa ta m’EPIƊ-ƊAI

¹⁷War mefeŋ n’avut na wiini tile n’avut, na wiini buza n’ag'aŋ caɓa pi muguzak, seŋ na wiini EPIƊ-ƊAI ktai a muɗa sa maini nɵa:

¹⁸"Tuku ɗif, Nebukadnetsar, pai na Babilon a ziɗi gir arɗi askaraini viya wo hlai n’a hitima gaiɗi Tirus. Humuk paŋ kulta edi tak, kerpeɵ paŋ gai wuruk, amma a nava vrak na burini ni zaw, buriɗi askaraini na kiɗa midini gir n’e siɗiŋ aha war Tirus kai.

¹⁹Nɵa Epiɗ-ɗai Alaw a na muɗa maini nɵa: " Aga mu sini afti n’Egipte wiini Nebukadnetsar, pai na Babilon, aga a mula faraini, a mula wazgaiɗi n’a na paŋ, a virmiti marwai. Egypte aga te za aŋ vrak na wiiɗi ɗaini zi hatam.

²⁰Midini was n’e fiɗiŋ, aga mu sini afti n’Egipte, buri ɓa ni gaiɗi ɗaini zi hatam e zi sda buriya- a miɗi n’a halasi sin Epiɗ-ɗai Alaw par."

²¹War mefeŋ ni ɗa, aga mu riya spak na wiiɗi pinzibaɗi Izrayel amai; wiiku tuku Ezekiel ɗa aga mu suku yel n’aga ku muɗa arbaɗi lai. Nɵa ɗai aga e siɗi ɓa ta m’EPIƊ-ƊAI