Read Mousgoum Ezekiyel 3 Bible Online

Ezekiyel 3 - Mousgoum bible

Ezekiyel 3

¹Ɗif hanɗa a muɗaŋa: Tuku ɗif murɗek, luma wala n’aŋ tuku na ɗa, luma maktuɓ hanɗa, hala ku muɗa wiiɗi aliɗi Izrayel.

²Mu mala ma amai a saŋa maktuɓ hanɗa ma aŋ lumaŋ.

³Asakal par a muɗaŋa: Suma, va warku lai gaini maktuɓ na mu na suŋku hanɗa. Won hlai na mu na lumaŋ ɗa, war ma ɗa a na jibet maini emelni ami nɵa.

⁴A muɗaŋa: ɗif murɗek, hala siɗi aliɗi Izrayel ku miɗiɗi seŋ n’aga mu muɗuŋku ɗa.

⁵Mu ɵinuku na ɗa sin pinzibaɗi ɗai n’edi na seŋɗi zi miɗi ɗa a ɵina gir, a muɗa gir lai ɗa kai, amma mu ɵunuku na ɗa, sini pinzibaɗi Izrayel.

⁶Mu ɵunuku na ɗa sini pinziba n’edi na viya na seŋɗi zi miɗi ɗa a ɵina gir, a muɗa gir lai ɗa kai, mu ɵunuku fu na ɗa siɗi nagai ɗa, nagai aga e ɵini muku.

⁷Amma aliɗi Izrayel ɗa aga e ɵini muku kai, buri ɓa nagai e diri e ɵini ma kai. Buri ɓa aliɗi Izrayel ɗa humokɗi gdaŋ, agulɗi hiriyik lai.

⁸Tala, aga mu bunda humokku gdaŋ maiɗi nagai nɵa, agulku gdaŋ maiɗi nagai nɵa lai.

⁹Aga mu bunda humokku ɗa gdaŋ maini diyaman ɵa, gdaŋ a suwa ali-fuŋ. Ku hûniɗi kai, ku hiniɗi a muluku hunai puku kaalai buri e ɗi pinziba n’a ɵina seŋ kai.

¹⁰A muɗaŋa, ɗif murɗek, seŋ n’aga mu muɗuŋku paŋ ɗa ku yimaŋ ɵimaku pɗem, ku giɗimaŋ war agulku lai.

¹¹Hala siɗi ɗaiku n’e yimiɗisi, e kiɗisi edi midini afti hanɗa, ku miɗiɗi, e ɵini, e ɵini kai, ku miɗiɗi ɓa: Epiɗ-ɗai Alaw a na muɗa ɵa.

¹²Smer na wiini EPIƊ-ƊAI a yimaŋa amai arbani hlai, duɓa sek ɗa mu ɵina suura na gdaŋ maini nɵa: Kol siɗi abai na wiini EPIƊ-ƊAI war hlai n’a sumna warni ɗa.

¹³Asakal hanɗa mu ɵina suura na wiini gaŋgraŋni wazagai na karni n’a ɵiɓa sini marni, gaini suura na wiini ezini saret gaini suura na gdaŋ ɗa lai. A diŋga paŋ ɗa a za aŋ suura n’abai a suwa pra.

¹⁴Smer n’a yimaŋa amai ɗa, a kaŋa war hlai zamai, mu hala zaw na ɗa war agul zi divi, war suwar, amma spakni EPIƊ-ƊAI ɗa a suwaŋa suwai.

¹⁵Mu co a Tel-Aviv arbaɗi ɗai n’e yimiɗi e kiɗi edi midini afti ni ɗa, n’e simni ɵimani ra Kebar ɗa, mu sumna woni haa mefeŋ muguzak, hangala gaini ɵiɓi edi marwai, mu sɗa wala na mu zaŋ ɗa kai.

¹⁶Asakalni mefeŋ na muguzak ɗa, EPIƊ-ƊAI a muɗaŋa seŋ, a muɗa:

¹⁷Ɗif murɗek, mu dara mu tukuku aŋ ɗif n’a za heelek wiiɗi aliɗi Izrayel. Won hlai na ku ɵina li seŋ na ma par ɗa, ku ziɗi zaida ta.

¹⁸Won hlai na mu muɗa li ɓa ɗif na meefeŋ ɗa aga a mra ɗa, ku zini zaida ta, ku miɗini ɓa a hina payaini na meefeŋ ɗa edi kapai a sumna karni, na ɓa ku zini zaida kai ɗa ɗif na meefeŋ ɗa aga a mra burini meefeŋ n’a zaŋ, amma tuku ɗa, felni aga a zilba war tuku.

¹⁹Amma na ɓa ku zini zaida li ta, a dara a hina meefeŋni gaini payaini na meefeŋ ɗa edi kai ɗa, ɗif hanɗa aga a mra burini meefeŋni ɗa, amma tuku aga ku kurɗa suku.

²⁰Sla kai ɗa ɗif na jre, a hiniti futi na pɗemi edi ta a tika pini a za meefeŋ, nɵa aga mu yimaŋ warni azaw, a mra lai, na ɓa ku zini zaida kai ɗa aga a mra war tuwurni ɗa, sdani na pɗamai n’a zaŋsi ɗipar ɗa aga a pɵa kai, amma aga mu zilba felni war tuku.

²¹Amma na ɓa ku zini zaida li wiini ɗif na jre ɗa ta ɓa, kapai a za meefeŋ kai, nɵa a za meefeŋ kir kaalai ɗa, aga a sumna karni, tuku ɗe aga ku kurɗa suku.

²²Spak na wiini EPIƊ-ƊAI a niya sa, a muɗaŋa: Faka amai hala edi warni huduk ɗa woni aga mu muɗuku seŋ.

²³Mu niyasi edi warni huduk ɗa, abai na wiini EPIƊ-ƊAI te siŋka ara maini na mu tilitisi gobi ɵimani ra na Kebar ɗa nɵa, nɵa mu kɵa azumai, mu pa ara azumai.

²⁴Smer ktai a niya sa, a ɗiyaŋa amai midini aza zaw a muɗaŋa ɓa: hala aha, ku doogo muku amai duk.

²⁵Tuku ɗif murɗek, aga e mili sogom suku, e rguku gaini kapai ku niya anene arbaɗi kai.

²⁶Aga mu diɓigiti alesiku amai pini hŋa hiŋaku, aga ku bunda ɓurtum, ku kiɗa ku gidiɗi midini meefeŋɗi kir kai, buri ɓa e ɗi pinziba n’a ɵina seŋ kai.

²⁷Amma, won hlai na mu dara mu muɗuku seŋ ɗa aga mu mala muku amai kapai ku miɗiɗi ɓa, Epiɗ-ɗai Alaw a na muɗa nɵa, nɵa, nɵa; ɗif n’a dara a ɵina ɗa a ɵina, n’a dara a ɵina kai ɗi ɗe aŋ wiini lai, buri ɓa e ɗi pinziba n’a ɵina seŋ kai.