Read Mousgoum Ezekiyel 30 Bible Online

Ezekiyel 30 - Mousgoum bible

Ezekiyel 30

¹Miɗi na wiini EPIƊ-ƊAI ktai a muɗa sa maini nɵa:

²Tuku ɗif, muɗa seŋ na min Alaw par edi; ku miɗiɗi ɓa: Epiɗ-ɗai Alaw a na muɗa maini nɵa: nuumi wuzani mefeŋ zi gir hanɗa?

³Buri mefeŋ ni a ŋasi gobi, mefeŋ na wiini EPIƊ-ƊAI, a na gobi a mefeŋ zi ɗugul, a sarti na wiini sariya na wiiɗi pinziba na zamai.

⁴Gaw aga a niyasi aha war Egipte, ɗai aga e ziriyi tin hunai aha war Etiopiya won hlai ni, ɗai aga e mri aha war Egipte; ɗai aga e mili farai na wiiɗi, aga e wûdi ezini dalam zi tûri n’azumai ɗa amai lai.

⁵ɗai na Etiopiya, na Put, na Lud ɗai zi jilni hanɗa paŋ, ɗai na Kuv gaiɗi ɗai na midini afti n’e zi bono gaiɗi lai aga e mri gaiɗi edi min gaw.

⁶EPIƊ-ƊAI a na muɗa maini nɵa: Ɗai n’e zini piɗi Egipte aga e kɵi, Kûlûni-si na ɗa e ŋi gdaŋ gara aga a giyha edi, a Migdol par haa a Siyen ta, ɗai aga e mri min kaɵkar a miɗi na sin Epiɗ-ɗai Alaw par.

⁷Hlai hanɗa aga a hina edi aŋ basga na kaɗataŋ n’arbani afti paŋ, fuŋni n’abakai lai aga a pɵa arbani fuŋ. Zi greŋ na zamai

⁸Nɵa ɗai aga e siɗi ɓa ta m’EPIƊ-ƊAI won hlai na mu ɵa afu li piɗi Egipte, won hlai na mu ɗukla zinai na piɗi n’edi par paŋ li lai.

⁹War mefeŋ ni ɗa ɵeɗ aga e hiliɗi sa par gaini hulum n’abai aŋ miliɗi hunai piɗi Etiopiya na te na war ɵeŋ; aga e ziriyi tin hunai, war mefeŋ zi ɓilki n’edi na wiiɗi Egipte. Nkam, mefeŋ hanɗa a na gizi.

¹⁰Epiɗ-ɗai Alaw a na muɗa maini nɵa: aga mu ɗiya suura na wiiɗi Egipte zaw, mu zaŋ gaini Nebukadnetsar, pai na Babilon.

¹¹Ni gaiɗi ɗaini, pinziba na sabapai gara e suwi paŋ, mu kiɗisi buri e tûûri afti edi. Aga e hitimiti Egipte, e vi afti paŋ gaini kopoŋ.

¹²Ra nil na wiini aga mu bundaŋ aŋ afti na huleŋ, aga mu sa afti war tiɗi ɗai na maafanai, aga mu kiɗisi ɗai na morkokai e tûûri afti paŋ edi gaini wazagai na warni paŋ lai. Ta, EPIƊ-ƊAI, mu muɗa ya.

¹³Epiɗ-ɗai Alaw a na muɗa maini nɵa: Aga mu fuɗa alawai zi rgi edi, aga mu vada alawai na jrekai kai edi war Memphis par, paakai n’e ŋi midini afti n’Egipte par lai; ktai maa aga a hina kai. Aga mu kasi hunai midini afti n’Egipte.

¹⁴Aga mu tuuriti Egipte n’Amai edi, aga mu ɵa afu piɗi Tanis, aga mu zitiɗi sariya wiiɗi Tebes.

¹⁵Aga mu hinasi hiyŋa n’abai midiɗi Sin, hlai zi gdaŋ na wiiɗi Egipte, aga mu ɗiya suura na wiiɗi Tebes.

¹⁶aga mu ɵa afu piɗi Egipte, Sin aga te turɗiya siɗi tin gir, Tebes zilagaiɗi aga te ɓasa, Memphis ɗai aga e tikiti lai.

¹⁷Gawlakai na On gaiɗi na Pi-Beset aga e mri edi min hatam falakai na woni aga e kiɗi edi aŋ bege lai.

¹⁸Futi aga te diya amai midiɗi Dafne kir kai, won hlai n’aga mu haɗa spakɗi Egipte edi. aga mu vada edi warɗi par gadaŋɗi n’e ɗa kûli siɗi burini; ɗugul aga a yima midiɗi, ɗai na warɗi aga e hili edi aŋ bege.

¹⁹Aga mu zitiɗi sariya wiiɗi Egipte, nɵa ɗai aga e siɗi ɓa ta m’EPIƊ-ƊAI

²⁰War mefeŋ n’ag'aŋ muguzak na wiini tile n’avut, war buza n’ag'aŋ doogo pi ktai asakal kiyi n’edi war Babilon, EPIƊ-ƊAI a muɗa sa maini nɵa:

²¹Tuku ɗif, tala mu haɗa graŋni Faraw, pai n’Egipte ɗe, ɗif a zulini graŋni kai, e girdini dawa min kaalai, e rgini papra graŋni kapai a zaga pɗem, aŋ nava gadaŋni n’avut aŋ yima kaɵkar kir kaalai.

²²Nɵa ɗa, Epiɗ-ɗai Alaw a na muɗa maini nɵa: Mu na halɗi midini Faraw, pai n’Egipte. Aga mu hiɗini graŋni sulu paŋ, graŋni n’a na pɗem gaini ni na gai hiɗi ɗa lai, aga mu za haa kaɵkar na tini a kɵa edi.

²³Aga mu ɵiriɗi ɗai n’Egipte edi arbani pinzibaɗi ɗai, aga mu kiɗi edi midini afti zamai zamai.

²⁴Amma aga mu sini gdaŋ a suwa pra wiini graŋni pai na Babilon aga mu sini kaɵkar na wiya war tini; aga mu haɗa graŋni Faraw, ni aga a nuuma nuumi na wiini ɗif n’aŋ gai wuruk n’abai sini.

²⁵Aga mu sini gdaŋ wiini graŋni pai na Babilon, amma graŋni pai Faraw aga a yima amai kai. Nɵa ɗai aga e siɗi ɓa ta m’EPIƊ-ƊAI won hlai n’aga mu sini kaɵkar na wiya war tini pai na Babilon, won hlai na ni aga a rɗaŋ midiɗi Egipte.

²⁶Aga mu ɵiriɗi ɗai n’Egipte edi arbaɗi pinzibaɗi ɗai, aga mu kiɗi edi midini afti zamai zamai. Nɵa ɗai aga e siɗi ɓa ta m’EPIƊ-ƊAI! "