Read Mousgoum Ezekiyel 31 Bible Online

Ezekiyel 31 - Mousgoum bible

Ezekiyel 31

¹War mefeŋ n’avut na wiini tile n’ag'aŋ hu, war buza n’ag'aŋ doogo pi ktai seŋ na wiini EPIƊ-ƊAI a muɗa sa maini nɵa:

²" Tuku ɗif, miɗini wiini Faraw pai n’Egipte gaiɗi vok na wiini lai ɓa: Tuku si spak hanɗa, aga mu kutuku gaini a ma ɗa?

³Gaini luwuŋ Sipre, zaw gaini luwuŋ Sedre na war Liban na graŋni a tala pɗamai gara, a za seze pɗem gara lai na wilini amai mogo merfeŋni haa amai pin ɗugul ɗa ɗi?

⁴Yem a wulaŋ amai ta hulumni afti a wulaŋ amai mogo ɗa a hina rakaini a kasi pini won hlai n’e piŋ woni, a ɵina kluraini pin luwuŋ n’edi war vowai paŋ lai.

⁵Nɵa wilini Sedre a za a suwa na wiini luwoŋai na zamai n’edi war basga paŋ, tini na hahakai a pasi katawai viya pra, pin yem na navaŋ viya, garŋni a bunda mogokai a suwa lai.

⁶Wala zi ɗifli paŋ a za gutni amai tini, wazagai n’edi buza paŋ a wa ali azumai pini ɗai na gaini abaiɗi e simni azumai pin sezeni.

⁷A naka taka zuf burini abaini, burini graŋni na waŋ edi gara lai; sdaini a pa haa azumai arni yem n’abai.

⁸Luwuŋ Sedre na war zardeŋ na wiini Alaw a kata gaini kai, Luwuŋ Sipre a kata gaini tini na pasi hahakai kai, guvra a kata gaini graŋni kaalai; luwuŋ ktai na war zardeŋ na wiini Alaw na kata gaini gai juf aŋ kai.

⁹Mu zaŋ juf gaini ɵimani na viya ɗa, luwoŋai na war Eden paŋ, na war vowai na wiini Alaw paŋ a zini sile.

¹⁰Buri nɵa, Epiɗ-ɗai Alaw a na muɗa maini nɵa: luwuŋ Sedre a wula amai mogo, merfeŋni haa amai pin ɗugul ta, nɵa kulini -si a niya warni lai,

¹¹tiyana mu saŋ war tini paiɗi ɗai paŋ, ni aga a za sini pin meefeŋ na wiini. Mu birgaŋ edi su.

¹²Ɗai na morkokoi, na hiinini haw warɗi kai, arbaɗi pinziba paŋ, e biliŋ azumai ka, e hiniŋ su. Tini n’abakai gaini na pasi hahakai lai a yaka amai midini huwuŋ, war huduk lai. Tini Sedre a haɗa agoɗom war klurai na midini afti paŋ, ɗai na midini afti paŋ e yimi siɗi edi pin sezeni par, e hiniɗi edi.

¹³Wala zi ɗifli n’arbani hlai n’amai paŋ a sumna midini tini n’a fuɗa azumai, wazagai n’edi buza par a zizina hlaini azumai pin graŋni.

¹⁴Hanɗa a za kapai luwuŋ na nava yem pɗem paŋa siɗa aŋ wula amai wuzani sek kai, haa na merfeŋni a daba amai pin ɗugul kir kai, kapai luwuŋ na nava yem pɗem a siɗa aŋ kola sini midini marni na zamai kai. Buri gai hlaini a sa tin mri, aga a niya azumai pin afti, gaiɗi ɗai murɗakai, gaiɗi nagai n’e niyi azumai war waŋ lai.

¹⁵Epiɗ-ɗai Alaw a na muɗa maini nɵa: mefeŋ na luwuŋ Sedre a niya azumai war hlaiɗi zi mri, mu zini dewele wiini huduk na wuŋŋa buri a tuwaŋ: mu doogo mini dug, mu ɗiya rakaini zaw, yem n’abakai paŋ a ɗiya kap; burini ni hlai na Liban mu bundaŋ gegeŋ, mu fuɗa luwoŋai na war basga paŋ edi lai.

¹⁶Pin suurani kɵini, ɗai e ziriyi, won hlai a mu hogaŋ azumai war hlaiɗi ɗai zi mri gaiɗi nagai n’e ɗa niyi azumai warni waŋ. Luwuŋ na war Eden par paŋ aga a firiya azumai war hulumni afti: luwoŋai na pɗamai, na jufai na Liban gaini n’a ca yem viya lai.

¹⁷Nagai lai e niyi azumai gaini war hlaiɗi ɗai zi mri, siɗi nagai n’e fiɗiɗi gaini kaɵkar. E ɗi ka e ɗi graŋni, e simni pin sezeni edi arbaɗi ɗai.

¹⁸Arbani luwoŋai na war Eden ɗa, kol na wiiku zaw abaiku mu kititi gaini a ma ɗa? E wuku azumai war hulumni afti gaini luwoŋai na war Eden paŋ, aga ku fana arbaɗi ɗai na gaziɗaŋ gaiɗi nagai na kaɵkar a tika galɗi zamai edi. Faraw aga a bunda maini nɵa gaiɗi ɗai na pini paŋ lai- A miɗi na halasi sin Epiɗ-ɗai Alaw par."